سىرتتاعى قازاق دياسپوراسى مادەني سالاداعى قولداۋعا وتە مۇقتاج - تالعات ماماشەۆ
جالپى 30-دان استام ەلدەن كەلۋگە نيەتتى قازاقتاردىڭ باسىن قوساتىن بۇل قۇرىلتايدى جوعارى دەڭگەيدە وتكىزۋ ءۇشىن دايىندىق جۇمىستارى قىزۋ ءجۇرىپ جاتىر.
بۇگىنگى زاماندا قازاق ەلىنىڭ الدىندا تۇرعان باستى مىندەتتەردىڭ ءبىرى شەتەلدەگى قانداستارىمىزبەن، اسىرەسە قازاق جاستارىمەن رۋحاني بايلانىسىمىزدى، تاريحي تامىرلاستىعىمىزدى ءۇزىپ الماۋ. بۇل تۇرعىدا ولاردىڭ قازاقستان جايلى جان- جاقتى، تولىققاندى اقپارات الىپ تۇرۋىن قامتاماسىز ەتۋ نەگىزگى قادامداردىڭ ءبىرى سانالادى. وسى ورايدا ايتۋلى شارانىڭ قارساڭىندا دۇنيەءجۇزى قازاقتارىنىڭ قاۋىمداستىعى ءتوراعاسىنىڭ ءبىرىنشى ورىنباسارى تالعات ماماشەۆتان العان سۇحباتىمىزدى نازارلارىڭىزعا ۇسىنامىز.
- تالعات اسىل ۇلى، دۇنيەءجۇزى قازاقتارىنىڭ ءبىرىنشى قۇرىلتايى قازاقستان تاۋەلسىزدىگىن العاننان كەيىن ءوتتى. جالپى، ەگەمەندىگىمىز شەتەلدەگى قانداستارىمىزعا قانداي مۇمكىندىكتەر بەردى؟
- قازاقستان رەسپۋبليكاسى ەگەمەندىك الىپ، تاۋەلسىزدىك جاريالاعاندا ەڭ ءبىرىنشى قۋانعان الەمنىڭ 40-تان استام ەلىندە شاشىراپ جۇرگەن اعايىندار ەدى. وسى كۇننەن باستاپ ولاردىڭ اتاجۇرتقا كەلۋىنە كەڭ جول اشىلدى. وسىعان وراي شەتەلدەگى قانداستارىمىزدىڭ باسىن قوسىپ، جۇمىستى ءارى قاراي قالاي جۇرگىزەمىز، كوشى- قون ماسەلەسىن قالاي ۇيىمداستىرامىز، ولاردىڭ رۋحاني- مادەني سۇرانىستارىن قالاي قاناعاتتاندىرامىز دەگەن كوپتەگەن ماسەلەلەر تۋىندادى. مىنە، وسى ماسەلەلەردى تالقىلاپ، ءبىر جۇيەگە ءتۇسىرۋ ءۇشىن بۇكىل قازاقتىڭ باسىن قوسقان ءبىر القالى جيىن كەرەك ەدى. 1992 - جىلى قىركۇيەك ايىندا سول كەزدەگى قازاقستاننىڭ استاناسى الماتى قالاسىندا وتكەن دۇنيەءجۇزى قازاقتارىنىڭ تۇڭعىش قۇرىلتايى وسى ماسەلەگە ارنالدى.
سول القالى جيىندا دۇنيەءجۇزى قازاقتارىنىڭ قاۋىمداستىعىن قۇرۋ تۋرالى شەشىم قابىلداندى. قاۋىمداستىق ءتورالقاسىنىڭ ءتوراعاسى بولىپ قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازاربايەۆ سايلاندى. ماجىلىستە ەلباسى نۇرسۇلتان نازاربايەۆ حالقىمىزدىڭ بۇگىنى مەن بولاشاعى تۋرالى تەبىرەنىسكە تولى بايانداما جاسادى. ءسويتىپ، تۇڭعىش قۇرىلتايدا دۇنيەجۇزى قازاقتارى قاۋىمداستىعى دەگەن قوعامدىق ۇيىم دۇنيەگە كەلىپ، تۇساۋى كەسىلدى. ەندى بۇدان بىلاي سىرتتاعى 5 ميلليون قانداستارىمىزدىڭ باسىن قوسىپ، ولاردىڭ رۋحاني سۇرانىستارىن وتەپ، بارلىق ماسەلەلەرىن وسى قاۋىمداستىق شەشەتىن بولدى. ال سۇراققا كەلسەك، ەگەمەندىگىمىزدىڭ شەتتەگى اعايىنعا بەرگەن العاشقى دا باستى مۇمكىندىگى كوشى- قون ماسەلەسى. شەتتەن كەلەتىن اعايىنعا ءبىر كەزدەرى 300-500 كۆوتا بولىنسە، سوڭعى جىلدارى ول 20000 وتباسىعا دەيىن جەتتى. سونىڭ ناتيجەسىندە قازاقستانعا ءبىر ميلليوننان استام قانداستارىمىز قونىستاندى. ولار تاريحي وتانىنا ورالۋعا ءارقاشاندا مۇددەلى جانە جىل سايىن ۇزدىكسىز كەلىپ تە جاتىر.
بۇل اعايىندار اتامەكەنگە كەلگەن بويدا ەلىمىزدەگى ءوندىرىس پەن اۋىلشارۋاشىلىعىنىڭ بارلىق سالاسىنا، شاعىن كاسىپكەرلىك پەن بيزنەسكە بەلسەنە كىرىسىپ، ناتيجەلى ەڭبەك ەتۋدە. وقۋ- ءبىلىم، مادەنيەت، عىلىم سالاسىندا كوزگە ءتۇسىپ جۇرگەندەر دە از ەمەس. ءبىرقاتار ەلدەردەن قونىس اۋدارعان قانداستارىمىزدىڭ جاس ۇرپاعى قازاقستاننىڭ قارۋلى كۇشتەرى مەن قۇقىق قورعاۋ ورگاندارىندا دا كوپتەپ قىزمەت ەتۋدە. دەمەك، قازاقستاننىڭ بۇگىنگىدەي ءوسىپ- وركەندەۋىنە، قورعانىس كۇشىنىڭ نىعايۋىنا شەتەلدەگى قازاقتاردىڭ قوسار ۇلەسى ايرىقشا قوماقتى. قازىرگى كەزدە اتاجۇرتتان الىستا تۇراتىن اعايىنداردىڭ ءبىرازى باسقا تىلدە، باسقا جازۋمەن ساۋات اشادى. بۇل جاعداي ولاردىڭ قازاقستاننىڭ جوعارى جانە ارناۋلى ورتا وقۋ- ورىندارىنا ءتۇسۋىن قيىنداتادى. قاۋىمداستىق شەتەلدەگى قازاق جاستارىنا ارنالعان دايىندىق بولىمدەرىن اشۋعا سەبەپكەر بولدى. قازىر دايىندىق بولىمدەرىنە 1500 بالاعا دەيىن قابىلدانادى. سوسىن جىل سايىن شەتەلدەگى قازاق بالالارىن كوكشەتاۋداعى «بالداۋرەن» اتتى وقۋشىلاردىڭ جازعى لاگەرىنە بارىپ دەمالۋى دا ۇيىمداستىرىلۋدا. بۇل دا ءبىزدىڭ سىرتتاعى قانداستارىمىز ءۇشىن جاسالىپ وتىرعان قامقورلىقتاردىڭ ءبىرى. شەتتە جۇرگەن قانداستارىمىز ءۇشىن بۇدان باسقا دا مۇمكىندىكتەر جاسالىپ جاتىر.
- ءتورتىنشى قۇرىلتايدان كەيىن شەتەلدەگى قازاقتاردىڭ قاۋىمداستىقتارىندا قانداي وزگەرىستەر بولدى؟
- ۇلكەن وزگەرىستەر بولدى دەۋگە كەلە قويماس، دەگەنمەن قازىرگى كەزدە شەتەلدەگى قازاقتاردىڭ مادەني- رۋحاني سالادا قول جەتكىزگەن تابىستارى ايتارلىقتاي مول. قازاقتار تىعىز ورنالاسقان جەرلەردە قازاق حالقىنىڭ تاريحىنا، مادەنيەتىنە بايلانىستى باي مۇرالار بار. شەتەلدەگى قازاقتار - قازاقستان ءۇشىن باعا جەتپەس مول بايلىق، ۇلكەن قاينار كۇش. ءبىراق وسى جەردە ولاردىڭ بولاشاعى قانداي دەگەن سۇراق تۋىندايدى. بىردەن اشىپ ايتۋ كەرەك، شەتەلدەگى قازاقتاردىڭ جاعدايى كۇن وتكەن سايىن قيىنداپ بارادى. ولار وزدەرى تۇراتىن ەلدىڭ جەرگىلىكتى حالقىنا ءسىڭىپ، اسسيميلاتسياعا ۇشىراۋعا بەت العان. مۇنىڭ العاشقى بەلگىلەرى قازىردىڭ وزىندە ايقىن كورىنىپ وتىر. بۇگىنگى تاڭدا شەتەلدەگى قازاقتاردىڭ ءوز انا تىلىندە وقىپ، ءبىلىم الۋى، وزدەرىنىڭ ۇلتتىق قادىر- قاسيەتىن ساقتاپ دامىتا بەرۋى بارىنشا كۇردەلەنگەن. سونىڭ سالدارىنان انا تىلىنەن اجىراپ، قازاقتىق قالپىن جوعالتقان جاڭا ۇرپاق قاۋلاپ ءوسىپ كەلەدى. ال مۇنداي ۇرپاقتىڭ قازاقستاندى تاريحي وتانىم دەپ ەسەپتەۋى، اتاجۇرتقا ىنتا- ىقلاس تانىتۋى ەكى تالاي. مۇنىڭ ءوزى شەتەلدەگى قازاقتاردىڭ قازاقستانعا كەلۋىن بىرتە- بىرتە ازايتا بەرەرى انىق. ياعني ۋاقىت وتە كەلە ەلىمىز ءۇشىن وتە ماڭىزدى شەتەلدەگى باعا جەتپەس بايلىعىمىزدان، وزدەرىن اتاجۇرتتىڭ وكىلىمىز دەپ ەسەپتەيتىن قالىڭ قازاق دياسپوراسىنان ءبىرجولاتا ايىرىلىپ قالۋىمىز مۇمكىن.
قازىرگى كەزدە قىتايدا قازاق تىلىندەگى كىتاپ، گازەت- جۋرنال شىعارۋ جوعارى دەڭگەيدە جولعا قويىلعان. قازاقتىڭ ءانىن، كۇيى مەن ءبيىن ناسيحاتتايتىن ونەر ۇجىمدارى دا بارشىلىق. قازاق حالقىنىڭ تاريحي، مادەني- ادەبي مۇرالارىن زەرتتەپ، جارىققا شىعارۋدا دا قىتايدا ۇلكەن جۇمىستار جۇرگىزىلۋدە. مىنە، سوندىقتان دا ءبىز كۇندەلىكتى جۇمىسىمىزدا قىتايدىڭ قازاقتار كوپ تۇراتىن شىنجاڭ ۇيعىر اۆتونوميالى ولكەسىمەن بايلانىس جاساۋعا ايرىقشا نازار اۋدارامىز. بۇگىنگى تاڭدا رەسەيدىڭ وتىزدان استام وبلىستارىندا قازاق مادەني ورتالىقتارى قۇرىلىپ، جۇمىس ىستەيدى. سامارا قالاسىندا توقتار دۇسەنبايەۆتىڭ جەتەكشىلىگىمەن رەسەيدەگى قازاق مادەني ورتالىقتارىنىڭ ۇيلەستىرۋ كەڭەسى قۇرىلعان. ءبىراق بۇعان قاراپ رەسەيدەگى قازاقتاردىڭ ۇلتتىق رۋحاني- مادەني جاعدايىندا ەشقانداي كۇردەلى ماسەلە جوق دەيتىن ۇعىم تۋماۋعا ءتيىس. ءبىزدى، اسىرەسە، رەسەي قازاقتارىنىڭ انا تىلىنەن الىستاپ بارا جاتقانى الاڭداتادى. ءتىپتى، قازاقتار ءبىرىڭعاي تىعىز وتىرعان جەرلەردىڭ وزىندە قازاق تىلىندە ءبىلىم بەرەتىن مەكتەپتەر جوق. جاستاردىڭ باسىم كوپشىگى ءوز انا ءتىلىن اسىپ كەتكەندە فاكۋلتەتيۆتى ساباق رەتىندە عانا وقيدى. ال يران، اۋعانستان سياقتى بىزبەن جاقىن ورنالاسقان مەملەكەتتەردە دە ءبىرشاما تىعىز وتىرعان اعايىندارىمىز بار. قاۋىمداسىق ولارمەن دە تۇراقتى بايلانىس جاساپ تۇرۋدى ەشقاشان ەستەن شىعارمايدى. شەتەل قازاقتارى تۋرالى ءسوز ەتكەندە موڭعولياداعى اعايىندارىمىزعا ايرىقشا توقتالا كەتكىمىز كەلەدى. مۇنداعى قازاقتار انا ءتىلىن دە، ۇلتتىق قازىنا بايلىقتارىن دا قايماعىن بۇزباي سول قالپىندا ساقتاپ كەلەدى. دەموگرافيالىق ءوسىمى دە جوعارى دەڭگەيدە.
- شەتەلدەگى قانداستارىمىز قازىرگى كۇنى ناقتى قانداي قولداۋعا مۇقتاج بولىپ وتىر؟
- مەنىڭ ويىمشا، سىرتتاعى قازاق دياسپوراسى مادەني سالاداعى قولداۋعا وتە مۇقتاج. ويتكەنى، ولاردىڭ بولاشاقتا قازاق ۇلتىنىڭ وكىلى رەتىندە ساقتالىپ قالۋى وسى ماسەلەگە كەلىپ تىرەلەدى. وركەنيەتتى ەلدەردىڭ كوبى شەتەلدەگى ۇلتتىق مادەني ورتالىقتارىنا بيۋدجەتتەن ارنايى قارجى ءبولىپ، ناقتى قولداۋ جاسايدى. قازاقستان دا شەتەلدەگى قازاق مادەني ورتالىقتارىنا وسىنداي قامقورلىق جاساۋدى جۇيەلى تۇردە قولعا الۋى كەرەك. سونداي- اق، شەت ەلدەردەگى قازاق جاستارىنىڭ اراسىنان ادەبيەت پەن ونەرگە، ءبىلىم- عىلىمعا، سپورتقا، كاسىپكەرلىككە بەيىم دارىندى بالالاردى تاۋىپ، تاربيەلەۋگە كوڭىل ءبولۋ قاجەت. سوسىن سىرتتاعى اعايىندارىمىز وقۋ- ءبىلىم جانە انا ءتىلى ماسەلەسى جونىنەن قولداۋعا اسا مۇقتاج.
- قازاقتاردىڭ كوپشىلىگى كورشى ەلدەردە تۇرىپ جاتقانى بەلگىلى. قانداستارىمىزدىڭ وسى مەملەكەتتەردەن ەلگە قايتۋ تۇرعىسىندا قانداي دا ءبىر قيىندىقتار بار ما؟ جالپى قاي ەلدەردەن قانداستارىمىز كوپ كەلىپ جاتىر؟
- شەتەلدەگى سان ميلليون وتانداستارىمىز بولاشاقتا دا قازىرگى تۇرعان جەرلەرىندە مەكەندەپ قالا بەرەدى. بۇل شىندىق. ەڭ باستىسى ولاردى سول جەردە ۇلت رەتىندە امان ساقتاپ، انا ءتىلىن، مادەنيەتىن، سالت- ءداستۇرىن دامىتا بەرۋگە ۇلەس قوسۋىمىز كەرەك. مىنە، سوندا عانا شەتەلدەگى وتانداستارىمىز ءتىلى، ءداستۇرى، ارمان- ماقساتى، مۇددەسى ءبىرتۇتاس جانە تاريحي وتانىنا ءارقاشان دا جاناشىر ۇلكەن كۇشكە اينالادى. وركەنيەتتى مەملەكەتتەردىڭ ءبارى شەتەلدەگى ءوز دياسپوراسىن وسى تۇرعىدان باعالاپ، ايرىقشا كوڭىل بولەدى. ايتا كەتەيىن، قازاقستانمەن كورشىلەس قىتايدا ءبىر جارىم ميللوننان استام قازاقتار تۇرادى. سوسىن شەتەلدەگى قازاقتار ەڭ كوپ تۇراتىن ەلدەردىڭ ءبىرى - رەسەي. مۇنداعى اعايىندارمەن بايلانىسىمىز بارىنشا جوعارى دەڭگەيدە. وزبەكستان، تاجىكستان، تۇرىكمەنستان، يران، اۋعانستان سياقتى بىزبەن جاقىن ورنالاسقان مەملەكەتتەردە دە ءبىرشاما تىعىز وتىرعان اعايىندارىمىز بار. ال سول قازاقتار تۇرىپ جاتقان مەملەكەتتەردە ەلگە قايتۋ ماسەلەسى ءتۇرلى دەڭگەيدە شەشىمىن تاۋىپ جاتادى.
- بيىل استانادا وتەتىن دۇنيەءجۇزى قازاقتارىنىڭ V قۇرىلتايىن وتكىزۋگە قىزۋ دايىندىق ءجۇرىپ جاتقانى بەلگىلى. بۇل جولعى قۇرىلتايدىڭ ەرەكشەلىگىنە توقتالساڭىز؟
- نەگىزى، بەلگىلەنگەن جوسپار بويىنشا بەس جىلدا ءبىر وتەتىن قۇرىلتايدىڭ بەسىنشى كەزەگى بىلتىر ءوتۋى كەرەك ەدى. ءبىراق، بيىل ەلىمىزدە وتەتىن ۇلكەن شاراعا، ياعني ەكسپو-2017 كورمەسىنە بايلانىستى شەتەلدەن كەلەتىن قازاقتاردىڭ وسى حالىقارالىق شارانى كورسەك دەگەن نيەتىنە ساي، پرەزيدەنت اكىمشىلىگىمەن كەلىسىپ، ءبىر جىل كەيىنگە شەگەردىك. ال الداعى قۇرىلتايعا دايىندىق جۇمىستارىنا كەلەر بولساق، پرەزيدەنت اكىمشىلىگىنە قاتىستى جوبالاردى ۇسىنىپ، ولار جاقتان تالاپ- تىلەكتەرى مەن قولداۋلارى تۋرالى سويلەسىپ وتىرمىز. قاۋىمداستىق كولەمىندە وتكەن شارالاردان جانە الدىنعى ءتورت رەتكى قۇرىلتايدان بولسىن، ازدى- كوپتى تاجريبە جينادىق. سوعان سۇيەنە وتىرىپ، جاڭا مازمۇندار كىرىستىرىپ، قۇرىلتايدىڭ ورەسىن تىڭ دەڭگەيگە كوتەرگەلى وتىرمىز.
بۇل قۇرىلتايدىڭ باستى ەرەكشەلىگى - استاناداعى «ەكسپو-2017» كورمەسىمەن قاتار وتەتىنى. ياعني، شەتەلدەن كەلگەن قانداستارىمىز بەن قۇرىلتاي قوناقتارى ەكسپو كورمەسىن تاماشالاۋعا مۇمكىندىگى بار. تەك ەكسپو كورمەسى عانا ەمەس، كورمە اياسىندا جاسالىپ جاتقان شارالار بار. بۇل تۇرعىدا ءداستۇرلى ونەر كورمەسى، ۇلتتىق ويىندار، مەرەكەلىك كونتسەرتتەر، سونداي- اق تاعى دا باسقا تولىپ جاتقان شارالارعا بىردەي قاتىسا الادى. بۇنداي شارالار بىزگە قالىپتى كورىنسە دە، شەتەلدەگى قازاقتاردىڭ قازاقستانعا، قازاق ۇلتىنا دەگەن ىنتاسىن ارتتىراتىنى داۋسىز. اسىرەسە، ەتنو- اۋىل كورمەسىن كورۋگە مۇمكىندىگى بار. ءداستۇرلى كيىز ۇيلەرمەن قازاق ءداستۇرلى ونەرىن، مادەنيەتىن، تاريحىن زەرگەرلەر اۋىلى، ونەرپازدار اۋىلى، ىسمەرلەر اۋىلى ت. ب. اۋىلدار ەكسپو جانە قۇرىلتاي قوناقتارىنا ناسيحاتتايتىن بولادى. سوسىن قۇرىلتايدا اسىرەسە جاستارعا باسىمدىق بەرگەلى وتىرمىز. وسىدان بۇرىنعى قۇرىلتايلاردا قاتىسۋشىلاردىڭ كوبى جاسى ۇلكەن ەل اعالارى، اقساقالدار بولىپ كەلدى. بۇل جولى شەتەلدەگى جانە ەلدەگى قازاق جاستارىن كوبىرەك قاتىستىرامىز. بۇل دا بولسا الداعى قۇرىلتايدىڭ باستى ەرەكشەلىكتەرىنىڭ ءبىرى بولادى.
- جالپى، قۇرىلتايعا قانشا دەلەگات شاقىرىلدى؟
- دۇنيەءجۇزى قازاق قۇرىلتايىنا وكىل رەتىندە 35-36 ەلدەن، 350 گە جۋىق قانداستارىمىزدى شاقىردىق. ارينە، شەتەلدەگى قازاق دياسپورالارىنىڭ سانىنا بايلانىستى ءار ەلدەن كەلەتىن دەلەگاتتار سانى بىردەي بولمايدى. ەلدەگى قازاق دياسپوراسىنىڭ كوپتىگىنە بايلانىستى رەسەي، قىتاي، وزبەكستانداعى قانداستارىمىزدان كوبىرەك شاقىرۋعا تۋرا كەلەدى. سونىمەن قاتار حالىقارالىق ۇيىمدار جانە ۇلتى قازاق قانا ەمەس، كورشى باۋىرلاس حالىقتاردىڭ ۇلتتىق بىرلەستىكتەرىنەن دە ارناۋلى وكىلدەر شاقىرىلادى. ال ەلىمىزدىڭ كولەمىندە 14 وبلىس پەن استانا، الماتى قالالارىنان 5 ادامنان دەلەگاتسيا قاتىسادى. ولاردان تىس بۇكىل قازاققا ورتاق ادەبيەت پەن ونەر وكىلدەرى مىندەتتى تۇردە قۇرىلتاي قوناعى بولادى. قاۋىمداستىق ساياسي ۇيىم بولماعاننان كەيىن، قازاقستاندا تىركەلگەن پارتيالار مەن ءىرى قوعامدىق ۇيىمداردان دا ءبىر- ءبىر وكىل قاتىستىرامىز.
بۇگىنگى تاڭدا الەمنىڭ قىرىقتان استام ەلىندە قازاق بار دەسەك، سونىڭ 32 ەلىندە قازاق مادەنيەتى ورتالىعى اشىلعان. بۇل ورتالىقتاردىڭ باسقارۋشىلارىن شاقىرامىز جانە ولاردان جاستار قاناتى، ءىزباسارلارى بولسا، قۇرىلتايعا اكەلۋىن دە تالاپ ەتىپ وتىرمىز. شەتەلدەگى قازاق مادەني ورتالىقتارى ارقىلى كوپتەگەن ەلدەگى ءبىز بىلمەيتىن قازاق ابىرويىن كوتەرگەن ازاماتتارعا شاقىرتۋ جىبەردىك. شەتتە ءجۇرىپ بيىك بەلەستەرگە كوتەرىلگەن قازاق باۋىرلارىمىزدىڭ ءتىزىمىن جاساپ، جەكە- جەكە حابارلاسىپ شاقىرىپ وتىرمىز. ايتالىق، قازىرگى وزبەكستان پرەزيدەنتىنىڭ كەڭەسشىسى بولىپ وتىرعان قازاق باۋىرىمىز بار، رەسەيدە «گەروي» اتاعىن العان پولكوۆنيك باۋىرىمىز بار. مىنە وسىلارعا حابارلاستىق.
- قۇرىلتايعا قاتىسۋشىلار ءۇشىن استانادا قانداي شارالار ەسكەرىلگەن؟
- ارينە، مىندەتتى تۇردە باس قالامىز استانانىڭ كورىكتى جەرلەرىمەن تانىستىرۋ، باستىسى «ەكسپو-2017» حالىقارالىق كورمەسىنىڭ جۇمىسىمەن جانە باسقا دا جەتىستىكتەرمەن تانىستىرۋ جوسپارلانىپ وتىر. ايتالىق، باعدارلاما بويىنشا 22 - ماۋسىم كۇنى تۇسكە دەيىن قوناقتارعا استانانى كورسەتەمىز. ەكسپو- عا بايلانىستى ۇلكەن ەتنواۋىل بوي كوتەرگەنىن بىلەسىزدەر. ول ءۇش اي بويى جۇمىس ىستەيدى. سول جەردەن قازاقتىڭ بۇكىل تىنىس- تىرشىلىگىن، ۇلتتىق بايلىعىن تاماشالاۋعا مۇمكىندىك بولادى. كەشكىلىك استانا وپەرا تەاترىنا «قىز جىبەك» وپەراسىنىڭ جاڭا قويىلىمىنا بارامىز.
ەكىنشى كۇنى ن. نازاربايەۆ ۋنيۆەرسيتەتىندە پرەزيدەنتتىڭ قاتىسۋىمەن پلەنارلىق وتىرىس وتەدى. ونداعى ماقسات - نازاربايەۆ ۋنيۆەرسيتەتىن كورسەتۋ. ال ودان كەيىن بۇكىل قوناقتارىمىزدى ەكسپو كەشەنىن تاماشالاۋعا شاقىرامىز. قۇرىلتاي شەڭبەرىندە وتەتىن سەكسيالىق وتىرىستار بىرنەشە مينيسترلىكتەردىڭ عيماراتىندا وتەتىندىكتەن، استاناداعى مينيسترلىكتەر ءۇيىن قوناقتارىمىزعا كورسەتە الامىز، ءارى سول جەردە كەلەلى كەڭەس قۇرۋعا مۇمكىندىك جاسايمىز. جالپى، شەتەلدەن كەلگەن قۇرىلتاي قوناقتارىنا قازاقستاننىڭ بارشا جەتىستىكتەرى مەن تابىستارىن كورسەتۋ، بۇكىل تاريحي، مادەني قۇندىلىقتارىمىزدى تانىستىرۋ ۇلكەن مارتەبە.
- اڭگىمەڭىزگە راحمەت!
اۆتور: رۋسلان عابباسوۆ
