باياناۋىل ۇلتتىق پاركىندەگى جاڭا اەرودرومعا العاشقى ۇشاق قوندى

استانا. قازاقپارات - باياناۋىل ۇلتتىق پاركىندە سالىنىپ جاتقان جاڭا اەرودروم سىناقتان ءوتتى.

ساراپشىلاردىڭ ايتۋىنشا، ۇشۋ الاڭى كەز كەلگەن جەڭىل اۆياتسيانى قابىلداي الادى، دەپ حابارلايدى 24.kz.

ەكى كىسىلىك FK14 Polaris اۋە كەمەسىنىڭ كومانديرى ۆالەري سيباگاتۋلين: «ۇشۋ الاڭىنىڭ ساپاسى جامان ەمەس»، - دەگەن باعا بەردى.

«الاڭعا ەكى، ءۇش، ءتورت جانە التى ورىندىق جەڭىل ۇشاقتار ۇشىپ-قونا الادى»، - دەيدى قاراعاندى اۆياتسيالىق وقۋ-جاتتىعۋ ورتالىعىنىڭ ەمتيحان قابىلداۋشىسى جانە تاجىريبەلى پيلوت، نۇسقاۋشى ۆالەري سيباگاتۋلين.

ول ءوزى ەڭبەك ەتىپ جاتقان ورتالىق باياناۋىلعا ۇشاتىن شاعىن ۇشاقتاردى باسقارۋعا ماماندار دايىنداۋعا ءازىر ەكەنىن دە جەتكىزدى. اەرودروم تولىق سالىنىپ بىتكەن جوق. قازىر اباتتاندىرۋ جۇمىستارى ءجۇرىپ جاتىر. اعىمداعى جىلدىڭ شىلدە ايىندا قولدانىسقا بەرىلمەك. استانا، قاراعاندى، پاۆلوداردان اۋە قاتىناسى اشىلادى دەپ جوسپارلانىپ وتىر.