ەرلان قارين: قىتاي كينوفەستيۆالى - مادەنيەتتەردى جاقىنداستىرۋدىڭ جاڭا كوپىرى

استانا. قازاقپارات - قازاقستان مەن قىتاي اراسىندا ەكونوميكالىق قاتىناستارمەن بىرگە، رۋحاني جانە مادەني بايلانىستار قالىپتاستى.

بۇگىن استاناداعى «قازمەديا» ورتالىعىندا قىتاي كينوسى فەستيۆالىنىڭ اشىلۋ راسىمىندە «قازاقستان» ر ت ر ك» اق باسقارما ءتوراعاسى ەرلان قارين وسىلاي ءمالىم ەتتى، دەپ حابارلايدى قازاقپارات.  «ۇلى دالا ەلى مەن قىتاي بايلانىسى، دوستىعى مەن ءوزارا قارىم- قاتىناس تاريحى مىڭداعان جىلداردان باستاۋ الادى. ءبىزدىڭ حالىقتارىمىزدىڭ بايلانىسى ءبىزدىڭ داۋىرىمىزگە دەيىنگى زاماننان باستاۋ الادى. سول كەزدەگى ەكى ەل اراسىنداعى تىعىز قارىم- قاتىناس ناتيجەسىندە ۇلى جىبەك جولى بوي كوتەرگەنى تاريحتان بەلگىلى. ەندى مىنە، ۇلى جىبەك جولىن قايتا جانداندىرۋعا تاريح جاڭا مۇمكىندىكتەر بەرىپ وتىر. وسىدان ءتورت جىل بۇرىن ق ح ر ءتوراعاسى شي جينپين مىرزا العاش رەت قازاقستانعا رەسمي ساپارمەن كەلگەندە تۇڭعىش رەت « ءبىر بەلدەۋ، ءبىر جول» جوباسىن قۇرۋ يدەياسىن جاريالاعان بولاتىن. بۇل شىندىعىندا دا تاريحي باستاما ەدى. ءوز كەزەگىندە قازاقستان پرەزيدەنتى نۇرسۇلتان نازاربايەۆتىڭ باستاماسىمەن 2014 -جىلى قازاقستاندا «نۇرلى جول» ينفراقۇرىلىمدىق دامۋ باعدارلاماسى جاريالاندى. ونىڭ كوزدەگەن ماقساتى - ەلدىڭ الەۋەتىن كوتەرۋ. بۇل جوبا «جىبەك جولى» ەكونوميكالىق بەلدەۋى ەكونوميكاسىمەن تولىقتاي ۇشتاسىپ جاتىر» ، - دەپ توقتالدى ول.

سونىمەن قاتار ەرلان قارين ۇلى دالا ەلى باياعىدان وركەنيەتتەر اراسىن بايلانىستىراتىن التىن كوپىر ءرولىن اتقارىپ كەلە جاتقانىن ايتتى. «ول ارقىلى ەكى ەل اراسىندا ەكونوميكالىق قاتىناستارمەن بىرگە، رۋحاني جانە مادەني بايلانىستار قالىپتاستى. ەندەشە، بۇگىنگى باستاما - مادەنيەتتەرىمىزدى جاقىنداستىرۋدىڭ جاڭا كوپىرى» ، - دەدى باسقارما ءتوراعاسى.

 ايتا كەتەيىك، قىتاي كينوسى فەستيۆالى استانادا 7-18 ماۋسىم ارالىعىندا وتەدى. ەلوردالىقتار مەن قالا قوناقتارى فەستيۆال اياسىندا «ىلە وزەنى» ، «شىنايى ماحاببات» ، «گۇلىم» ، «قاتەرلى ىسىك مىرزا، كەتىڭىز» ، «قاسقىر توتەمى» سىندى تۋىندىلاردى تاماشالاي الادى. «قازاقستان» رەسپۋبليكالىق تەلەراديوكورپوراتسياسى مەن قحر ءباسپاسوز، باسپا، راديو، كينو جانە تەليەۆيزيا ءىسى جونىندەگى مەملەكەتتىك باسقارماسى ۇيىمداستىرعان بۇل شارانىڭ ارنايى قوناعى رەتىندە الەمدىك كينەماتوگرافيانىڭ جۇلدىزى، قىتاي اكتەرى، كينورەجيسسەر، كينوپروديۋسەر دجەكي چان بولدى.

 اۆتور: رۋسلان عابباسوۆ