جولاۋشىلار استانا اۋەجايىنىڭ جاڭا تەرمينالىنىڭ جۇمىسىنا شاعىمدانىپ جاتىر
ءبىر ەكى كۇن بۇرىن اشىلعان استانا اۋەجايىنىڭ جاڭا تەرمينالىنا كەلىپ جاتقاندار عيماراتتىڭ جولاۋشىلاردى قابىلداۋىنا دايىن ەمەس ەكەنىن اتاپ وتۋدە، دەپ حابارلايدى Sputnik.
«ەلوردا اۋەجايىنىڭ جاڭا تەرمينالى. ەشتەڭە جۇمىس ىستەمەيدى. ۇشقالى وتىرعان جۇزدەگەن ادامدار ءۇشىن كارتالار قابىلدامايتىن جالعىز ءدامحانا جۇمىس ىستەيدى. بانكوماتتار جوق، نوۋتبۋكتار مەن سمارتفونداردى زاريادتايتىن روزەتكالار دا جوق. راسىندا قاشان ءبارى ىسكە قوسىلادى. ەكسپودان كەيىن بە؟»، - دەپ جازادى Facebook پايدالانۋشىسى نيكولاي ەنەلانە.
استانا اۋە جايىنىڭ باسپا ءسوز حاتشىسى كاميلا قاسىمبەكوۆا تۇسىندىرگەندەي اۋەجاي ىسكە قوسىلعان ۋاقىتتان بەرى جولاۋشىلاردىڭ شاعىمدارى بولعان، الايدا كەيبىر شاعىمدار نەگىزسىز بولىپ شىققان.
ونىڭ سوزىنە قاراعاندا، ادامدار جۇمىس ىستەمەيتىن دارەتحانالارعا شاعىمدانعان، الايدا تەكسەرۋدەن كەيىن ولاي ەمەس ەكەنى انىقتالدى. «قازىر بانكوماتتار جوق، ءبىراق ول ءۇشىن تەرمينالدار بار، جولاۋشىلار ونىڭ قىزمەتتەرىن پايدالانا الادى. ول جاعدايلاردىڭ اۋەجاي مەنەدجمەنتىنە قاتىسى جوق. بانكوماتتاردى بانكتەر ءوز قالاۋلارى بويىنشا ورناتۋلارى ءتيىس»، - دەپ ءتۇسىندىردى قاسىمبەكوۆا.
بۇدان بولەك، ەلوردا اۋە ايلاعىنىڭ باسپا ءسوز حاتشىسىنىڭ ايتۋىنشا، دۇكەندەر مەن ءدامحانالار جاڭا تەرمينال اۋماعىندا تاياۋدا ىسكە قوسىلاتىن بولادى. «ەكسپو باستالعانعا دەيىن ءبىز قوناقتاردى قارسى الۋعا ءجۇز پايىز دايىن بولامىز»، - دەپ سەندىردى كاميلا قاسىمبەكوۆا.
