چىڭ لۇڭ مەن ديماش ساحنادا ءان شىرقادى

استانا. قازاقپارات - قىتايلىق تانىمال اكتەر چىڭ لۇڭ استانادا قىتايدىڭ كينوفەستيۆالىن اشىپ بەردى، دەپ حابارلايدى قازاقپارات.

چىڭ لۇڭ اشىلۋ سالتاناتىنا قوناق كادە رەتىندە قىتاي تىلىندە «وتان» ءانىن شىرقادى. اكتەر بۇل ءان وتانشىلدىققا باۋليتىنىن، سونداي-اق، بارلىق ادام ءوز وتانىن ءسۇيۋ كەرەك ەكەندىگىن جەتكىزدى.

ايتا كەتەيىك، چىڭ لۇڭنىڭ ءان شاشۋىنان كەيىن قازاقستاندىق ءانشى ديماش قۇدايبەرگەن ساحناعا شىعىپ، «Singer» بايقاۋىندا شىرقاعان قىتايشا «كۇزگى مۇڭ» ءانىن ايتىپ بەردى.

ەسكە سالا كەتەيىك، الەمدىك اكتەر، كاسكادەر، كينورەجيسسەر، كينوپروديۋسەر، سەناريست، ءانشى، ميلليونداعان كورەرمەننىڭ سۇيىكتىسىنە اينالعان اڭىز ادام - چىڭ لۇڭ كەشە العاش رەت استاناعا اياق باستى.

شارانىڭ باستى ۇيىمداستىرۋشىلارى - «قازاقستان» رەسپۋبليكالىق تەلەراديوكورپوراتسياسى مەن ق ح ر باسپا ءسوز، باسپا، راديو، كينو جانە تەلەۆيزيا ءىسى جونىندەگى مەملەكەتتىك باسقارماسى.

اۆتور: مۇحتار قاليموللا ۇلى