ماسكۇنەمدەردى ماجبۇرلەپ ەمدەۋ ءۇشىن قوسىمشا مەكەمەلەر قاجەت - قالمۇحانبەت قاسىموۆ

 استانا. قازاقپارات - ماسكۇنەمدەردى ماجبۇرلەپ ەمدەۋ ءۇشىن قوسىمشا مەكەمەلەر قاجەت. بۇل تۋرالى بۇگىن حالىقپەن ەسەپتىك كەزدەسۋ وتكىزگەن ق ر ىشكى ىستەر ءمينيسترى قالمۇحانبەت قاسىموۆ ءمالىم ەتتى، دەپ حابارلايدى قازاقپارات.

 ءمينيستردىڭ ايتۋىنشا، ەلىمىزدە ءاربىر 7- قىلمىس، ياعني كىسى ءولتىرۋ ارەكەتتەرىنىڭ جارتىسىنا جۋىعى جانە وتباسىلىق- تۇرمىستىق زومبىلىقتاردىڭ 60 پايىزى الكوگولدىڭ كەسىرىنەن جاسالادى. ماسەلەن، وتكەن جىلدىڭ وزىندە عانا قوعامدىق ورىنداردا ماس كۇيدە جۇرگەن 193 مىڭ ادام ۇستالعان.

 «قازىرگى ۋاقىتتا پوليتسيانىڭ ءجىتى باقىلاۋىندا 72 مىڭ ماسكۇنەم بار. ونىڭ 10 مىڭنان استامى ايەلدەر جانە 300- ءى كامەلەتكە تولماعاندار. بۇگىندە ەلىمىزدە دەنساۋلىق ساقتاۋ مينيسترلىگىنىڭ قاراماعىندا ۋاقىتشا بەيىمدەۋ جانە دەتوكسيكاتسيا ورتالىعى دەپ اتالاتىن 615 ورىنعا ارنالعان نە ءبارى 31 مەديتسينالىق ايىقتىرعىش جۇمىس ىستەيدى. بۇل مۇلدەم جەتكىلىكسىز. ەلىمىزدەگى ولاردىڭ جەلىسىن جەرگىلىكتى اتقارۋشى ورگانداردىڭ قولداۋىمەن كەڭەيتىلۋى ءتيىس دەپ سانايمىن. ماس كۇيدە ۇستالعان تۇلعانى نە ىستەۋىمىز كەرەك؟ اۋرۋحانالار قابىلدامايدى، پوليتسيا ولاردى وزدەرىنىڭ ارنايى مەكەمەلەرىنە قاماۋىنا ەش نەگىز جوق»، - دەپ اتاپ ءوتتى قاسىموۆ.

سونىمەن قاتار مينيستر الكوگوليزمگە شالدىققانداردى ماجبۇرلەپ ەمدەيتىن ناركولوگيالىق ۇيىمدار سانىنىڭ دا از ەكەندىگىن ايتتى. بۇگىندە ەلىمىزدە 2470 ورىنعا ارنالعان 22 ۇيىم بار. تاعى 4 قوسىمشا ورتالىق قاجەت.

«وتكەن جىلى سوت شەشىمىمەن بۇل ۇيىمدارعا 5300 ادام جىبەرىلدى. الايدا ورىننىڭ جوقتىعى سالدارىنان 1 مىڭنان استام ادام ماجبۇرلەپ ەمدەۋدەن وتكەن جوق»، - دەدى ىشكى ىستەر ءمينيسترى.

 اۆتور: مارلان جيەمباي