استانادا شومىلۋ ماۋسىمى اشىلدى

استانا. قازاقپارات - استانادا داستۇرگە ساي ماۋسىمنىڭ بىرىندە شومىلۋ ماۋسىمى اشىلدى. بۇگىن «ەسىل» وزەنىنىڭ جاعالاۋىندا ت ج دەپارتامەنتى قىزىل جارتى اي قوعامىنىڭ ەرىكتىلەرى، وڭىرلىك ايروموبيلدى شۇعىل- قۇتقارۋ وتريادىنىڭ ماماندارىمەن بىرلەسىپ «ءبىز سۋداعى قاۋىپسىزدىكتى قولدايمىز» اتتى اۋقىمدى اكسيا وتكىزدى.

 شارا سۋ قويمالارىنداعى قايعىلى جاعدايلاردىڭ الدىن الۋ ءارى ەسكەرتۋ ماقساتىندا ۇيىمداستىرىلىپ وتىر، دەپ حابارلدايدى استانا قالاسىنىڭ اكىمدىگىنىڭ سايتى.

قۇتقارۋشىلار مەن ەرىكتىلەر سۋعا باتىپ بارا جاتقان ادامدى قالاي قۇتقارۋ كەرەكتىگى مەن العاشقى كومەك كورسەتۋدىڭ تاسىلدەرىن كورسەتتى. بۇدان بولەك اكسياعا قاتىسۋشى 200-گە جۋىق ۇلدار مەن قىزدار شومىلۋ ماۋسىمى تاقىرىبىنا ساي فلەشموب ۇيىمداستىردى.

 اكسيا شارتىنا ساي ەرىكتىلەر ءۇش توپقا ءبولىندى. قۇتقارۋ وتريادىنىڭ قۇتقارۋشىلارى، مەديتسينا ورتالىعىنىڭ دارىگەرلەرى، پسيحولوگتاردىڭ جەتەكشىلىگىمەن قاتىسۋشىلار سۋداعى قاۋىپسىزدىكتى ساقتاۋعا شاقىراتىن «ءبىز سۋداعى قاۋىپسىزدىكتى قولدايمىز» ترانسپارانتتار مەن پلاكاتتار جانە ۇنپاراقتارمەن ەسىل وزەنىنىڭ جاعاسىندا جاياۋ ءجۇرىپ ءوتتى.

فلەشموبقا قاتىسۋشىلار مەن بەلسەندىلەرگە ۇيىمداستىرۋشىلار اتىنان العىس حاتتار مەن سۋۆەنيرلەر تابىستالدى.

 ت ج د ماماندارى جازعى ماۋسىم باستالىسىمەن سۋداعى قايعىلى جاعدايلاردىڭ ارتاتىنىن ەسكەرتەدى. قاراپايىم ەرەجەلەردى ەسكەرمەۋ سالدارىنان سۋعا باتىپ كەتۋ وقيعالارى ورىن الىپ جاتادى. بۇل وتە كۇردەلى ماسەلە.

 ستاتيستيكانىڭ مالىمەتىنە سۇيەنسەك، سۋداعى قايعىلى جاعدايلاردىڭ 70 پايىزى الكوگولدى ىشىمدىكتىڭ سالدارى. سۋعا كەتۋدىڭ 98 پايىزدان استام سەبەبى - جابدىقتالماعان جانە تىيىم سالىنعان جەرلەردە شومىلۋ. جاعاجايلاردا دا ەرەجەنى ۇمىتپاعان ءجون. كۇن ىستىق كەزدەرى 1000 ادامعا دەيىن دەمالادى. سول سەبەپتەن «سۋداعى ەرەجەلەردى ساقتاۋ» تارتىبىنە باعىنۋ ءارى ونىڭ ساقتالۋىنا ءمان بەرۋ ارقىلى قاۋىپسىز دەمالىس ۇيىمداستىرۋعا بولادى.