قىتايمەن ارادا ساۋدا كەدەرگىلەرى جوق - ق ر ۇكىمەت باسشىسى

استانا. قازاقپارات - قازاقستان قىتايمەن ساۋدا-ساتتىقتا اراداعى بارلىق كەدەرگىلەردى الىپ تاستادى.

بۇل تۋرالى بۇگىن استانا ەكونوميكالىق فورۋمى اياسىنداعى يننوۆاتسيالىق سامميت بارىسىندا ق ر پرەمەر-ءمينيسترى باقىتجان ساعىنتايەۆ ءمالىم ەتتى، دەپ حابارلايدى قازاقپارات.

«ارينە، قىتاي نارىعىنا بىردەن شىعا سالۋعا بولمايدى. وسى ورايدا اتالعان ەلمەن ءىرى قارا مال ەتىنەن باسقا اۋىل شارۋاشىلىعىنىڭ بارلىق نەگىزگى تۇرلەرى بويىنشا ۋاعدالاستىققا قول جەتكىزدىك. اتاپ ايتقاندا، قازىرگى كەزدە بارشا ساۋدا كەدەرگىلەرىن جويىپ، ءتيىستى كەلىسىمگە قول قويدىق. ءبىز قىتايعا ستاندارتتارعا سايكەس كەلەتىن ونىممەن شىعاتىن بولامىز. وسى ورايدا قىتايلىق ستاندارپەن ءوندىرۋ ءۇشىن تەحنولوگيالار ترانسفەرتى قاجەت»، - دەپ اتاپ ءوتتى باقىتجان ساعىنتايەۆ.

ايتا كەتەيىك، بۇگىن باستالعان استانا ەكونوميكالىق فورۋمىنا 100 ەلدەن 4 مىڭ دەلەگات قاتىسۋدا. ولاردىڭ اراسىندا ساياساتكەرلەر، ەكونوميستەر، قارجىلىق ۇيىمدار مەن حالىقارالىق ۇيىمداردىڭ وكىلدەرى بار.

اۆتور: رۋسلان عابباسوۆ