پۋتين ۇشاعى استانا اۋەجايىنا قوندى

استانا. قازاقپارات - رەسەي پرەزيدەنتى ۆلاديمير پۋتين شانحاي ىنتىماقتاستىق ۇيىمى سامميتىنە قاتىسۋ ءۇشىن ەلورداعا كەلدى، دەپ حابارلايدى قازاقپارات.

استانا اۋەجايىنا كەلىپ قونعان رەسەي پرەزيدەنتىن ۇشاقتان ق ر پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى اسقار مىرزاحمەتوۆ، استانا قالاسى اكىمىنىڭ ورىنباسارى ماليكا بەكتۇروۆا، رەسەيدىڭ قازاقستانداعى توتەنشە جانە وكىلەتتى ەلشىسى ميحايل بوچارنيكوۆ جانە ۆلاديمير پۋتيننىڭ باسپا ءسوز حاتشىسى دميتري پەسكوۆ قارسى الدى.

ايتا كەتەرلىگى، ش ى ۇ سامميتى بارىسىندا پاكىستان مەن ءۇندىستان اتالعان ۇيىمعا مۇشەلىككە قابىلدانادى دەپ كۇتىلۋدە.

وسىلايشا، ش ى ۇ جەر تۇرعىندارىنىڭ 40 پايىزىن، الەم ەكونوميكاسىنىڭ شامامەن ۇشتەن ءبىرىن قامتيتىن بولادى. بۇگىندە ۇيىمعا رەسەي، قىتاي، قازاقستان، قىرعىزستان، تاجىكستان جانە وزبەكستان ەلدەرى مۇشە.

قازىرگى ۋاقىتتا ش ى ۇ ءتوراعاسى - قازاقستان. ەرتەڭگى سامميت بارىسىندا ءتوراعالىق قىتاي تاراپىنا وتەدى.

بۇعان دەيىن اتالعان حالىقارالىق جيىنعا قاتىسۋ ءۇشىن استاناعا اۋعانستان پرەزيدەنتى اشراف گاني احمادزاي، موڭعوليا پرەزيدەنتى تساحياگين ەلبەگدورج جانە ق ح ر ءتوراعاسى شي جينپيڭ، وزبەكستان پرەزيدەنتى شاۆكات ميرزيەيەۆ پەن پاكىستان پرەزيدەنتى مامنۋن حۋسەيننىڭ كەلگەنىن حابارلاعان بولاتىنبىز.

اۆتور: مارلان جيەمباي