بار قازاق - ءبىر قازاق
قازاق ەلى تاۋەلسىزدىك العان شيرەك عاسىردان استام ۋاقىت ىشىندە تورتكۇل دۇنيەگە تارىداي شاشىلعان دۇنيە ءجۇزى قازاقتارى اتاجۇرتتا بەسىنشى رەت باس قوسىپ وتىر.
بۇل تاۋەلسىزدىكتىڭ ارقاسىندا جۇزەگە اسىپ وتىرعانى ءسوزسىز. بۇگىن استانادا دۇنيەجۇزى قازاقتارىنىڭ V قۇرىلتايىنا الەمنىڭ 40 شاقتى مەملەكەتىنەن كەلگەن 341 وكىل ەلورداداعى ەڭسەلى ەسكەرتكىش - «قازاق ەلى» مونۋمەنتىنە گۇل شوقتارىن قويۋ راسىمىنە قاتىسادى. ودان كەيىن ءقادىرلى قوناقتاردى باعدارلاما بويىنشا: ۇلتتىق مۋزەي، ازىرەت سۇلتان مەشىتى، قازاقستان رەسپۋبليكاسىنىڭ تۇڭعىش پرەزيدەنتى - ەلباسى كىتاپحاناسىمەن تانىستىرۋ شاراسى رەت- رەتىمەن اتقارىلماق. بۇل قۇرىلتايدىڭ باستى ەرەكشەلىگى - «رۋحاني جاڭعىرۋ جانە شەتەلدەگى قازاقتار» دەگەن ايدارمەن ءوتۋى.
ياعني، جۋىقتا عانا جارىق كورگەن ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» اتتى يدەولوگيامىزدىڭ باعىت- باعدارىنا اينالعان باعدارلامالىق ماقالاسىندا اتاپ وتىلگەندەي، ۇلتتىق دامۋىمىزدىڭ باستى تىرەگى بولاتىن تۇجىرىمدامالاردىڭ بۇگىنگى قۇرىلتاي يدەياسىمەن ساباقتاسىپ جاتۋى جيىننىڭ ەڭ ءبىر ۇتىمدى دا ءساتتى تۇسى ەكەنى ءسوزسىز. دۇنيەجۇزى قازاقتارىنىڭ قاۋىمداستىعى الەمنىڭ 32 ەلىندە ورنالاسقان «قازاق مادەني ورتالىقتارىمەن» بايلانىسا وتىرىپ، مارتەبەلى جيىنعا قوناقتار شاقىرعان. سول سياقتى، جيىنعا قىرعىزستاننان - 20، گەرمانيادان - 9، ازەربايجاننان - 7، بەلارۋستەن - 5، تۇرىكمەنستاننان - 4، فرانسيادان - 4، تاجىكستاننان - 3، ا ق ش- تان - 3، ۋكراينا، ۇلىبريتانيا، شۆەتسيا، ۆەنگريا ەلدەرىنىڭ اربىرىنەن - 2، مولدوۆا، دانيا، گوللانديا، چەحيا، فرانسيا، كانادا قاتارلى 15 ەلدەن ءبىر- ءبىر وكىل شاقىرىلىپتى.
بيىلعى قۇرىلتاي قوناقتارىنىڭ 80 پايىزعا جۋىعى بۇرىن قاتىسپاعان جاڭا ادامدار بولسا، وسىلاردىڭ 60 پايىزدان استامى 35 جاسقا دەيىنگى جاستار. سوندىقتان دا جيىن بارىسىندا «نۇر وتان» پارتياسىنىڭ قولداۋىمەن قازاق جاستارىنىڭ فورۋمى وتەدى دەپ كۇتىلۋدە.
فورۋمعا شەتەلدىك باۋىرلارىمىز جانە ءوزىمىزدىڭ «جاس وتان»، «جاسىل ەل» سياقتى جاستار ۇيىمدارى، «بولاشاق» باعدارلاماسى ارقىلى شەتەلدە وقىپ جۇرگەن ستۋدەنتتەر قاتىسادى. مۇنىڭ سىرتىندا 5 مينيسترلىكتە سەكتسيالىق وتىرىستار وتەدى. شەتەلدەن كەلگەن اعايىندار سول 5 توپقا ءبولىنىپ، ءار ازامات ءوز ماماندىعى، ءوز باعىتى، تالاپ- تىلەگىنە قاراي ءوزى تاڭداعان سەكتسياعا قاتىسادى.
قۇرىلتايدىڭ ءۇشىنشى جاڭالىعى - تۋعانىنا 100 جىل تولىپ وتىرعان ءدىنتانۋشى- عالىم حاليفا التايدىڭ داتالى مەرەيتويىنا وراي «حاليفا التاي جانە قايتا ورالعان تاريح» اتتى حالىقارالىق عىلىمي- پراكتيكالىق كونفەرەنسيا وتكىزىلمەك. ەڭ باستى شارا - قۇرىلتايدىڭ اشىلۋ سالتاناتى 23 -ماۋسىم كۇنىنە جوسپارلانۋدا. وسى كۇنى ەلباسىنىڭ قاتىسۋىمەن پلەنارلىق وتىرىس وتەدى دەپ مەجەلەنۋدە. بۇل باسقوسۋدا اسا ماڭىزدى نەگىزى ماسەلەلەر تالقىلاناتىن بولادى. وعان دەيىن مارتەبەلى مەيماندار ەلوردا ماڭىنداعى «ەتنواۋىل» كەشەنىمەن تانىسىپ، سول كۇنى وتەتىن اقمولا وبلىسىنىڭ مادەني كۇندەرىنە قاتىسادى. سوڭىندا «استانا وپەرا» تەاترىندا «قىز جىبەك» وپەراسىن تاماشالايدى.
وسىلايشا، دۇنيەنىڭ تۇكپىر- تۇكپىرىندە تارىداي شاشىلعان الاشتىڭ ۇرپاعى استانا تورىندە باس قوسىپ، ۇلتتىڭ بولاشاعى توڭىرەگىندە اڭگىمە قوزعاپ، ەلدىكتىڭ ەرتەڭىنە قام جاسايدى.
قىسقاسى، «بار قازاق - ءبىر قازاق» بولىپ، اجارلى استانا تورىنەن اسقاق ءۇن قاتادى.
بەكەن قايرات ۇلى، «ەگەمەن قازاقستان»
