نازاربايەۆ حالىقارالىق كومپانيا باسشىلارىمەن كەلىسسوزدەر جۇرگىزدى

استانا. قازاقپارات - نۇرسۇلتان نازاربايەۆ شەتەلدىك ينۆەستورلار كەڭەسىنىڭ پلەنارلىق وتىرىسى اياسىندا ءبىرقاتار ەكىجاقتى كەزدەسۋ وتكىزدى، دەپ حابارلايدى اقوردانىڭ باسپا ءسوز قىزمەتى.

مەملەكەت باسشىسى شەتەلدىك ينۆەستورلار كەڭەسىنىڭ پلەنارلىق وتىرىسىنا قاتىسۋ كەزىندە ءبىرقاتار حالىقارالىق كومپانيا باسشىلارىمەن بىرلەسكەن كەلىسسوزدەر جۇرگىزدى.

اتاپ ايتقاندا، قازاقستان پرەزيدەنتى «ەني س. پ. ا.» كومپانياسىنىڭ باس اتقارۋشى ديرەكتورى كلاۋديو دەسكالتسيمەن، «رويال داتچ شەلل» كونتسەرنىنىڭ باس اتقارۋشى ديرەكتورى بەن ۆان بەردەنمەن جانە «لۋكويل» كومپانياسىنىڭ پرەزيدەنتى ۆاگيت الەكپەروۆپەن اڭگىمەلەستى.

كەلىسسوزدەر بارىسىندا كومپانيالاردىڭ قازاقستاننىڭ مۇناي-گاز سالاسىنداعى قىزمەتىنىڭ نەگىزگى باعىتتارى تالقىلانىپ، قاراشىعاناق پەن قاشاعان كەن ورىندارىن يگەرۋ ۇدەرىسىن ودان ءارى ۇيلەستىرۋ مەن جوسپارلاۋدىڭ وزەكتى اسپەكتىلەرى قارالدى.

كومپانيالار باسشىلارى شەتەلدىك ينۆەستورلار كەڭەسىنىڭ جۇمىسى تابىستى ەكەنىن اتاپ ءوتىپ، نۇرسۇلتان نازاربايەۆقا رەسپۋبليكادا قولايلى ينۆەستيتسيالىق احۋال جاساعانى ءۇشىن العىس ايتتى.