قازاقستاندا ينۆەستيتسيا تارتۋ جونىندەگى ۇلتتىق ستراتەگيا ازىرلەنەدى

استانا. قازاقپارات - وسى ايدىڭ سوڭىنا دەيىن ينۆەستيتسيا تارتۋ جونىندەگى ۇلتتىق ستراتەگيا ازىرلەنەدى.

بۇل تۋرالى بۇگىن حالىقپەن ەسەپتىك كەزدەسۋ وتكىزىپ جاتقان ق ر ينۆەستيتسيالار جانە دامۋ ءمينيسترى جەڭىسبەك قاسىمبەك ءمالىم ەتتى، دەپ حابارلايدى قازاقپارات.

«2016-جىلدىڭ قورىتىندىسىندا تىكەلەي شەتەل ينۆەستيتسياسىنىڭ جيىنتىق كولەمى 40 پايىزعا اسىپ، 20,6 ميلليارد دوللاردى قۇرادى. وسىلايشا، ءبىز ەكونوميكا ينۆەستيتسيالاۋدا وڭ ديناميكاعا قول جەتكىزدىك. ە ى د ۇ ستاندارتتارىنا سايكەس ەلدەگى ينۆەستيتسيالىق احۋالدى جەتىلدىرۋ جۇمىستارىن جالعاستىرۋدامىز. بىرلەسكەن جۇمىستاردىڭ ناتيجەسىندە اعىمداعى جىلدىڭ اقپان ايىندا ە ى د ۇ كەڭەسى قازاقستاننىڭ ە ى د ۇ- نىڭ حالىقارالىق ينۆەستيتسيالار جانە كوپبەيىندى كاسىپورىندار جونىندەگى دەكلاراتسياسىنا، سونىمەن بىرگە «اسسوتسيالانعان مۇشە» رەتىندە ە ى د ۇ- نىڭ ينۆەستيتسيالار جونىندەگى كوميتەتىنە قوسىلۋىنا ماقۇلدادى»، - دەدى ول.

ونىڭ ايتۋىنشا، بارلىق ينۆەستورلار ءۇشىن «ءبىر تەرەزە» قاعيداتى ەنگەن. بۇگىنگە ول زور سۇرانىسقا يە بولىپ وتىر. ماسەلەن وتكەن جىلى مينيسترلىككە 5500 دەن استام ءوتىنىش ءتۇسىپ، شامامەن 8 مىڭ مەملەكەتتىك قىزمەت كورسەتىلگەن. سونىمەن قاتار ينۆەستيتسيالىق ومبۋدسمەن ينستيتۋتى جۇمىس ىستەپ تۇر. وعان دا شەتەلدىك جانە وتاندىق ينۆەستورلاردان 50 دەن استام ءوتىنىش ءتۇسىپ، ونىڭ التاۋىندا ينۆەستورلاردىڭ پايداسىنا شەشىم شىعارىلعان.

«ءبىز سىرتقى دەڭگەيدەگى ينۆەستيتسيا تارتۋ جۇمىستارىن كۇشەيتتىك. اتاپ ايتقاندا، 10 باسىمدىققا يە ەل بويىنشا ارناۋلى كەڭەسشىلەردى انىقتادىق. وڭىرلىك دەڭگەيدە وبلىس اكىمدەرىنىڭ باسشىلىعىمەن ينۆەستيتسيا تارتۋ جونىندەگى كەڭەستەر قۇرىلدى. قازىرگى ۋاقىتتا مەملەكەت باسشىسىنىڭ تاپسىرماسىمەن ينۆەستيتسيا تارتۋ جۇيەسىن قايتا فورماتتاۋ جۇمىستارىن باستادىق. بۇل رەتتە مينيسترلىكتىڭ الدىندا ءبىرقاتار ناقتى مىندەتتەر تۇر. اعىمداعى جىلعى ماۋسىم ايىنىڭ سوڭىنا دەيىن ينۆەستيتسيا تارتۋ جونىندەگى ۇلتتىق ستراتەگيا ازىرلەنەتىن بولادى. بۇل جۇمىستارعا دۇنيەجۇزىلىك بانك ساراپشىلارىن تارتتىق»، - دەدى جەڭىس قاسىمبەك.

اۆتور: مارلان جيەمباي