ۋكراينا ەكسپو- عا قانداي جاڭالىق اكەلدى - فوتو
دەپ حابارلايدى قازاقپارات ءتىلشىسى.
جىبەك جولى پاۆيلونىندا ورنالاسقان ۋكراينا ەكسپوزيتسياسىنىڭ اۋماعى 35 شارشى مەتردى قۇرايدى. سەكسيانىڭ شاعىن ەكەنىنە قاراماستان، ۇيىمداستىرۋشىلار وندا ەنەرگەتيكاعا قاتىستى ءبىرقاتار ونەرتابىستارىن قويۋعا تىرىسقان. ماسەلەن، ۋكراينا سەكسياسىنىڭ وكىلدەرى كورمەگە سۋ مەن عيماراتتاردى جىلىتۋعا ارنالعان كۇن اگرەگاتى، جەل گەنەراتورى جانە جارىقتان ەنەرگيا وندىرەتىن جاليۋزي اكەلدى.
ەكسپوزيتسيا تورىنە سۋ مەن عيماراتتاردى جىلىتۋعا ارنالعان اگرەگات قويىلعان. كۇن ەنەرگياسىن جينايتىن پلاستينالاردىڭ كومەگىمەن كۇن ساۋلەلەرى ورتالىققا جينالادى. وندا شىنى تۇتىكشە تۇرىندەگى ۆاكۋۋم ورنالاسقان. ۆاكۋۋم سەلسي ولشەمىمەن 900 گرادۋسقا دەيىن قىزادى، وسى ارقىلى ەدەندى، باسسەيندى نەمەسە كىشىگىرىم ۇيلەردى جىلىتۋعا بولادى. ۇيىمداستىرۋشىلاردىڭ ايتۋىنشا، قۇرىلعىنىڭ 4 كۆت بولاتىن قۋاتتىلىعى ۇلكەن ۇيلەردى جىلىتا المايدى. دەسە دە، كۇنىنە 1000 ليتر سۋدى جىلىتۋعا قاۋقارى جەتەدى. اپپاراتتىڭ بىرەگەيلىگى سول، كۇننىڭ ورنالاسقان جەرىن ءوزى انىقتايدى جانە كۇنباعىس سەكىلدى پلاستينالارىن كۇنگە قاراي بۇرادى.
ۋكراينالىق وندىرۋشىلەردىڭ پاتەنتتەلگەن تاعى ءبىر تەحنولوگياسى - ۋلترادىبىستى شىعىن ولشەۋىش دەپ اتالادى. ونى گاز، مۇناي جانە سۋ قۇبىرلارىنداعى قىسىمدى ولشەۋ ءۇشىن پايدالانادى. ۇيىمداستىرۋشىلاردىڭ ايتۋىنشا، اپپارات تەتىكتەرىندەگى ۋلترادىبىستىڭ كومەگىمەن قۇبىردى اشپاي- اق ونىڭ ىشىندەگىسىن، كولەمىن جانە قىسىمىن بىلۋگە بولادى. اپپارات ىڭعايلى ىقشام شاباداندا ورنالاسقان جانە ونىڭ قۋاتى 8 ساعاتقا دەيىن جەتەدى.
ۋكراينا سەكسياسىنىڭ ءۇشىنشى جاڭالىعى - كۇن ساۋلەلەرىنەن ەنەرگيا وندىرەتىن جاليۋزي. كۇندىزگى ۋاقىتتا كۇننەن قۋات جينايتىن بۇل پەردەشە كەشكى ۋاقىتتا بولمە شامىنىڭ جارىعىنان دا ەنەرگيا وندىرەدى. جينالعان ەنەرگيانى كىشىگىرىم تۇرمىستىق تەحنيكالارعا قولدانۋعا بولادى. اتاپ ايتقاندا، تەلەفون مەن نوۋتبۋكتى قۋاتتاۋعا، تەلەديداردى قوسۋعا بولادى.
ەسكە سالا كەتسەك، بۇگىن ەكسپو كورمەسىندە ۋكراينانىڭ ۇلتتىق كۇنى اتالىپ ءوتتى. ۋكراينالىق شەبەرلەر ەكسپو- نىڭ قۇرمەتىنە استاناعا ۇلتتىق ويۋ- ورنەكتەر سالىنعان 30 مەترلىك سۇلگى اكەلدى. ونى گيننەستىڭ رەكوردتار كىتابىنا ەنگىزۋ كوزدەلگەن.
اۆتور: ايجان سەرىكجان قىزى
