يسپانيا كورولى استاناعا كەلدى
ايتا كەتەرلىگى، بۇگىن كەشكىسىن وتەتىن حالىقارالىق مامانداندىرىلعان كورمەنىڭ سالتاناتتى اشىلۋ راسىمىنە 17 ەلدىڭ مەملەكەت جانە ۇكىمەت باسشىلارى قاتىساتىن بولادى.
«شاڭحاي ىنتىماقتاستىق ۇيىمى وتىرىسى اياقتالعاننان كەيىن ەكسپو- نىڭ سالتاناتتى اشىلۋى بولادى. ءبىز اشىلۋ سالتاناتىنا 17 ەلدىڭ مەملەكەت جانە ۇكىمەت باسشىلارىن كۇتىپ وتىرمىز. مۇنان بولەك، قاتىسۋشى ەلدەردىڭ اتىنان زاڭنامالىق ورگانداردىڭ وكىلدەرى، مينيسترلەرى قاتىساتىن بولادى. قازىرگى ۋاقىتتا بىزدە وسىنداي ناقتىلانعان مالىمەت بار»، - دەگەن ەدى ەلىمىزدىڭ سىرتقى ىستەر ءمينيسترى قايرات ءابدىراحمانوۆ.
قازىرگى ۋاقىتقا دەيىن استاناعا سەربيا پرەزيدەنتى الەكساندر ۆۋچيچ، ليۋكسەمبۋرگ ۇلى گەرتسوگتىگىنىڭ پرەمەر- ءمينيسترى كساۆە بەتتەل كەلگەن ەدى. بۇعان دەيىن حابارلاعانىمىزداي، ەلورداعا شاڭحاي ىنتىماقتاستىق ۇيىمى سامميتىنە قاتىسۋ ءۇشىن اۋعانستان پرەزيدەنتى اشراف گاني احمادزاي، موڭعوليا پرەزيدەنتى ساحياگين ەلبەگدورج، ق ح ر ءتوراعاسى شي جينپيڭ، وزبەكستان پرەزيدەنتى شاۆكات ميرزيەيەۆ، پاكىستان پرەزيدەنتى مامنۋن حۋسەين، رەسەي پرەزيدەنتى ۆلاديمير پۋتين، تاجىكستان پرەزيدەنتى ەمومالي راحمون، بەلارۋس پرەزيدەنتى الەكساندر لۋكاشەنكو، قىرعىزستان پرەزيدەنتى المازبەك اتامبايەۆ كەلدى. ش ى ۇ ءسامميتى بارىسىندا پاكىستان مەن ءۇندىستان اتالعان ۇيىمعا مۇشەلىككە قابىلدانادى دەپ كۇتىلۋدە. وسىلايشا، ش ى ۇ جەر تۇرعىندارىنىڭ 40 پايىزىن، الەم ەكونوميكاسىنىڭ شامامەن ۇشتەن ءبىرىن قامتيتىن بولادى.
بۇگىندە ۇيىمعا رەسەي، قىتاي، قازاقستان، قىرعىزستان، تاجىكستان جانە وزبەكستان ەلدەرى مۇشە. قازىرگى ۋاقىتتا ش ى ۇ ءتوراعاسى - قازاقستان. بۇگىنگى سامميت بارىسىندا ءتوراعالىق قىتاي تاراپىنا وتەدى.
اۆتور: مارلان جيەمباي
