قازاقستانعا العاش رەت رەسمي ساپارمەن شۆەتسيا كورولدىگى پارلامەنتىنىڭ ءتوراعاسى كەلدى
پالاتا سپيكەرى اتاپ وتكەندەي بۇل ەكىجاقتى پارلامەنتارالىق قارىم- قاتىناس ءۇشىن وتە ماڭىزدى جانە ول ەكى مەملەكەتتىڭ جاڭا دەڭگەيدەگى ءوزارا ىنتىماقتاستىعىن ودان ءارى تەرەڭدەتۋگە دەگەن ىنتالىلىعىن بىلدىرەدى. ءماجىلىس ءتوراعاسى اتالعان مەملەكەت قازاقستاننىڭ سولتۇستىك ەۋروپاداعى ماڭىزدى ارىپتەسى ەكەنىن العا تارتا كەلىپ، ديپلوماتيلىق قاتىناس ورناعان 25 جىل ىشىندەگى جەتىستىكتەرگە توقتالدى. « وسى ۋاقىت ىشىندە ەلدەر اراسىندا سىندارلى بايلانىس ورنادى. ەكى ەل اراسىنداعى تاۋار اينالىمى وتكەن جىلى 310 ميلليون دوللاردان استى. ءبىزدىڭ ەلىمىزدە شۆەدتىك كاپيتالدىڭ قاتىسۋىمەن جۇمىس ىستەيتىن 50 كاسىپورىن بار» ، - دەدى ول.
تاراپتاردىڭ پىكىرىنشە، قازاقستان مەن شۆەتسيا اراسىندا ەكونوميكالىق ارىپتەستىكتى ودان ءارى كۇشەيتۋدىڭ الەۋەتى زور. اسىرەسە، اۋىلشارۋاشىلىعى، عارىشتىق ونەركاسىپ، ەنەرگەتيكا، فارماتسيەۆتيكالىق ءوندىرىس، ءبىلىم، تاۋ- كەن، تۇرعىن ءۇي سالالارى باسىم باعىتتاردىڭ ءبىرى. ال، عالامدىق ماسەلەلەر توڭىرەگىندە ءماجىلىس سپيكەرى قازاقستاننىڭ يادرولىق قارۋسىزدانۋ جانە ونى تاراتپاۋ جولىنداعى باستامالارىنا ايرىقشا نازار اۋدارىپ، ەل پرەزيدەنتى ن. ءا. نازاربايەۆتىڭ ادامزاتتى يادرولىق قارۋدان ازات الەم قۇرۋعا ۇندەپ كەلە جاتقان شەشىمدەرى مەن باتىل قادامدارىنا توقتالدى. وسى رەتتە الەمدىك قاتەرگە اينالعان تەرروريزم مەن لاڭكەستىك ماسەلەسى دە نازاردان تىس قالمادى. ءوز كەزەگىندە مارتەبەلى مەيمان قازاق ەلىنىڭ قوناقجايلىعى ءۇشىن شەكسىز العىسىن جەتكىزە كەلىپ، قازاقستان پرەزيدەنتىنىڭ ماڭىزدى ستراتەگيالىق باستامالارى، سونىڭ ىشىندە، يادرولىق قارۋدى تاراتپاۋ جونىندەگى ناقتى ءىس- قيمىلى شۆەتسيا تاراپىنان زور قولداۋعا ءارى قۇرمەتكە لايىق ەكەنىن اتاپ ءوتتى. ودان ءارى تاراپتار پارلامەنتارالىق ارىپتەستىكتى نىعايتۋدىڭ وزەكتى ماسەلەلەرىن تالقىلادى. بۇل ورايدا بەيىندى كوميتەتتەر اراسىنداعى بايلانىستى كۇشەيتىپ، زاڭ شىعارۋ جۇمىسىندا ەتەنە تاجىريبە الماسۋدىڭ ماڭىزى وتە زور. ءماجىلىس سپيكەرى شۆەتسيا كورولدىگى پارلامەنتى ءتوراعاسىنىڭ العاشقى رەسمي ساپارى ەلىمىزدە وتە ماڭىزدى كەزەڭ - بۇكىل الەمدىك ەكسپو كورمەسى اياسىندا وتكىزىلىپ جاتقانىن اتاپ وتسە، ۋربان الين قازاقستاندا بۇل كورمەنىڭ وتە تابىستى وتەتىنىنە سەنىم ءبىلدىردى.
