مەملەكەت باسشىسى تاتارستان رەسپۋبليكاسىنىڭ پرەزيدەنتىمەن كەزدەستى
مەملەكەت باسشىسى ر. ميننيحانوۆتى رەسەي كۇنىمەن قۇتتىقتاپ، ەكى ەل اراسىندا قالىپتاسقان دوستىق قاتىناستار تۋرالى ايتتى.
- رەسەيمەن دە، تاتارستانمەن دە ارامىزدا دوستىق قارىم- قاتىناس ورنىققان. قازاقتار مەن تاتارلار تاريحى، مادەنيەتى، ءتىلى مەن ادەت- عۇرپى جاعىنان ءبىر- بىرىنە وتە جاقىن. ەكونوميكالىق بايلانىستارىمىز دا جاقسى. «KAMAZ» كاسىپورنىمەن جۇمىس جۇرگىزگىمىز كەلەمىز، الماتىداعى تىكۇشاق زاۋىتىنا قاتىستى جوبانى ىسكە اسىرۋدامىز. وسى جانە باسقا دا ەكونوميكالىق بايلانىستاردى، سونىڭ ىشىندە مۇناي حيمياسىنا قاتىستى بايلانىستى جالعاستىرا بەرۋ كەرەك.
تاتارستان پرەزيدەنتى قازاقستانعا كەلگەن ميسسياسى تۋرالى ايتىپ، ەلوردامىزدىڭ جاڭا ارحيتەكتۋرالىق نىساندارىن جانە «استانا ەكسپو-2017» كورمە كەشەنىن ارالاپ كورگەننەن كەيىنگى اسەرى جونىندە وي ءبولىستى.
- بۇگىن ەكسپو- داعى ەكسپوزيتسيامىزدى اشتىق. سونىمەن قاتار، قازاقستانداعى سەرىكتەستەرىمىزبەن بىرگە بولاشاق جوسپارلارىمىزدى تالقىلادىق. كورمە كەشەنى مەنى قايران قالدىردى. ءسىزدى كورمەنىڭ اشىلۋىمەن قۇتتىقتايمىز. سونداي- اق، قالا كوشەسىنە سۇيىمبيكەنىڭ اتى بەرىلۋىنە وراي ريزاشىلىعىمدى بىلدىرەمىن، - دەدى ر. ميننيحانوۆ.
نۇرسۇلتان نازاربايەۆ پەن رۋستام ميننيحانوۆ «باتىس قىتاي - باتىس ەۋروپا» جولىن سالۋ اياسىنداعى ينفراقۇرىلىمدىق جوبالاردى ىسكە اسىرۋ جانە قازاقستان مەن تاتارستاننىڭ كولىكتىك- ترانزيتتىك الەۋەتىن ارتتىرۋ ماسەلەلەرىن تالقىلادى. كەزدەسۋ سوڭىندا ر. ميننيحانوۆ قازاقستان پرەزيدەنتىن «تاتارستان رەسپۋبليكاسىنا سىڭىرگەن ەڭبەگى ءۇشىن» وردەنىمەن ماراپاتتاپ، مەملەكەت باسشىسىن تاتارستانعا كەلۋگە شاقىردى.
