ەلباسى: ەكسپو - «قازاقستان» ۇلتتىق برەندىن ىلگەرىلەتۋدىڭ جاڭا بەلەسى
بۇل تۋرالى ەلباسى نۇرسۇلتان نازاربايەۆ كورمەنىڭ سالتاناتتى اشىلۋ راسىمىندە ءمالىم ەتتى، دەپ حابارلادى اقوردانىڭ باسپا ءسوز قىزمەتىنەن.
سالتاناتتى شارا بارىسىندا ق ر پرەزيدەنتى 115 مەملەكەت پەن 22 حالىقارالىق ۇيىم قاتىسقان ەكسپو كورمەسىن قازاقستاننىڭ ت م د جانە شىعىس ەۋروپا ەلدەرى اراسىنان ءبىرىنشى بولىپ وتكىزىپ وتىرعانىن اتاپ ءوتتى.
- ءبىزدىڭ ءوتىنىشىمىزدى جانە ۇسىنعان تاقىرىبىمىزدى قابىل العاندارى ءۇشىن بارلىق ەلدەرگە ريزاشىلىعىمدى بىلدىرەمىن. وسىنداي اۋقىمداعى كورمە - ءبىر مەملەكەتتىڭ عانا اتقارعان ءىسى ەمەس، بۇل - وسىندا ءوز جەتىستىكتەرىن كورسەتۋگە كەلگەن حالىقارالىق قوعامداستىقتىڭ ەڭبەگى. استاناداعى ەكسپو حالىقارالىق كورمەسى - جاھاندىق كەڭىستىكتە ەلىمىزدى تانىتۋدىڭ جانە «قازاقستان» ۇلتتىق برەندىن ىلگەرىلەتۋدىڭ جاڭا بەلەسى. ءبىز «بولاشاقتىڭ ەنەرگياسى» تاقىرىبىن ۇسىنا وتىرىپ، عىلىمي پروگرەستىڭ بەل ورتاسىندا بولۋدى قالايمىز، - دەدى نۇرسۇلتان نازاربايەۆ.
مەملەكەت باسشىسى وسىدان ءبىر جارىم عاسىر بۇرىن لوندوندا وتكەن العاشقى دۇنيە جۇزىلىك كورمەدەن كەيىن ادامزات وراسان زور تەحنولوگيالىق وزگەرىستەردى باستان وتكەرگەنىنە توقتالىپ، بۇگىندە ءتيىمدى جانە قاۋىپسىز ەنەرگيا سالاسىنداعى تىڭ جاڭالىقتار قارساڭىندا تۇرعانىمىزدى اتاپ ءوتتى.
قازاقستان پرەزيدەنتى «ەكسپو-2017» كورمەسى وسى جاھاندىق ۇدەرىسكە ءوزىنىڭ ايرىقشا ۇلەس قوساتىنىنا سەنىم ءبىلدىردى. - زامانىمىزدىڭ وزىق ويلى ادامدارىنىڭ قاتىسۋى جوسپارلانعان ءىس- شارالار ادامزات دامۋىنىڭ جاڭا باعىتتارىن ايشىقتايدى. ميلليونداعان قازاقستاندىقتار مەن دۇنيە ءجۇزىنىڭ تۇكپىر- تۇكپىرىنەن كەلەتىن ءجۇز مىڭداعان قوناق الەمدىك عىلىمي جانە ينجەنەرلىك اقىل- ويدىڭ كەرەمەت جەتىستىكتەرىمەن تانىساتىن بولادى. ەكسپو باعدارلاماسىندا 6 مىڭ ءتۇرلى ءىس- شارا وتكىزۋ جوسپارلانعان. ولار الەم ەلدەرى اراسىنداعى ءوزارا تۇسىنىستىكتى دامىتۋعا، عىلىم، بيزنەس جانە قوعام اراسىنداعى تابىستى ءىس- قيمىلعا، سونداي- اق قازاقستان مادەنيەتىمەن تانىسۋعا سەپتىگىن تيگىزەدى. ءبىز كەلۋگە تىلەك بىلدىرگەندەردىڭ بارلىعىن ەلىمىزدىڭ باسقا دا وڭىرلەرىن ارالاپ كورۋگە، بىرەگەي تابيعاتىمىزبەن جانە تاريحي مۇرامىزبەن تانىسۋعا شاقىرامىز، - دەدى نۇرسۇلتان نازاربايەۆ.
مەملەكەت باسشىسى الەمنىڭ ەكولوگيالىق تۇرعىدان تەڭدەس جانە ورنىقتى دامۋىنىڭ ماڭىزدىلىعىنا توقتالىپ، «ەكسپو-2017» تاقىرىبىنىڭ ءبىزدىڭ ەلىمىز ءۇشىن وزەكتى ەكەنىنە ەرەكشە نازار اۋداردى.
- قازاقستان وراسان زور كومىرسۋتەك قورىنىڭ بار ەكەنىنە قاراماستان، جاڭارتىلاتىن ەنەرگيا كوزدەرىنە بەلسەندى تۇردە كوشەتىن بولادى. وسىنداي ماقسات ءبىزدىڭ «ستراتەگيا-2050» باعدارلامامىزدا جانە «جاسىل ەكونوميكاعا» كوشۋ جونىندەگى تۇجىرىمدامامىزدا كورىنىس تاپتى. قازاقستان 2050 -جىلعا قاراي جاڭارتىلاتىن كوزدەردىڭ ەسەبىنەن ەلەكتر ەنەرگەتيكاسىنىڭ جالپى كولەمىنىڭ جارتىسىن وندىرە الاتىن بولادى. سونىمەن بىرگە ەكونوميكادا ەنەرگيانىڭ جۇمسالۋى دا ازايادى، - دەدى قازاقستان پرەزيدەنتى.
نۇرسۇلتان نازاربايەۆ «استانا ەكسپو-2017» كورمە كەشەنىنىڭ نىساندارى مەن حالىقارالىق پاۆيلونداردىڭ قالاي پايدالانىلاتىنى جونىندە ايتىپ بەردى.
- كورمەنى ارالاۋشىلار نازارىنا باستى نىسان - جەر شارىن بەينەلەيتىن «نۇر الەم» سفەراسى ۇسىنىلادى. ونىڭ ءار دەڭگەيى ەنەرگيانىڭ بەلگىلى ءبىر تۇرىنە ارنالعان. سفەرانىڭ وزەگىندە ءبىزدىڭ ۇلتتىق پاۆيلون ورنالاسقان. وندا قازاقستاندىق عالىمداردىڭ ەڭ وزىق جوبالارى كورسەتىلگەن قازاقستانمەن تانىسۋ ايماعى جانە «جاسامپاز ەنەرگيا» ايماعى بار. ەكسپو كورمەسىنە مەملەكەتتەر مەن حالىقارالىق ۇيىمداردىڭ 130-دان استام ەكسپوزيتسياسى اكەلىندى. ەكى تاقىرىپتىق پاۆيلوندا ەنەرگەتيكانىڭ ەۆوليۋتسياسى، ونىڭ 21 - عاسىرداعى پروبلەمالارى جانە وسى سالاداعى تەحنولوگيالىق ورلەۋ ءساتى كورسەتىلەدى، - دەدى مەملەكەت باسشىسى.
قازاقستان پرەزيدەنتى كورمەنىڭ ىسكەرلىك باعدارلاماسىنا توقتالدى. ونىڭ اياسىندا استانا ەكونوميكالىق فورۋمى، شەتەل ينۆەستورلارىنىڭ كەڭەسى، يسلام ىنتىماقتاستىعى ۇيىمىنىڭ ءسامميتى سياقتى ءبىرقاتار ءىرى حالىقارالىق ءىس- شارالار وتكىزۋ جوسپارلانعان. مەملەكەت باسشىسى كورمەنىڭ حالىقارالىق ءوزارا ىنتىماقتاستىققا ەلەۋلى تىڭ سەرپىن بەرىپ، ەلىمىزدىڭ عىلىمىن دامىتۋعا جانە ەكونوميكامىزدى جاڭعىرتۋعا سەپتىگىن تيگىزەتىنىنە سەنىم ءبىلدىردى. نۇرسۇلتان نازاربايەۆ «ەكسپو-2017» كورمەسى اياقتالعان سوڭ ونىڭ ينفراقۇرىلىمى ودان ءارى پايدالانىلاتىنى تۋرالى ايتتى.
- بۇل جەردە «استانا» حالىقارالىق قارجى ورتالىعى جۇمىس ىستەيتىن بولادى. «جاسىل» تەحنولوگيالار مەن ينۆەستيتسيالاردى دامىتۋ جونىندەگى حالىقارالىق ورتالىق قۇرىلادى. ІТ- ستارتاپتاردىڭ حالىقارالىق تەحنوپاركى اشىلادى. وسىلايشا، ەلىمىزدىڭ، ءوڭىرىمىزدىڭ جانە الەمنىڭ يگىلىگى ءۇشىن ەكسپو- داعى «يننوۆاتسيانىڭ تامىر سوعىسى» جالعاساتىن بولادى، - دەدى قازاقستان پرەزيدەنتى.
سوڭىندا مەملەكەت باسشىسى «ەكسپو-2017» كورمەسىن دايىنداۋ ۇدەرىسىنە قاتىسۋشىلاردىڭ بارلىعىنا شىنايى قولداۋ كورسەتكەندەرى جانە كورمە يدەياسىن جۇزەگە اسىرۋعا اتسالىسقاندارى ءۇشىن العىس ايتتى.
- ءبىزدىڭ مارتەبەلى قوناقتارىمىزعا - استاناداعى «ەكسپو-2017» كورمەسىنىڭ اشىلۋ سالتاناتىنا قاتىسۋعا ۋاقىت تاۋىپ كەلگەن مەملەكەتتەر مەن ۇكىمەتتەر باسشىلارىنا ەرەكشە ريزاشىلىق بىلدىرەمىن، - دەدى نۇرسۇلتان نازاربايەۆ.
