چىڭ لۇڭ قازاقستاندا فيلم تۇسىرمەك
«شىنىن ايتقاندا، وسىعان دەيىن قازاقستانعا كەلىپ، كينەماتوگرافيامەن اينالىسۋدى ارمانداعان ەدىم. الايدا ۋاقىتتىڭ تاپشىلىعىنان، بۇگىنگە دەيىن بۇل ارمانىمدى جۇزەگە اسىرا المادىم. بولاشاقتا قازاقستانعا مىندەتتى تۇردە كەلىپ، وسى سالاداعى ەڭبەگىمدى ىسكە اسىرماق ويدامىن»، - دەيدى چىڭ لۇڭ بۇگىن استاناداعى باسپا ءسوز ءماسليحاتى بارىسىندا.
بۇدان بولەك ول تىلشىلەر ساۋالىنا جاۋاپ بەرۋ كەزىندە جەتىستىككە قالاي جەتكەنىن ايتىپ بەردى.
«ارينە، مەن بىردەن ونەر جۇلدىزى اتانعان جوقپىن، قازىرگى دەڭگەيىمە بىرتىندەپ كەلدىم. ياعني ەڭ تومەننەن ءار قادام سايىن جوعارىلاي بەردىم. سوندىقتان دا ءاربىر ادامنىڭ جاعدايىن جاقسى تۇسىنەمىن، سايكەسىنشە ءار ادامنىڭ جۇمىسىنا قۇرمەتپەن قارايمىن»، - دەپ توقتالدى تانىمال ونەر جۇلدىزى.
وسى ورايدا ول تابىسقا ەڭ باستىسى كۇش-جىگەر مەن جانكۇيەرلەردىڭ قولداۋى ارقاسىندا، سونداي-اق ۇنەمى جانىنان تابىلاتىن كومانداسىنىڭ كومەگىمەن جەتكەنىن ايتتى.
«الەم ەلدەرىندە جانكۇيەرلەرىم مەنىڭ فيلمدەرىمدى تاماشالاپ جۇرگەنىن بىلەمىن. وسى رەتتە تۋىندىلارىم ارقىلى ءوز الەمىمدى تانىستىرۋعا تىرىسىپ كەلەمىن. اتاپ ايتقاندا، مەنىڭ فيلمدەرىمدە تىلدىك كەدەرگىلەر بولماعاندىقتان، ولاردىڭ بارلىعىنىڭ ماعىناسىن ەش قيىندىقسىز تۇسىنە الاسىزدار»، - دەدى ول.
ەسكە سالا كەتەيىك، الەمدىك اكتەر، كاسكادەر، كينورەجيسسەر، كينوپروديۋسەر، سەناريست، ءانشى، ميلليونداعان كورەرمەننىڭ سۇيىكتىسىنە اينالعان اڭىز ادام - چىڭ لۇڭ كەشە العاش رەت استاناعا اياق باستى.
شارانىڭ باستى ۇيىمداستىرۋشىلارى - «قازاقستان» رەسپۋبليكالىق تەلەراديوكورپوراتسياسى مەن ق ح ر باسپا ءسوز، باسپا، راديو، كينو جانە تەلەۆيزيا ءىسى جونىندەگى مەملەكەتتىك باسقارماسى.
ريزابەك نۇسىپبەك ۇلى
