تاتارستان پرەزيدەنتى: ەكسپو - قازاقستاننىڭ عاسىرلار بويى ماقتانۋعا تۇرارلىق ەسكەرتكىشى
تاتارستان اپتالىعىنىڭ سالتاناتتى اشىلۋىنا ەل پرەزيدەنتى رۋستام ميننيحانوۆ ارنايى كەلدى، دەپ حابارلايدى «قازاقپارات» ح ا ا ءتىلشىسى.
«بۇل الەمدىك دەڭگەيدەگى وقيعا. استاناعا بۇكىل الەم نازارىن تىگىپ وتىر. ەنەرگيا ماسەلەسى - ءومىردىڭ بارلىق قاجەتتىلىكتەرى ءۇشىن اسا ماڭىزدى. مۇندا ەڭ زاماناۋي تەحنولوگيالار مەن ادىستەر جينالىپ وتىر. ارينە، جوبا اۋقىمدى ءارى كۇردەلى. جارتى جىل بۇرىن وسىندا كەلگەندە، احمەتجان ەسىموۆ («ەكسپو-2017» ۇ ك ا ق باسقارما ءتوراعاسى) ماعان قۇرىلىس پەن دايىندىق جۇمىستارىن كورسەتكەن ەدى. سوڭعى جارتىجىلدىقتا اتقارىلعان جۇمىستاردىڭ بارلىعى - عاسىرلار بويى ماقتانۋعا تۇرارلىق بىرەگەي ەسكەرتكىشتى تۇرعىزعان ادامداردىڭ وراسان زور ەڭبەگى. مۇنىڭ بارلىعى قازاقستان حالقى ءۇشىن قىزمەت ەتەتىن بولادى»، - دەدى رۇستەم ميننيحانوۆ تاتارستان ءبولىمىنىڭ اشىلۋ راسىمىندە.
«ەكسپو-2017» ۇ ك ا ق باسقارما ءتوراعاسى احمەتجان ەسىموۆ ءوز سوزىندە باۋىرلاس تاتارستانمەن ەجەلگى تاريح بايلانىستىراتىنىن جانە ەكى ەلدىڭ تىعىز قارىم-قاتىناستا ەكەنىن اتاپ ءوتتى.
سالتاناتتى اشىلۋ راسىمىندە تاتارستان رەسپۋبليكاسىنىڭ مەملەكەتتىك ءان-ءبي ءانسامبلى ونەر كورسەتتى.
كورمەدە ينتەراكتيۆتى جانە مۋلتيمەديالىق جابدىقتار ارقىلى تاتارستاننىڭ 15 كە جۋىق ءىرى كومپانيالارى تانىستىرىلعان. ولاردىڭ قاتارىندا «تاتنەفت» ا ق، «تايف» كومپانياسىنىڭ توبى، «كاماز» ك ا ق، «تاتەنەرگو» ا ق سىندى كومپانيالار جانە قازان مەملەكەتتىك ەنەرگەتيكا ۋنيۆەرسيتەتىنىڭ جۇمىستارى بار.
سونداي-اق، اپتالىق بارىسىندا «جاڭا ەنەرگەتيكا، ينۆەستيتسيالار جانە سەرىكتەستىك» اتتى كونفەرەنتسيا وتەدى.
ەسكە سالا كەتسەك، 2016-جىلدىڭ 3- قازانىندا «استانا ەكسپو-2017» ۇلتتىق كومپانياسى تاتارستان رەسپۋبليكاسىمەن ىنتىماقتاستىق بايلانىس جايلى مەموراندۋمعا قول قويعان ەدى.
