الەمدىك قاۋىمداستىق ءمايىت اعزالارىن پايدالانۋ بويىنشا قازاقستان حالقىنا ۇندەۋ جاسايدى
ق ر دەنساۋلىق ساقتاۋ ءمينيسترى ەلجان ءبىرتانوۆتىڭ ايتۋىنشا، ەلىمىزدە تۋعان-تۋىستار اراسىندا دونور بولۋ تاجىريبەسى جاقسى دامىپ جاتسا، ءمايىتتىڭ اعزالارىن پايدالانۋ جۇيەسى تۇرالاپ قالعان.
«الايدا بىزدە ارنايى زاڭ بار. ونى 2009-جىلى قابىلداعان بولاتىن. حالىق اراسىندا دا كەڭىنەن تالقىلاندى. سوعان قاراماستان، حالىق تاراپىنان نارازىلىق ايتىلىپ جاتىر. ارينە، وسى ماسەلە بويىنشا ءبىر كەلىسىمگە كەلۋ قيىن. سونىڭ سالدارىنان بىرەۋدىڭ ءومىرىن ساقتاپ قالۋعا تىرىساتىن دارىگەرلەرگە كىنا ارتىلىپ جاتادى. ولاي جالعاسا بەرسە، مەنىڭ ارىپتەستەرىم كەزەكتە تۇرعان ادامداردىڭ ءومىرىن ساقتاپ قالۋعا تارتىناتىن شىعار»، - دەدى ءبىرتانوۆ بۇگىن حالىق الدىندا ەسەپ بەرۋ كەزدەسۋى كەزىندە.
ءمينيستردىڭ ايتۋىنشا، ۆەدومستۆو ءمايىتتىڭ اعزالارىن دونورعا سالۋ جايىن جان-جاقتى ءتۇسىندىرۋ شارالارىن جالعاستىرادى. وعان قوسا، دۇنيەجۇزىلىك دەنساۋلىق ساقتاۋ ۇيىمى دا وسى ماسەلە بويىنشا ءوز ۇستانىمىن جاريالايدى.
«وكىنىشكە قاراي، بىزدەگى ترانسپلانتولوگيانىڭ دامۋى كوپ ادامدىڭ ءومىرىن ساقتاپ قالۋعا مۇمكىندىك بەرمەيدى. سونىڭ سالدارىنان كوبىسى شەتەلگە بارۋعا ءماجبۇر. ولاردىڭ ىشىندە بالالار دا بار»، - دەپ اتاپ كورسەتتى مينيستر.
ايتا كەتەيىك، وتكەن جىلى جاسالعان وتالاردىڭ ىشىندە 12 ءسى - جۇرەك الماستىرۋ، 1 - وكپە ترانسپلانتاتسيا، سونداي-اق 204 رەت بۇيرەك الماستىرۋ وتاسى جاسالدى. بۇدان بولەك، تەرى، سۇيەك كەمىگى، باۋىر جانە تاعى باسقا اعزالاردىڭ ترانسپلانتاتسياسى وتكىزىلدى.
بۇعان دەيىن حابارلاعانىمىزداي، اقتوبەلىك دارىگەرلەر 22 جاستاعى جىگىتتىڭ ەكى بۇيرەگىن ەكى ادامعا ەش رۇقساتسىز سالىپ بەرگەن بولاتىن. بۇل وقيعا بويىنشا دەنساۋلىق ساقتاۋ ءمينيسترى ەرجان ءبىرتانوۆ ءوز پىكىرىن بىلدىرگەن ەدى. سونداي-اق، 2№ اقتوبە قالالىق سوتىندا مارقۇمنىڭ قارىنداسى بالداۋرەن نۇربىلايەۆانىڭ ارىزى قارالدى.
اۆتور: ارمان اسقاروۆ
