قازاقستان قۇراماسى ءوز الاڭىندا دانيادان ۇتىلىپ قالدى - كەسكىن
بۇل 2018-جىلى رەسەيدە وتەتىن فۋتبولدان الەم چەمپيوناتىنا ىرىكتەۋ تۋرنيرىنىڭ 6 تۋرى بولاتىن. ويىننىڭ 27-مينۋتىندا دانيا قۇراماسىنىڭ شابۋىلشىسى نيكولاي يورگەنسەن ەسەپ اشقان بولاتىن.
ال ءبىرىنشى تايم اياقتالار تۇستا قازاقستان كومانداسىنىڭ كاپيتانى باۋىرجان يسلامحان الاڭنان قۋىلدى. شىنتاعى قارسىلاسىنىڭ بەتىنە ءتيىپ كەتكەنى ءۇشىن رەسەيلىك تورەشى ۆلاديسلاۆ بەزبورودوۆ باۋىرجانعا بىردەن «قىزىل قاعاز» كورسەتتى.
ەكىنشى تايم باسىندا، ويىننىڭ 51-مينۋتىندا قازاقستان قۇراماسىنىڭ قاقپاسىنا 11 مەترلىك ايىپ دوبى بەلگىلەنىپ، دانيالىقتاردىڭ جارقىن جۇلدىزى كريستيان ەريكسەن پەنالتيدەن ءمۇلت كەتپەدى. قازاقستان قۇراماسى ساپىندا يسلامبەك قۋات 76-مينۋتتا ەسەپ ايىرماسىن قىسقارتىپ، جانكۇيەرلەر جۇرەگىنە ءۇمىت وتىن جاعىپ ەدى، الايدا كوپ ۇزاماي دانيالىقتار ءۇشىنشى دوپتى سوعىپ، جەرگىلىكتى فۋتبول سۇيەر قاۋىمنىڭ قۋانىشىن سۋ سەپكەندەي باستى.
گولدىڭ اۆتورى - دولبەرگ. يسلامبەك قۋاتتىڭ گولى. وسىلايشا، قازاقستان قۇراماسى ەكى ۇپايمەن سوڭعى ورىندا قالدى.
ال 10 ۇپاي ەنشىلەگەن دانيا توپتا ەكىنشى ورىنعا كوتەرىلدى.
