يراندا تەگەرانداعى شابۋىلعا قاتىسى بار سەگىز كۇدىكتى ۇستالدى

استانا. قازاقپارات - يران قۇقىق قورعاۋ ورگاندارى تەگەرانداعى ەكى لاڭكەستىك ارەكەتكە قاتىسى بار دەپ كۇدىكپەن سەگىز ادامدى قولعا ءتۇسىردى، دەپ حابارلايدى Press TV ارناسى.

ولاردىڭ جەتەۋى ەلدىڭ سولتۇستىگىندەگى البورز پروۆينتسياسىنىڭ فارديس قالاسىنان تابىلعان، تاعى بىرەۋىن كەرەدج قالاسىنىڭ پوليتسيالارى ۇستادى.

جۇما كۇنى يراندا شابۋىلعا قاتىسى بار دەپ كۇدىكپەن 41 ادام قاماۋعا الىندى. ءتىنتۋ بارىسىندا قۇقىق قورعاۋ ورگاندارى ۇستالعانداردىڭ ۇيلەرىنەن كوپ جارىلعىش زاتتار، قارۋ-جاراق جانە بومبا ازىرلەۋگە ارنالعان ماتەريالداردى تاپتى.

جەرگىلىكتى بيلىك مالىمەتىنشە، ۇستالعانداردىڭ بارلىعى ەكسترەميستىك ۇيىمدارعا استىرتىن قىزمەت ەتكەن. تەرروريستىك شابۋىل 7- ماۋسىمدا، سارسەنبى كۇنى يران استاناسىندا بولدى. لاڭكەستەر پارلامەنت عيماراتى جانە اياتوللا حومەيني كەسەنەسىنە شابۋىل جاساعان.