اسەت يسەكەشەۆ استاناعا گاز تارتۋدىڭ ءمان-جايىن ايتتى

استانا. قازاقپارات - استانا اكىمى اسەت يسەكەشەۆ ەلورداعا گاز تارتۋ مەرزىمى تۋرالى ايتتى، دەپ حابارلايدى قازاقپارات.

«ءبىز استاناعا گاز تارتۋ بويىنشا شەشىم قابىلداۋعا جاقىنداپ قالدىق. وسى باعىتتا كوپتەگەن ەكونوميكالىق، ونىڭ ىشىندە لوگيستيكالىق ماسەلەلەر پىسىقتالدى. تاياۋدا ءتيىستى شەشىم قابىلدانادى جانە وسى تۇرعىدا وڭتايلى ناتيجە بولادى دەگەن ۇمىتتەمىز. قازىرگى كەزدە بىرنەشە نۇسقالار قاراستىرىلىپ جاتىر. ماۋسىم-شىلدەدە بۇل ماسەلە بويىنشا كەڭەس وتكىزىلەدى دەپ كۇتۋدەمىز»، - دەدى يسەكەشەۆ استانا ەكونوميكالىق فورۋمى اياسىنداعى سەسسيا جۇمىسىندا.

بۇدان بولەك اكىم بۇگىندە قوعامدىق كولىكتەر مەن اۆتوموبيلدەردى گازعا اۋىستىرۋ جوبالارى باستالعانىن، قالادا گازبەن قايتا جابدىقتاۋ ستانساسى سالىنعانىن اتاپ ءوتتى.

«نازاربايەۆ ۋنيۆەرسيتەتى» گاز ەسەبىنەن جىلىتۋ جۇيەسىنە كوشەدى.

ايتا كەتەيىك، بۇگىن باستالعان استانا ەكونوميكالىق فورۋمىنا 100 ەلدەن 4 مىڭ دەلەگات قاتىسۋدا. ولاردىڭ اراسىندا ساياساتكەرلەر، ەكونوميستەر، قارجىلىق ينستيتۋتتار مەن حالىقارالىق ۇيىمداردىڭ وكىلدەرى بار.