قازاقستان مەن قىتاي بىرلەسىپ كينو تۇسىرەدى

استانا. قازاقپارات - استانا حالىقارالىق ەكسپو كورمەسىندە قىتايدىڭ نەگىزگى پاۆيلونىنىڭ قاسىندا قوسىمشا تاعى ءبىر «قىتاي اسحاناسى مەن مادەنيەتى» پاۆيلونى بولادى.

ەكى قاباتتى 1700 شارشى مەترلىك اۋماقتى الىپ جاتقان پاۆيلوننىڭ ءبىرىنشى قاباتىندا قىتايلىق ۇزدىك تىسكەباسار برەندتىڭ ءدامىن تاتىپ، ساتىپ الۋعا بولادى.

 ال ەكىنشى قاباتىندا كورشى ەلدىڭ 20 ايماعىنان كەلگەن قاتىسۋشىلار ءار وڭىرگە ءتان قىتاي اسحاناسىنىڭ مادەنيەتىن تانىستىرادى. وسى جەردە كومپانيالار كەلىسسوز جۇرگىزىپ، ءوزارا كەلىسىمشارتقا قول قويۋىنا مۇمكىندىك بار. بۇل تۋرالى ءبىزدىڭ تىلشىمىزگە بەرگەن سۇقباتىندا قىتايدىڭ قوسىمشا پاۆيلونىنىڭ قۇرمەتتى ءتوراعاسى، بەلگىلى جازۋشى، قىتاي حالىقتىق ساياسي كەڭەسىنىڭ مۇشەسى اكپار ءماجيت ايتتى.

بۇدان بولەك 7-18 - ماۋسىم ارالىعىندا قىتاي كينوسىنىڭ فەستيۆالى وتەدى. ەكسپو- نى تاماشالاي كەلگەن كورەرمەنگە ەڭ تاڭداۋلى 6 كينو ۇسىنىلادى. سونىڭ ىشىندە دجەكي چان باستى رولدە ويناعان ءۇندىستان مەن قىتايدىڭ بىرلەسىپ تۇسىرگەن «كۋنگ- فۋ يوگا» تۋىندىسى.

ونىڭ ايتۋىنشا، كەلەشەكتە ەكى ەل اراسىندا حالىقارالىق كينوفەستيۆال وتكىزۋ داستۇرگە اينالماق. سونداي- اق قازاقستان مەن قىتاي بىرلەسىپ كينو ءتۇسىرۋدى جوسپارلاپ وتىر.

 اكپار ءماجيت، ق ح ر حالىقتىق ساياسي كەڭەسىنىڭ مۇشەسى:

- بيىلدان باستاپ، قازاقستان- جۇڭگو اراسىنداعى كينومەرەكەسىن وتكىزگەلى جاتىرمىز. باتىرلار تاقىرىبىندا بولماق. كەلەر جىلى ءبىز جاقتا وتەدى. «ءبىر بەلدەۋ، ءبىر جول» بويىندا تەك ساۋدا، ونەركاسىپ بولىپ، مادەنيەت اۋىس- كۇيىس بولماسا، حالىق پەن حالىقتىڭ اراسى جاقىنداسپايدى عوي. حالىق پەن حالىقتى جالعاستىرۋ ءۇشىن مادەنيەت ءجۇرۋ كەرەك.

www.24.kz