ەلباسى ش ى ۇ- عا مۇشە مەملەكەتتەردىڭ قورعانىس مينيسترلەرىمەن كەزدەستى
كەزدەسۋگە قازاقستان رەسپۋبليكاسىنىڭ قورعانىس ءمينيسترى س. جاسۇزاقوۆ، قىتاي حالىق رەسپۋبليكاسىنىڭ قورعانىس ءمينيسترى چان ۆانسيۋان، رەسەي فەدەراتسياسىنىڭ قورعانىس ءمينيسترى س. شويگۋ، تاجىكستان رەسپۋبليكاسىنىڭ قورعانىس ءمينيسترى م. شەرالي، وزبەكستان رەسپۋبليكاسىنىڭ قورعانىس ءمينيسترى ك. بەرديەۆ، قىرعىز رەسپۋبليكاسى باس شتابىنىڭ باستىعى ر. دۋيشەنبيەۆ، شاڭحاي ىنتىماقتاستىق ۇيىمىنىڭ باس حاتشىسى ر. اليموۆ قاتىستى.
مەملەكەت باسشىسى شاڭحاي ىنتىماقتاستىق ۇيىمىنا مۇشە مەملەكەتتەردىڭ قورعانىس مينيسترلەرى استانادا ش ى ۇ- عا مۇشە- مەملەكەتتەر باسشىلارىنىڭ كەڭەسىن جانە «ەكسپو-2017» حالىقارالىق كورمەسىن وتكىزۋ قارساڭىندا باسقوسىپ وتىرعانىنىڭ ماڭىزدىلىعىن اتاپ ءوتتى.
- مادەني، اۋماقتىق، تاريحي تۇرعىدان ءبىر- بىرىنە جاقىن مەملەكەتتەردىڭ ەكونوميكالىق ىنتىماقتاستىق ماسەلەلەرىن شەشۋ ءۇشىن قۇرىلعان شاڭحاي ىنتىماقتاستىق ۇيىمى ءوزىن ايتۋلى وڭىرلىك بىرلەستىك رەتىندە كورسەتە ءبىلدى، - دەدى قازاقستان پرەزيدەنتى.
نۇرسۇلتان نازاربايەۆ شاڭحاي حارتياسى قابىلدانعان ساتتەن بەرى 15 جىل وتكەنىنە جانە وسى ۋاقىت ارالىعىندا بىرلەسكەن اۋقىمدى جۇمىس اتقارىلعانىنا نازار اۋداردى.
- شاڭحاي ىنتاماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ الداعى وتىرىسىندا ءىرى ەكى ەل - ءۇندىستان مەن پاكىستاندى ۇيىم مۇشەلىگىنە قابىلداۋ كوزدەلگەن. سول ارقىلى ش ى ۇ جەر شارى تۇرعىندارىنىڭ 40 پايىزعا جۋىعىن بىرىكتىرەدى. ەڭ باستىسى - بارلىق ماسەلەلەردى كونسەنسۋس ارقىلى شەشۋگە نەگىزدەلگەن «شاڭحاي رۋحىن» ساقتاۋ، - دەدى مەملەكەت باسشىسى.
قازاقستان پرەزيدەنتى ۇيىم قىزمەتىنىڭ ەكونوميكالىق مازمۇنىن نىعايتۋ قاجەتتىگىن اتاپ ءوتتى. - شانحاي ىنتىماقتاستىق ۇيىمىنىڭ وڭ ديناميكاسى قازىرگى ۋاقىتتا «جاڭا جىبەك جولى» باعدارلاماسىنىڭ دامۋىمەن بايلانىستى بولىپ وتىر. بۇل باعدارلاماعا ۇيىم مۇشەلەرىنىڭ بارلىعى، ەڭ الدىمەن، قىتاي حالىق رەسپۋبليكاسىنا جاقىن كورشى بولىپ تابىلاتىن قازاقستان قولداۋ كورسەتۋدە، - دەدى نۇرسۇلتان نازاربايەۆ.
سوڭىندا مەملەكەت باسشىسى قورعانىس ۆەدومستۆولارىنىڭ قىزمەتى شاڭحاي ىنتىماقتاستىق ۇيىمىنىڭ ەكونوميكالىق ينتەگراتسياسىنىڭ باعىتىمەن قاتار جۇرۋگە ءتيىس ەكەندىگىن اتاپ ءوتتى.
