استانادا قازاقستان مەن قىتاي مەديا فورۋمى ءوتتى-فوتو
كەزدەسۋدىڭ باستى تاقىرىبى كورشىلەس ەكى ەلدىڭ ب ا ق سالاسىنداعى ىنتىماقتاستىعىن نىعايتۋ، ءداستۇرلى دوستىقتى تەرەڭدەتۋ باعىتىنداعى پىكىر الماسۋ بولدى، دەپ حابارلايدى قازاقپارات.
جيىندى اشىپ ءسوز سويلەگەن قىتاي اقپاراتتىق ينتەرنەت-ورتالىعىنىڭ باس رەداكتورى ۆان سياوحۋەي ەكى ەلدىڭ اراسىنداعى ىنتىماقتاستىقتى دامىتۋ، ءداستۇرلى دوستىقتى تەرەڭدەتۋدە ب ا ق ءرولى ەرەكشە جوعارى ەكەنىنە نازار اۋداردى. سونىمەن قاتار، سپيكەر جاقىن كۇندەرى رەسمي اشىلاتىن «ەكسپو-2017» حالىقارالىق كورمەسى مەن ش ى ۇ باسشىلارىنىڭ كەزدەسۋىنىڭ ماڭىزىنا توقتالا كەلە، ونىڭ اياسىندا مەديا وكىلدەرىنىڭ پىكىر الماسۋى وزەكتى ەكەنىن جەتكىزدى.
بۇدان بولەك، ونىڭ ايتۋىنشا، جىبەك جولى ەكونوميكالىق بەلدەۋىنىڭ ەكونوميكالىق اسپەكتىلەرىنەن بولەك، ونىڭ مادەني-گۋمانيتارلىق قىرلارىن اقپاراتتىق باعىتتا قولداۋ ەكى ەلگە دە پايدالى.
«ءبىر بەلدەۋ - ءبىر جول» - گۇلدەنۋدىڭ، اشىقتىقتىڭ، بەيبىتشىلىك پەن دامۋدىڭ، يننوۆاتسيا مەن وركەنيەتتىڭ جولى. بۇل جول ءارتۇرلى ەل حالىقتارىنىڭ دامۋ مۇددەلەرىنە ساي كەلەتىن پەرسپەكتيۆاسى جوعارى باعىت. سوندىقتان دا، ەجەلدەن كورشىلەس ەلدەردىڭ باسپا ءسوزى دە بۇل باعىتتاعى ىنتىماقتاستىعىن ارتتىرسا، ۇتاتىنى ءسوزسىز»، - دەدى ۆان سياوحۋەي.
ال قىتاي كوممۋنيستىك پارتياسى و ك ناسيحات ءبولىمى ءمينيسترىنىڭ ورىنباسارى تو چجەن «ءبىر بەلدەۋ - ءبىر جول» باستاماسى قازاقستان مەن قىتاي ينتەگراتسياسىن جاڭا ساتىعا جەتەلەيتىنىن اتاپ ءوتتى.
«بۇل ەكى ەل حالىقتارىنىڭ مۇددەسى ءۇشىن جاسالاتىن ماڭىزدى قادام. سوندىقتان دا، جارقىن بولاشاق ماقساتىندا پرەزيدەنت نۇرسۇلتان نازاربايەۆ جىبەك جولى بەلدەۋىن «نۇرلى جول» باعدارلاماسىمەن ۇشتاستىرۋدى العا تارتتى. ال ءبىزدىڭ ماقساتىمىز ەلدەردىڭ ىسكەرلىك، ەكونوميكالىق ىنتىماقتاستىعىن دۇرىس دارىپتەپ، ايشىقتى كورسەتۋ»، - دەدى تو چجەن.
جۇزدەسۋ بارىسىندا قىتايلىق باق باسشىلارى قازاقستاندىق ارىپتەستەرىمەن اقپاراتتار الماسۋ، ءارتۇرلى باعىتتا بىرلەسكەن جوبالاردى جۇزەگە اسىرۋ تۋرالى ۇسىنىستار جاسادى. جۋرناليستيكا سالاسىندا ماماندار وقىتۋ مەن تاجىريبە الماسۋ تۋراسىندا ءسوز بولدى. ءوز كەزەگىندە «قازاقستان» ر ت ر ك باسقارما ءتوراعاسى ەرلان قارين قازاقستان مەن قىتايدىڭ اسا جاقىن ەلدەر ەكەنىن، بۇل رەتتە اقپارات قۇرالدارىنىڭ مەمىلەكەتارالىق قارىم قاتىناستاردى دامىتۋداعى ءرولى وتە جوعارى ەكەنىن اتاپ ءوتتى.
«ەكسپو-2017» حالىقارالىق كورمەسى قارساڭىندا ۇيىمداستىرىلىپ وتىرعان فورۋمنىڭ ءوز ەرەكشەلىگى بار. بۇل ەڭ ءبىرىنشى كەزەكتە قىتايلىق ارىپتەستەرىمىزدىڭ استاناداعى ايتۋلى شاراعا قولداۋىن بىلدىرەدى. ەكىنشىدەن، 2013-جىلدىڭ كۇزىندە استانادا قىتاي ءتوراعاسى شي جينپيڭ جىبەك جولى ەكونوميكالىق بەلدەۋىن جاريا ەتكەنى بەلگىلى.
تاريحي مالىمدەمەنىڭ ءبىزدىڭ ەلىمىزدە جاريالاي وتىرىپ، جاڭا ەكونوميكالىق دامۋدىڭ تۇجىرىمداماسىن عانا ەمەس، حالىقارالىق ىنتىماقتاستىقتىڭ جاڭا قاعيداتتارىن ايگىلەدى. بۇنداي اۋقىمدى باعدارلامادا ب ا ق- تىڭ دا الاتىن ورنى بار»، - دەدى ە. قارين. ونىڭ ايتۋىنشا، قازاقستان قىتايدىڭ جىبەك جولى بەلدەۋىنە ۇيلەستىرۋ باعىتىندا «نۇرلى جول» باعدارلاماسىن قابىلداعان بىردەن ءبىر ەل.
«سوندىقتان دا، قازاقستان مەن قىتاي «ءبىر بەلدەۋ- ءبىر جول» جوباسىن جۇزەگە اسىرۋدا نەگىزگى سەرىكتەستەر بولا الادى. ال ەكونوميكالىق ىنتىماقتاستىقتى مادەني-گۋمانيتارلىق باعىتتا قولداۋ ەرەكشە ماڭىزدى. بۇل رەتتە ب ا ق ەكى ەل حالقىنىڭ دوستىق جانە ءوزارا تۇسىنىستىك كوپىرى بولا الادى»، - دەدى ول.
ال «قازاقپارات» ح ا ا باس ديرەكتورى اسقار وماروۆ ەجەلدەن كورشى ەكى ەلدىڭ دوستىعى ب ا ق اياسىنداعى ىنتىماقتاستىق ارقىلى بەكي تۇسەتىنىن جەتكىزدى. «ەلباسىنىڭ تاپسىرماسى اياسىندا «قازاقپارات» اگەنتتىگىندە اشىلعان قىتاي رەداكتسياسىنىڭ جۇمىسى بۇعان دالەل بولا الادى.
ورتالىق ازيادا ءبىرىنشى بولىپ اشىلعان قىتاي تىلىندە حابار تاراتۋ ەكى ەل حالىقتارىنىڭ مادەني-گۋمانيتارلىق ينتەگراتسياسىنا ءوز اسەرىن تيگىزىپ كەلەدى. ءبىز قىتايلىق ارىپتەستەرىمىزبەن بىرلەسە وتىرىپ، وسى باعىتتاعى جۇمىستاردى تەرەڭدەتۋگە، اۋقىمىن ارتتىرۋعا مۇددەلىمىز»، - دەدى ا. وماروۆ.
پىكىر الماسۋ فورماتىندا وتكەن فورۋمعا قاتىسۋشىلار مۇنداي باس قوسۋدىڭ ماڭىزدىلىعىنا نازار بۇرىپ، كەزدەسۋدى ءداستۇرلى تۇردە مەرزىم سايىن وتكىزۋ تۋرالى ۇسىنىستار تاستادى.
اۆتور: قانات مامەتقازى ۇلى
