ەكسپو: فرانسيا پاۆيلونى ولجاس سۇلەيمەنوۆپەن كەزدەسۋ وتكىزدى
شاراعا قازاقستانداعى فرانسيا ەلشىلىگىنىڭ قىزمەتكەرلەرى، ەكسپو كورمەسىنىڭ ەرىكتىلەرى جانە اقىننىڭ وقىرماندارى جينالدى. كەزدەسۋ الدىندا ولجاس سۇلەيمەنوۆ جەتى زالدان تۇراتىن فرانسيا پاۆيلونىن ارالاپ كوردى جانە كورمە تۋرالى ءوز پىكىرىن ءبىلدىردى.
- ەكسپو-2017 كورمەسىمەن تانىسۋدى فرانسيا پاۆيلونىنان باستاعانىما قۋانىشتىمىن، - دەدى ولجاس ومار ۇلى.
- بۇل مەنىڭ پاريجدە ۇزاق جىلدار بويى قىزمەت ەتكەنىم ءۇشىن ەمەس، بالا كەزىمنەن وسى ەلدىڭ مادەنيەتى جانىما جاقىن. فرانسيا پاۆيلونىندا الەمنىڭ دامۋىنا ىقپال ەتكەن ۇلى تۇلعالارعا ارنالعان بولمەلەردى كوردىم. ولاردىڭ اراسىندا تۇتاس ادامزاتتى ءوزىنىڭ جاڭالىعىمەن قۇتقارىپ قالعان لۋي پاستەر بار.
بەتون زالىن تاماشالاپ، قاراپايىم ءارى عاجايىپ جاڭالىقتارعا كۋا بولدىم. ەندى، بەتون مەنىڭ تۇسىنىگىمدە بولاشاقتىڭ ماتەريالىنا اينالدى. يتەر جوباسى ورنالاسقان زال دا ەرەكشە اتاپ وتۋگە تۇرارلىق. يتەر كومپانياسىندا فرانسيانىڭ، شىعىستىڭ جانە باتىستىڭ عالىمدارى كۇن ەنەرگياسىن ءوندىرىپ جاتىر»، - دەپ اتاپ ءوتتى قوعام قايراتكەرى.
سونىمەن بىرگە، قوعام قايراتكەرى جاڭارتىلاتىن ەنەرگيا كوزدەرىنىڭ ماڭىزدىلىعىنا باسا نازار اۋدارىپ، نيەۆادا-سەمەي قوزعالىسىنىڭ جۇمىسىن ەسكە سالدى. «كۇن - نەگىزگى ەنەرگيا جەتكىزۋشى جانە كۇن ەنەرگياسىن بارشاعا قولجەتىمدى ەتكەندە عانا، وزگە ەنەرگيا كوزدەرىنە قاجەتتىلىك جوعالادى جانە ادامزات بولاشاقتىڭ ەنەرگياسى ماسەلەسىن شەشۋدە تۇبەگەيلى جەڭىسكە جەتەدى.
سوندا عانا كومىر، گاز، مۇناي ارقىلى وندىرىلەتىن جىلۋ ەنەرگياسىنان ارىلامىز. سوندا عانا قازاقستانداعى اتوم ەلەكتر ستانسالارىنىڭ پايدا بولۋى قاۋپىنەن ارىلامىز. بۇل، اسىرەسە، اتوم ەنەرگياسى ەڭ ارزان دەگەن جەلەۋمەن جاسالعان بارلىق جوبالاردى توقتاتىپ، جىلدار بويى كۇرەس جۇرگىزىپ كەلە جاتقان نيەۆادا-سەمەي قوزعالىسى ءۇشىن اسا ماڭىزدى.
قازاقستان ۋران وندىرۋدەن الەم بويىنشا 2-3- ورىندا تۇر. ءيا، ەلىمىز ۋرانعا باي، ءبىراق، ولاردى اتوم ەلەكتر ستانسالارىندا جاعا بەرمەيمىز. بۇل، ارينە، نيەۆادا-سەمەي قوزعالىسىنىڭ بەلسەندىلىگىنىڭ ارقاسى»، - دەدى ولجاس ومار ۇلى.
كەزدەسۋ بارىسىندا ولجاس سۇلەيمەنوۆ يۋنەسكونىڭ جۇمىسى، ەكولوگيالىق ماسەلەلەر جانە تابيعاتتى قورعاۋ تۋرالى اڭگىمەلەدى جانە 1973-جىلى سەمەي يادرولىق پوليگونىنا قارسىلىق رەتىندە جازعان «ديكوە پولە» ولەڭىن وقىپ بەردى.
الەمدەگى ايتۋلى وقيعاعا اينالعان ەكسپو-2017 كورمەسىنىڭ جۇمىسىنا ساتتىلىك تىلەپ، «كورمە قازاقستانعا عانا ەمەس، ماڭگىلىك ەنەرگيا ىزدەگەن بۇكىل ادامزاتقا ۇلكەن تابىستار اكەلسىن» دەگەن لەبىزىن ءبىلدىردى.
اۆتور: ايجان سەرىكجان قىزى
