استانادا ەكسپو اياسىندا تەگىن جاياۋ جۇرگىنشىلەر ەكسكۋرسياسى جۇمىسىن باستادى

استانا. قازاقپارات - اۋديوگيدپەن جاياۋ جۇرگىنشىلەرگە ارنالعان ەكسكۋرسيالار بيىل «نۇرجول» گۇلزارىندا، جاعالاۋدا جۇمىس ىستەيدى، دەپ حابارلادى استانا قالاسى اكىمدىگىنىڭ مەديا ورتالىعى تىلشىسىنە «استانا كونۆەنش بيۋرو» ج ش س ديرەكتورىنىڭ ورىنباسارى اسقار ادامبەكوۆ.

«ءبىز استانادا جاياۋ اۋديوگيدتى ىسكە قوستىق. 2017-جىلى بىزدە وسىنداي 2 جاياۋ اۋديوگيد بولادى. بۇل «نۇرجول» گۇلزارىندا، بارلىق ساياباق اۋماعىن قامتيتىن ەسىل وزەنىنىڭ جاعالاۋىندا جۇزەگە اسىرىلادى»، - دەيدى ا. ادامبەكوۆ.

اۋديوگيدتەردىڭ كومەگىمەن تۋريستەر مەن قوناقتار قالانىڭ نەگىزگى ايشىقتى جەرلەرى تۋرالى بارلىق اقپاراتتى الا الادى. بۇل قىزمەتتى پايدالانۋ ءۇشىن «حان شاتىر» س و س و جانىندا، «بايتەرەك» مونۋمەنتى الدىندا جانە ەسىل وزەنىنىڭ جاعاسىندا ورناتىلعان ارنايى شاتىرشالارعا بارۋ كەرەك.

اۋديوگيد پەن جول كورسەتۋشى كارتانى الىپ، 5 مىڭ تەڭگە كەپىلدەمە قالدىراسىز. باعىت اياقتالعان سوڭ قۇرىلعىلاردى تابىستاپ، كەپىلگە قالدىرعان تۋريست اقشاسى قايتارىلادى.

ادامبەكوۆ اتاپ وتكەندەي، ەلوردانىڭ ايشىقتى جەرلەرى تۋرالى اقپارات قازاق، ورىس، اعىلشىن، قىتاي جانە وزگە دە تىلدەردە بولادى. بيىل جاياۋ جۇرگىنشىلەر گيدىن Easy Travel جەلىسى ارقىلى پايدالانۋعا مۇمكىندىك جاسالدى.

باستى ايىرماشىلىعى - مۇنداي جاعدايدا اۋديوگيد ءۇشىن كەپىلدىككە قۇرىلعى الۋدىڭ قاجەتتىلىگى بولمايدى. كەز كەلگەن ادام موبيلدىك قۇرىلعى ارقىلى Easy Travel پورتالىنا كىرىپ، سول جەردە استانانىڭ كورىكتى جەرلەرى تۋرالى بارلىق قاجەتتى اقپاراتتى تىڭداي الادى.

«وسى جىلى جاياۋ اۋديوگيدتى حالىقارالىق Easy Travel جەلىسىمەن دامىتتىق. وندا بارلىق الەمدىك جاياۋ اۋديوگيدتەر جۇكتەلگەن. جاقىندا وندا استانا دا پايدا بولدى. ياعني ادام بىزدەن اۋديوگيدتى الماي-اق، سوندا كىرىپ، تىڭداي الادى. دەمەك، جوبانىڭ ەكىنشى كەزەڭىن جۇزەگە اسىرعاندا ءبىز قالاۋى بويىنشا اۋديوگيد بەرمەيمىز، - دەپ ءتۇسىندىردى «استانا كونۆەنش بيۋرو» باسشىسىنىڭ ورىنباسارى.