باقىتجان بايقاداموۆ پەن سي سينحايدىڭ دوستىعى تۋرالى فيلمدى ءتۇسىرۋ باستالدى

استانا. قازاقپارات - استانادا قازاقستان مەن قىتاي كينەماتوگرافيستەرىنىڭ تۇڭعىش بىرلەسكەن جوباسى - «كومپوزيتور» فيلمىنىڭ سالتاناتتى تانىستىرىلىمى ءوتتى، دەپ حابارلايدى «قازاقپارات» ح ا ا ءتىلشىسى.

بۇگىن قازاقستان رەسپۋبليكاسىنىڭ ۇلتتىق اكادەميالىق كىتاپحاناسىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى مەن ق ح ر باسىلىم، كينو، راديو، تەلەحابار ماسەلەلەرى بويىنشا مەملەكەتتىك اكىمشىلىك ءمينيسترى نە چەنسي قازاقستان مەن قىتاي كينو ماماندارى بىرلەسىپ تۇسىرەتىن «كومپوزيتور» فيلمىنىڭ تۇسىرىلىمىنە باستاۋ بەردى.

فيلمدە ەكىنشى دۇنيەجۇزىلىك سوعىس جىلدارى كەزىندەگى دارىندى كومپوزيتورلار باقىتجان بايقاداموۆ پەن سي سينحايدىڭ دوستىعى كورىنىس تابادى.

باقىتجان بايقاداموۆتىڭ ءرولىن قازاقستاننىڭ تانىمال اكتەرى بەرىك ايتجانوۆ، ال سي سينحايدى قىتايدىڭ بەدەلدى اكتەرى حۋ دجۋن سومدايدى. سونداي-اق، تۇسىرىلىمگە التىناي نوگەربەك، ارۋجان جازىلبەكوۆا سىندى قازاقستاندىق اكتريسالار قاتىسادى.

«بۇل فيلم - قىتايدىڭ كينونارىعىنا اپاراتىن العاشقى جول. بۇل تالاي تاعدىردى توعىستىراتىن قىزىق ءارى درامالىق وقيعا. سەبەبى، سوعىس جىلدارى قازاقستانعا ءتۇرلى ۇلت وكىلدەرى كوشىپ كەلدى. زاماننىڭ قيىندىعىنا قاراماستان، حالىق ءبىر-بىرىنە قولداۋ كورسەتتى، بارىنشا كومەكتەستى. ال مۋزىكا ولاردىڭ جالعىز جۇبانىشى ەدى»، - دەدى فيلمنىڭ اتقارۋشى پروديۋسەرى ءمادي جاقىپوۆ.

بىرلەسكەن كينوجوبانىڭ ءتۇسىرىلىمى تۋرالى ۋاعدالاستىق 2015-جىلدىڭ 26- قىركۇيەگىندە قىتايدىڭ فۋچجوۋ قالاسىندا «جىبەك جولى» اتتى ەكىنشى حالىقارالىق كينوفەستيۆالدىڭ بىرلەسكەن ءونىم فورۋمىندا جاسالدى. 2016-جىلى 2- قاراشادا «قازاق فيلم» ا ق مەن ShineWorks Pictures ۋاقىتشا اتاۋى «كومپوزيتور» دەپ اتالاتىن كوركەم فيلمدى بىرلەسىپ ءوندىرۋ، قارجىلاندىرۋ جانە بىرلەسىپ پايدالانۋ بويىنشا ىنتىماقتاستىق تۋرالى كەلىسىمگە قول قويدى.

«قازاق فيلم» ا ق ۆيتسە-پرەزيدەنتى سەرىك جۇباندىقوۆتىڭ ايتۋىنشا، ءتۇسىرىلىم جۇمىستارى 2017-جىلى باستالادى، ونىڭ باسىم بولىگى قازاقستاندا وتەدى. «جۇمىس پروتسەسىن، ءتۇسىرىلىم شىعىندارىن قىتايلىق ارىپتەستەرمەن تەڭدەي ءبولىپ الدىق. وسىلايشا، ءار تاراپ فيلمنىڭ %50 ىن قارجىلاندىردى.

ءتۇسىرىلىم جۇمىستارى قازاقستاندا وتەدى، ال كومپيۋتەرلىك گرافيكامەن بايلانىستى مونتاج جۇمىستارى قىتايدا جۇرگىزىلەدى. ارينە، ءبىزدىڭ باستى ماقساتىمىز قىتايدىڭ كونتينەنتتىك نارىعىنا ەنۋ جانە فيلمگە سالعان قاراجاتتى قايتارا الامىز با، مەملەكەت كينودان كىرىس تۇسىرە الا ما، سونى انىقتاۋ»، - دەدى ول.

ەسكە سالا كەتسەك، كەشە استانادا قىتاي فەستيۆالى ءوتتى. فەستيۆال اياسىندا وتاندىق كورەرمەندەر نازارىنا قىتايدىڭ سوڭعى جىلدارى جارىق كورگەن ۇزدىك تۋىندىلارى ۇسىنىلاتىن بولادى.

اۆتور: ايجان سەرىكجان قىزى