ەلباسى: قازاقستان- قىتاي قارىم- قاتىناسى وزگە ەلدەرگە ۇلگى بولادى

استانا. قازاقپارات - اقوردادا ق ر پرەزيدەنتى نۇرسۇلتان نازاربايەۆ پەن ق ح ر ءتوراعاسى شي جينپيڭ شاعىن قۇرامدا كەلىسسوز وتكىزۋدە، دەپ حابارلايدى قازاقپارات.

 كەلىسسوز بارىسىندا قازاقستان پرەزيدەنتى قىتاي توراعاسىمەن اعىمداعى جىلدىڭ ىشىندە ءۇشىنشى مارتە كەزدەسىپ وتىرعاندىعىن، بۇل ەكى ەلدىڭ اراسىنداعى ىنتىماقتاستىقتىڭ بارىنشا جوعارى ەكەندىگىن بىلدىرەتىندىگىن باسا ايتتى.

 «ءبىزدىڭ كەزدەسۋلەرىمىز، سەنىمگە تولى بايلانىسىمىز ۇكىمەتتەرىمىز، مينيسترلىكتەرىمىز بەن ۆەدومستۆولارىمىز اراسىنداعى قارىم- قاتىناستىڭ بارلىق سپەكتورلارىنا ىقپال ەتىپ، كومەكتەسەدى. ەگەر قىسقاشا قورىتىندى شىعارار بولساق، قازاقستان مەن قىتاي قارىم- قاتىناسى - بۇل ۇلگى بولارلىق مەملەكەت ارالىق قارىم- قاتىناس. بىزدە شەشىلمەگەن ماسەلە جوق. تۋىندايتىن كەز كەلگەن ماسەلە شەشىلەدى»، - دەدى نۇرسۇلتان نازاربايەۆ.

 مەملەكەت باسشىسى قىتايدىڭ تىكەلەي شەتەل ينۆەستيتسياسى، بولىنگەن كرەديتتەر جانە بىرلەسكەن كاسىپورىندار بويىنشا قازاقستان ەكونوميكاسىنىڭ نەگىزگى سەرىكتەسى بولىپ وتىرعاندىعىن اتاپ ءوتتى. ەنەرگەتيكالىق ىنتىماقتاستىق ماسەلەلەرى تولىقتاي ءوز شەشىمىن تاپقاندىعىن ەسكە سالدى.

 «ءبىزدىڭ ارامىزدا بارلىق دەڭگەيدەگى جىلى ءارى تىعىز بايلانىستار قىتايلىق- قازاقستاندىق قارىم- قاتىناستىڭ ستراتەگيالىق سيپاتىن پاش ەتەدى ءبىز مەملەكەتتەر اراسىنداعى قارىم- قاتىناستىڭ ۇلگىسى بولامىز دەسەك تە بولادى. بايلانىستارىمىز بارىنشا تىعىز. مەنىڭ وسى جولعى ساپارىمدى تاماشا ۇيىمداستىرعانىڭىز ءۇشىن ريزاشىلىعىمدى بىلدىرەمىن. مەن بەيجىڭ سارايى قوناق ۇيىنە ورنالاسىپ، وزىمدى ۇيىمدەگىدەي سەزىنۋدەمىن»، - دەدى ءوز كەزەگىندە قىتاي ءتوراعاسى قازاقستان پرەزيدەنتىنە قاراتا.

 ايتا كەتەرلىگى، ق ح ر ءتوراعاسى قازاقستانعا وسىمەن ءۇشىنشى رەت رەسمي ساپارمەن كەلىپ وتىر. ساپار اياسىندا ول ەرتەڭ ش ى ۇ سامميتىنە، سونىمەن قاتار ەكسپو-2017 حالىقارالىق مامانداندىرىلعان كورمەسىنە قاتىساتىن بولادى.

 اۆتور: مارلان جيەمباي