گرۋزيا پرەزيدەنتى مارگۆەلاشۆيلي: قازاقستاننىڭ قولداۋى ءۇشىن العىس ايتامىز

استانا. قازاقپارات - بۇگىن قازاقستانعا گرۋزيا پرەزيدەنتى گەورگي مارگۆەلاشۆيلي كەلدى.

مارتەبەلى مەيماندى مەملەكەت باسشىسى نۇرسۇلتان نازاربايەۆ اقوردادا قارسى الدى، دەپ حابارلايدى قازاقپارات ءتىلشىسى.

«قازاقستان سياقتى ەلدى كورۋ كوپتەن كۇتكەن ارمان-نيەتىم ەدى. سەبەبى سىزدەر تۋرالى كوپ ەستىدىم. ماعان وسى جەردەگى ادامدار، وسى ەلدىڭ دامۋ ديناميكاسى تۋرالى كوپ ايتتى. قازىر مەن ءسىز جانە ءسىزدىڭ حالقىڭىز قانداي جۇمىستى اتقارعانىن، قيىن جىلدارعا قاراماستان نەندەي جەتىستىكتەرگە جەتكەنىڭىزدى ءوز كوزىممەن كورىپ وتىرمىن. ءبىز سىزدەردىڭ قولداۋلارىڭىزعا شىن جۇرەكتەن ريزامىز. گرۋزيا حالقى ونى ايقىن سەزىنىپ وتىر ءارى جوعارى باعالايدى. ۇزاق ۋاقىت بويى بىزگە قولداۋ كورسەتىپ جاتقانىڭىز ءۇشىن مىڭ العىس»، - دەدى گرۋزيا باسشىسى شاعىن قۇرامدا وتكەن كەزدەسۋ كەزىندە.

نۇرسۇلتان نازاربايەۆ ءوز كەزەگىندە قازاقستاننىڭ گرۋزيا ەكونوميكاسىنا قارجى سالىپ جاتقان ءىرى ينۆەستور ەكەنىن ەسكە سالىپ، اتالعان ەكونوميكالىق شارالاردىڭ ءالى دە جالعاساتىنىن جەتكىزدى.

«استانادا ەكسپو-2017 كورمەسىنىڭ اشىلعانىن جاقسى بىلەسىزدەر. گرۋزيا پاۆيلونى دا اشىلدى. ءبىز جاڭا قالانىڭ تاعى ءبىر جاڭا اۋدانىن سالىپ شىقتىق. ونى دا كورەسىزدەر. قازاقستان مەن گرۋزيا اراسىنداعى بايلانىستار بۇرىننان جاقسى دامىپ كەلەدى. العاشقى جىلدارى كوپ قولداۋ كورسەتتىك. سودان بەرى ءبىز گرۋزيا ەكونوميكاسىنداعى ءىرى ينۆەستوردىڭ ءبىرى بولىپ كەلەمىز. وسى بايلانىستاردى ارى قاراي دامىتۋعا كەدەرگى بولاتىن ەشقانداي سەبەپتەردى كورىپ تۇرعان جوقپىن»، - دەپ اتاپ كورسەتتى نۇرسۇلتان نازاربايەۆ.

اۆتور: ارمان اسقاروۆ