ساۋد ارابياسى، ب ا ءا، ەگيپەت پەن باحرەين كاتارمەن بايلانىسىن ءۇزدى
(فوتو. كاتار ءامىرى شەيح تاميم بين حاماد ءال- تاني پارسى شىعاناعى ەلدەرىنىڭ سامميتىندە. ماناما، 6 -جەلتوقسان 2016 -جىل.)
ساۋد ارابياسى 5 - ماۋسىمدا بۇل شارا «ۇلتتىق قاۋىپسىزدىكتى قامتاماسىز ەتۋ ءۇشىن» جاسالىپ وتىرعانىن مالىمدەدى. ال باحرەين كاتاردى «تەرروريزمدى قولدايدى» جانە باحرەيننىڭ ىشكى ىسىنە كيلىكتى دەپ ايىپتاپ، كاتار ازاماتتارىنا 14 كۇن ىشىندە ەلدەن كەتۋگە بۇيىردى.
ساۋد ارابياسىنىڭ رەسمي اگەنتتىگى ەل بيلىگىنىڭ «حالىقارالىق نورمالار بويىنشا بەرىلگەن دەربەس قۇقىقتارىن قولدانىپ، ۇلتتىق قاۋىپسىزدىگىن تەرروريزم مەن ەكسترەميزم قاۋپىنەن قورعاۋ ءۇشىن» كاتارمەن بايلانىستى ۇزۋگە شەشىم قابىلداعانىن حابارلادى.
باحرەين «كاتار باحرەين كورولدىگىنىڭ تۇراقتىلىعى مەن قاۋىپسىزدىگىنە نۇقسان كەلتىرىپ، ىشكى ىسىنە كيلىگۋىن توقتاتپاي وتىرعاندىقتان» قارىم- قاتىناستى توقتاتقانىن حابارلادى.
ەگيپەت كاتارمەن بۇل ەلدىڭ «تەرروريستىك توپتاردى قولداعانى ءۇشىن» بايلانىستى ۇزگەنىن مالىمدەدى.
كاتاردىڭ بىرىككەن اراب امىرلىكتەرىمەن جانە ا ق ش- تىڭ جاقىن وداقتاسى ساۋد ارابياسىمەن قارىم- قاتىناسى ءبىرازدان بەرى شيەلەنىسىپ تۇرعان.
پارسى شىعاناعى ەلدەرى كاتاردى يرانمەن جانە «مۇسىلمان باۋىرلاستىعى» سياقتى يسلامشىل ۇيىمدارمەن جاقىن بايلانىستا دەپ بىلەدى.
شيەلەنىس 24 - مامىردا كاتاردىڭ رەسمي اقپارات اگەنتتىگى كاتار باسشىسىنىڭ «ا ق ش پرەزيدەنتى دونالد ترامپ اكىمشىلىگىمەن شيەلەنىسكە بايلانىستى باحرەين، ەگيپەت، كۋۆەيت، ساد ارابياسى جانە ب ا ءا ەلدەرى ەلشىلەرىنىڭ ەلدەن شىعارىلعانى» تۋرالى حابارلاماسىن جاريالاعان. كەيىن اگەنتتىك سايتتاعى اقپاراتتى حاكەرلەر جاريالاعانىن مالىمدەگەنىمەن، شيەلەنىس باسەڭسىمەي وتىر.
2014 -جىلى ساۋد ارابياسى، ب ا ءا مەن باحرەين كاتاردىڭ «مۇسىلمان باۋىرلاستىعى» قوزعالىسىنا قولداۋ بىلدىرگەنىنە نارازىلىق تانىتىپ، بۇل ەلدەن ەلشىلەرىن قايتارىپ العان. پارسى شىعاناعى ەلدەرى بۇل قوزعالىستى وزدەرىنە قاۋىپ توندىرەدى دەپ بىلەدى.
www.azattyq.org
