اقتوبەدە ديماشتىڭ قىتايلىق جانكۇيەرلەرىنە ارنالعان تۋريستىك مارشرۋت جاسالۋدا
بۇل جايلى «اقتوبە اقپارات» ورتالىعىنداعى باسپا ءسوز ءماسليحاتىندا سىرتقى بايلانىستار جانە تۋريزم وبلىستىق باسقارماسىنىڭ باسشىسى ەرمەك كەنجەحان ۇلى حابارلادى.
27 - ماۋسىم كۇنى استانادا قىتايداعى ءان بايقاۋىنا قاتىسىپ، ەسىمى كەڭىنەن تانىلعان ديماش قۇدايبەرگەننىڭ شىعارماشىلىق كەشى جوسپارلانعان. اسپان استى ەلىنىڭ جانكۇيەرلەرى كونسەرتكە كەلىپ قانا قويماي، ديماشتىڭ تۋعان ولكەسىمەن، ونىڭ ۇيىمەن جانە وتباسىمەن تانىسقىسى كەلەدى. وسىعان بايلانىستى تۋريستىك كومپانيالار ارنايى مارشرۋت ۇيىمداستىرادى.
ەسكە سالايىق، سىرتقى بايلانىس جانە تۋريزم وبلىستىق باسقارماسىنىڭ باسشىسى ەرمەك كەنجەحان ۇلى قازاقپارات تىلشىسىنە بەرگەن سۇحباتىندا وڭىرگە الدىن- الا ەسەپ بويىنشا، 2 مىڭنان استام قىتايلىق كەلىپ، ءانشىنىڭ تۋعان جەرىمەن تانىساتىندىعىن ايتقان بولاتىن. تۋريستەر ديماشتىڭ وتباسىمەن دە كەزدەسۋ مۇمكىندىگىن الادى.
«اتا- اناسىمەن، وتباسىمەن كەزدەسۋ بولادى. مىندەتتى تۇردە قانات- سۆەتا ايتبايەۆتاردىڭ ويىن ءبىلىپ، بۇل شارۋانى بىرلەسە اتقارامىز. سەبەبى، ديماشتى ولاردان ارتىق ەشكىم بىلمەيدى»، - دەپ اتاپ ءوتتى باسقارما باسشىسى.
شەتەلدىكتەردى ءانشىنىڭ تۋعان جەرىمەن، وتباسىمەن تانىستىرۋ ءۇشىن ارنايى گيدتەر دە دايىندالىپ جاتىر.
«قازىر 2-3 گيد دايىن. ولار قىتاي ءتىلىن بىلەدى. بىزگە استانادان دا حابارلاستى. جينالىس كەزىندە ايتىلعان اقپاراتتان سوڭ «قىتاي ءتىلىن بىلەمىز، كومەك كەرەك بولسا كەلۋگە دايىنبىز» دەگەن ادامدار بولدى»، - دەدى ەرمەك كەنجەحان ۇلى.
