قازاقستان مەن قىتاي پرەزيدەنتتەرى جاڭا كونتەينەرلىك باعىتتى اشتى

 استانا. قازاقپارات - بۇگىن قازاقستان پرەزيدەنتى نۇرسۇلتان نازاربايەۆ پەن قىتاي حالىق رەسپۋبليكاسىنىڭ ءتوراعاسى شي جينپين ليانيۋنگان تەڭىز پورتى جانە «قورعاس - شىعىس قاقپاسى» ارنايى ەكونوميكالىق ايماعى اراسىنداعى كونتەينەرلىك قىزمەتتى ىسكە قوستى.

 اتالعان جوبا قازاقستاننىڭ «نۇرلى جول» باعدارلاماسى مەن قىتايدىڭ «جىبەك جولىنىڭ ەكونوميكالىق بەلدەۋى» باستاماسىن ۇندەستىرۋدىڭ تاعى ءبىر ايقىن كورىنىسى بولسا كەرەك، دەپ حابارلايدى قازاقپارات ءتىلشىسى.

«بۇگىن ەكى وتە ماڭىزدى جوبا ىسكە اسىپ وتىر. ليانيۋنگان پورتىنان العاش رەت ورتالىق ازيا ارقىلى تۇركياعا، ال «قورعاس - شىعىس قاقپاسى» ارنايى ەكونوميكالىق ايماعىنان قىتايدىڭ چىڭدۋ قالاسىنا كونتەينەرلىك باعىتتار اشىلىپ وتىر. اتالعان جوبالار قازاقستاننىڭ «نۇرلى جول» باعدارلاماسى مەن قىتايدىڭ «جىبەك جولىنىڭ ەكونوميكالىق بەلدەۋى» باستاماسىن ۇندەستىرۋدىڭ ايقىن دالەلى بولا الادى. ءبىزدىڭ جوسپارىمىزعا سايكەس، 2020 -جىلعا دەيىن كونتەينەرلىك تاسىمالدىڭ كولەمى 2 ميلليونعا جەتۋى ءتيىس. وسىنىڭ ارقاسىندا ەكى ەلدىڭ ەكونوميكالىق دامۋى ارتا تۇسەدى» ، - دەپ اتاپ كورسەتتى نۇرسۇلتان نازاربايەۆ.

ءوز كەزەگىندە ق ح ر ءتوراعاسى شي جينپين اتالعان جوبا كولىكتىك- لوگيستيكالىق ىنتىماقتاستىق ءۇشىن جاڭا مۇمكىندىكتەر اشىپ وتىرعانىن قاداپ ايتتى.

«قازاقستان تەڭىزگە شىعۋ مۇمكىندىگىن الىپ وتىر، وسى ورايدا ەۋرازيالىق كەڭىستىكتە لوگيستيكالىق ورتالىققا اينالۋدا. بۇل تۇرعىدا ەلدەرىڭىز شىعىس پەن باتىس اراسىنداعى ساۋدا تىزبەگىندە ماڭىزدى رولگە يە بولدى. وسى جەتىستىكپەن بارلىق قازاقستاندىق دوستارىمدى شىن جۇرەگىمنەن قۇتتىقتايمىن. قىتاي مەن قازاقستان اراسىنداعى ترانسشەكارالىق تاسىمال ىنتىماقتاستىعىن تەرەڭدەتۋ بارشا ءوڭىردى دامىتۋدا قۋاتتى ىنتالاندىرۋشى كۇش بولىپ وتىر. بۇل باعىتتاعى ءوزارا ءىس- قيمىلداردى جالعاستىرۋعا مۇددەلىمىز» ، - دەدى شي جينپين. وسىدان كەيىن قازاقستان مەن قىتايدىڭ پرەزيدەنتتەرى تەلەكوپىر ارقىلى ەكى جاقتان كونتەينەرلىك پوەزداردى جىبەرۋگە رۇقسات بەردى. بۇگىننەن باستاپ، ليانيۋنگان پورتىنان شىعاتىن كونتەينەرلىك پويىزدار قازاقستان ارقىلى ورتالىق ازيا ەلدەرى مەن تۇركيانىڭ ستامبۋل قالاسىنا قاتىنايدى. تيلبۋرگ (گەرمانيا) - چىڭدۋ (ق ح ر) مەن تاشكەنت - چەندۋ اراسىنداعى جۇكتەر دە التىنكول ستانتسياسىمەن وتەدى. جاڭا ترانزيتتىك باعىت ارقىلى «COSCO Shipping» كومپانياسى بۇعان دەيىن تەڭىزبەن تاسىمالداپ جۇرگەن كونتەينەرلەرىن ورتالىق ازياعا قۇرلىقپەن جەتكىزەتىن بولادى. ايتا كەتكەن ءجون، 21 - مامىردا بەيجىڭ قالاسىندا وتكەن ء«بىر بەلدەۋ - ءبىر جول» فورۋمى اياسىندا ليانيۋنگان پورتى، COSCO Shipping پەن «قازاقستان تەمىر جولى» ۇلتتىق كومپانياسى «قورعاس - شىعىس قاقپاسى» ارنايى ەكونوميكالىق ايماعىن بىرلەسىپ دامىتۋ تۋرالى مەموراندۋمعا قول قويعان بولاتىن.

 اۆتور: ارمان اسقاروۆ