رەسەي استاناداعى كونفەرەنسيا ارقىلى ءوز رەنىشىن ءبىلدىردى
جيىننىڭ پلەنارلىق ماجىلىسىندە ءسوز العان ر ف ەنەرگەتيكا ءمينيسترى الەكساندر نوۆاك ەۋروپانىڭ سانكتسيالىق تەكەتىرەسپەن تىم اۋەستەنىپ كەتكەنىن جەتكىزدى، دەپ حابارلايدى قازاقپارات ءتىلشىسى.
«تۇراقتى ەنەرگەتيكا جايىندا ايتقاندا ءبىزدى الاڭداتىپ جاتقان ماسەلەلەردى جىلى جابا سالۋعا بولمايدى. مەنىڭشە، بۇگىنگى كونفەرەنسيانىڭ مىنبەرىنەن ول ماسەلەلەردى دە كوتەرۋ كەرەك»، - دەيدى نوۆاك.
ونىڭ ايتۋىنشا، بۇگىندە ەنەرگيا رەسۋرستارىن جەتكىزۋشى كومپانيالار نارىعىندا ادىلەتسىز باسەكەلەستىك بارىنشا بايقالادى. وندايدا ەكونوميكالىق فاكتوردان بۇرىن ساياسي كەدەرگىلەر باسىم بولىپ جاتادى. ال تۇتىنۋشىلاردىڭ مۇددەسى ەسكەرىلمەيدى.
«ماسەلەن، ەۋروپالىق كوميسسيانىڭ ەنەرگەتيكالىق ماسەلەلەرگە قاتىستى وكىلەتتىگى كۇشەيىپ كەلەدى. ءبىز ونى انىق بايقاپ وتىرمىز. وكىنىشكە قاراي، كوممەرتسيالىق كومپانيالاردىڭ ءوزارا كەلىسىمىنە ارالاسۋ، ماڭىزدى ينفراقۇرىلىمدىق جوبالارعا ەشبىر نەگىزسىز وزگەرىس ەنگىزۋ سياقتى ارەكەتتەر بار. بۇنىڭ بارلىعى الدىمەن تۇتىنۋشىلارعا كەرى اسەرىن تيگىزىپ وتىرعانى ايدان انىق»، - دەپ اتاپ كورسەتتى نوۆاك.
رەسەيدىڭ ەنەرگەتيكا ءمينيسترى ەۋروپا مەملەكەتتەرىنىڭ سانكتسيالىق تەكەتىرەسكە تىم اۋەستەنىپ كەتكەنى جايىندا ايتىپ وتىر. سونىڭ سالدارىنان ەنەرگيا رەسۋرستارىن جەتكىزۋشى كومپانيالار سان الۋان توسقاۋىلدار مەن شەكتەۋلەرگە تاپ بولىپ جاتىر.
«ءسوز جوق، ەنەرگەتيكا سالاسىندا گەوساياساتتىڭ كۇشەيىپ كەتۋى تۇراقتى ەنەرگەتيكاعا كەرى اسەرىن تيگىزۋدە. سوسىن كەيبىر ەنەرگيا كوزدەرىن ءوندىرۋ شارالارىنا پرەفەرەنسيا بەرۋ، بەيبىت اتومدى دامىتۋعا شەكتەۋ قويۋ ول دا ادىلەتسىز باسەكەلەستىكتىڭ ءبىر كورىنىسى بولسا كەرەك»، - دەيدى نوۆاك.
اۆتور: ارمان اسقاروۆ
