اقتوبەلىك كاسىپكەر جەتىم وسكەن جالعىزباستى اناعا پاتەر سىيلادى

استانا. قازاقپارات - اقتوبەلىك كاسىپكەر شاميل كاسپرانوۆ بالالار ءۇيىنىڭ تاربيەلەنۋشىسى يرينا كۋدريناعا باسپانا تارتۋ ەتتى، دەپ حابارلايدى قازاقپارات.

يرينا كۋدرينا 5 جاسىنان باستاپ «العا» بالالار ۇيىندە تاربيەلەنگەن. يرينا اتا-اناسىنىڭ كىم ەكەنىن بىلمەيدى. بالالار ۇيىندە ءجۇرىپ قازاق ءتىلىن مەڭگەرگەن. قازىر ورىس، قازاق تىلدەرىندە ەركىن سويلەيدى.

بالالار ءۇيىنىڭ تۇلەگى يرينا اقتوبەدە ۋنيۆەرسيتەتكە ءتۇسىپ، تاريح فاكۋلتەتىندە وقىعان. قازىر 3 جاستاعى قىزىن جالعىز ءوزى تاربيەلەپ وتىر. 7 جىلدان بەرى پاتەر كەزەگىندە تۇر.

يرينا وزىنە ءۇي سىيلاعان كاسىپكەردى وعان دەيىن تانىماعان. «مەيىرىم» الەۋمەتتىك ءۇيىنىڭ اشىلۋىنا يرينانى ارنايى شاقىرىپ، سول جەردە پاتەر كىلتىن تابىستادى. كۇتپەگەن جەردەن باسپانالى بولعان انانىڭ قۋانىشىندا شەك جوق.

«العا» بالالار ءۇيىنىڭ ديرەكتورى كەنجەعازى بايعازينگە، جاس وسپىرىمدەر ءۇيىنىڭ ديرەكتورى جاننا دۇيسەنبيناعا العىس ايتامىن. ول ادامدار ءبىزدى تاربيەلەدى، قيىن كەزدە اقىل-كەڭەستەرىن بەردى، جانىمىزعا جۇبانىش بولدى. مەن تۋرالى ءتۇرلى وي ايتىپ، پاتەر العانىم ءۇشىن جازعىرىپ، ۇرىسىپ جاتىر. ءبىراق ولار جەتىم بولۋدىڭ، اتا-اناسىز ءومىر ءسۇرۋدىڭ، ءار كۇنى كۇرەسۋدىڭ، مويىماي العا ۇمتىلۋدىڭ نە ەكەنىن بىلمەيتىن ادامدار دەپ ويلايمىن. مەنى ەشكىم كىنالاپ، جازعىرماسا ەكەن. شاميل كاسپرانوۆ ەكى ادامدى باسپانالى ەتتى. مەن جانە مەنىڭ بالام باقىتتىمىز»، - دەدى ول.