اتاجۇرتقا اسىقتىق

استانا. قازاقپارات - ​قازىرگى تاڭدا كورەگەن ەلباسى نۇرسۇلتان نازاربايەۆتىڭ باياندى باسشىلىعىمەن الەم قاۋىمداستىعى الدىندا زور بەدەلگە قول جەتكىزگەن قازاقستاننىڭ ءاربىر قادامى سىرتتا جۇرگەن ءبىزدى قۋانتادى.  

اسىرەسە، ەكسپو-2017 كورمەسىنىڭ اشىلۋى، وسى قارساڭدا دۇنيەجۇزى قازاقتارىنىڭ كەزەكتى قۇرىلتايىنىڭ وتكىزىلۋى قاي جاعىنان قاراساڭىز دا بارلىق تاراپتان ۇيلەسىمىن تاپقان بەرەكەلى دە، باياندى ءىستىڭ كورىنىسى ەكەنى انىق.

دەموكراتيالىق جولمەن دامۋدى ۇلگى تۇتقان موڭعول ەلىندە قازىردىڭ وزىندە 100 مىڭنان استام قازاق ءومىر ءسۇرىپ جاتىر. بۇلاردىڭ دەنى باي- ولكە ايماعىندا تۇرادى. ايماعىمىز قازاقستان ەلى تاۋەلسىزدىك العان كۇننەن باستاپ اتاجۇرتىمەن بايلانىس ورناتىپ، شەتەل قازاقتارى اراسىنان العاشقى بولىپ كوش باستادى. ايماق ورتالىعى ولگەي قالاسىندا قازاقستاندىق تەلەونىمدەردىڭ بارلىق ارناسى كورسەتىلىپ تۇر.

جاس جەتكىنشەكتەر «بالاپان» تەلەارناسى ارقىلى ءتىل سىندىرىپ، ۇلتتىڭ رۋحاني قازىناسىمەن قاۋىشسا، ۇلكەندەر ءار كۇنگى ساياسي وزگەرىستەر مەن جاڭالىقتاردى قالت جىبەرمەي قاداعالاۋدا. ويتكەنى، قازاقستان بار قازاقتىڭ -  تەمىرقازىعى. ءبىزدىڭ موڭعوليالىق قازاق اعايىندار ازىرگە وزدەرىنىڭ انا تىلىندە ءبىلىم الۋعا شارت- جاعداي جاسالعان. دەيتۇرعانمەن بولاشاقتا قازاقستاننىڭ ءبىلىم جانە عىلىم مينيسترلىگىمەن بىرلەسە وتىرىپ، ءبىلىم بەرۋدىڭ كەشەندى جوبالارىن ىسكە اسىرا الساق نۇر ۇستىنە نۇر بولار ەدى.

سول سياقتى، الداعى كۇندەرى قازاقستان- موڭعوليا ەلدەرىنىڭ ديپلوماتيالىق جاقسى قارىم- قاتىناسىن پايدالانىپ، بولاشاقتا بىرلەسكەن شاعىن كاسىپورىندار اشۋ جولعا قويىلسا، ەكىنشىدەن، قازاقستان تاراپىنان شەتەلدەگى جاستارعا بولىنەتىن جوعارى ءبىلىم گرانتىنىڭ ۇزىلمەۋىن، قايتا 4 پايىزعا كوبەيۋىن قالايمىز.

بۇل مارتەبەلى باسقوسۋ بارىسىندا جالپى قازاققا ورتاق كەلەلى ماسەلەلەر تالقىلانادى دەگەن ءۇمىت بار. اسىرەسە، قازاقتار قالىڭ شوعىرلانعان ولكەلەرگە كونسۋلدىق قىزمەت ورىندارىن اشۋ ارقىلى شەتتەگى قازاقتاردى اتاجۇرتىنا قونىستاندىرۋ جۇيەسىن جاساپ، ورالماندى قۇجاتتاندارۋ ءىسىن سول جاقتا شەشكەن ءجون سياقتى. قۇرىلتاي قۇتتى بولسىن اعايىن!

باكەي اعىپار ۇلى، اكادەميك، موڭعوليا اۋىل شارۋاشىلىعى عىلىمى اكادەمياسىنىڭ ۆيتسە- پرەزيدەنتى

Egemen.kz