كەيكى باتىر كەسەنەسىنىڭ قۇرىلىسى باستالدى
قازاقپارات بۇعان دەيىن حابارلاعانداي، مەملەكەتتىك كوميسسيا كەيكى باتىردىڭ سۇيەگىن ونىڭ تۋعان جەرى - قوستاناي وبلىسى امانگەلدى اۋدانىنىڭ تاستى اۋىلىندا جەرلەۋ تۋرالى شەشىم قابىلدادى.
سانكت-پەتەربور قالاسىنداعى كۋنستكامەرادا 93 جىل بويى ساقتالىپ كەلگەن كەيكى باتىردىڭ باس سۇيەگى ەلىمىزگە وتكەن جىلى قايتارىلعان بولاتىن. ول قازان ايىنىڭ باسىندا استاناعا جەتكىزىلدى.
كەيىن د ن ك ساراپتاما جۇرگىزۋ جانە قالپىنا كەلتىرۋ ءۇشىن ماجارستانعا جىبەرىلىپ، ۆەنگريا مۋزەيىنىڭ باس ديرەكتورى زولتان كورشوشقا تاپسىرىلدى.
ايتا كەتەيىك، اتالمىش مۋزەي وسىعان دەيىن 70 رەت ادامنىڭ باس سۇيەگىن قالپىنا كەلتىرۋ جۇمىستارىن جۇرگىزگەن. سونىڭ ىشىندە ءابىلحايىر حاننىڭ دا باس سۇيەگىن قالپىنا كەلتىرگەن. ەكى ايدان كەيىن قوعام قايراتكەرى، ساياساتتانۋشى بەرىك ءابدىعالي ۇلى ماجارلىق عالىمداردىڭ ەڭبەك ناتيجەلەرىن ايتىپ، كەيكى باتىردىڭ باس سۇيەگىنىڭ قالپىنا كەلتىرىلگەن سۋرەتىن جاريالادى.
ق ر مادەنيەت جانە سپورت مينيسترلىگىندە وتكەن باسپا ءسوز ءماسليحاتىندا ق ر مەملەكەتتىك ورتالىق مۋزەيىنىڭ ديرەكتورى نۇرسان ءالىمباي كەيكى باتىردىڭ باس سۇيەگىنىڭ قاتتى زاقىمدانۋى سالدارىنان زەرتتەۋ جۇمىستارى قيىنعا سوققانىن ءمالىم ەتتى.
«باتىردىڭ باس سۇيەگى قاتتى زاقىمدانۋى سالدارىنان ءمۇسىندى جاساۋ قيىنعا ءتۇستى. انتروپولوگتاردىڭ ايتۋى بويىنشا، سوققى جەتى جەردەن تيگەن ەكەن، وسى رەتتە سول جاق بولىگى مەن شۇيدەسى وپىرىلىپ قالعان. سونىمەن قاتار الدىڭعى تىستەرى تۇگەل تالقاندالعان. مۇرىن سۇيەگىنە دە قاتتى زاقىم كەلگەن. ونىڭ پلاستيكالىق انتروپولوگيالىق كەلبەتىن جاساۋ كەزىندە قيىندىق تۋاتىنى ءسوزسىز. ءبىراق، قازىرگى تەحنولوگيالار باس سۇيەكتى قالپىنا كەلتىرۋگە قاۋقارلى»، - دەگەن بولاتىن ءالىمباي.
عالىمنىڭ سوزىنە قاراعاندا، ماجار ماماندارى ەكى اي بويى وزدەرىنىڭ جۇمىستارىن ىسىرىپ قويىپ، ەلىمىزدىڭ ءوتىنىشى بويىنشا باتىردىڭ باس سۇيەگىمەن اينالىستى. «قوستاناي تاڭى» وبلىستىق گازەتىنىڭ (اۆتورى - گۇلبارشىن سمايلوۆا) جازۋىنشا، كەيكى باتىردىڭ كەسەنەسى دەمەۋشىلەردىڭ قارجىسىنا تاستى اۋىلىنىڭ قىرىنداعى، جالداما-ارقالىق تاس جولىنىڭ ماڭىنان سالىنا باستادى.
بۇگىندە ونىڭ ىرگەتاسى قۇيىلىپ قويىلدى.
