سيرياعا كەتكەندەردىڭ بالالارىن قايتارۋ قيىن ماسەلە - ساياسات تانۋشى

استانا. قازاقپارات -  ساياسات تانۋشى ەرلان قارين سيرياعا كەتكەن جانە سوندا قازا بولعان دەلىنەتىن قازاقستاندىق وتباسىلاردىڭ بالالارىن قازاقستانعا قايتارۋدىڭ قيىن ەكەنىن مالىمدەدى.

بۇل تۋرالى قارين 30 - مامىردا الماتىدا ساياساتتانۋشى دوسىم ساتبايەۆتىڭ «ءسوز» ادەبي جوباسى بويىنشا تانىستىرىلعان ءوزىنىڭ «ي گ ي ل مەن ءال كايدانىڭ اراسىندا. سيريا سوعىسىنداعى ورتالىق ازيا سودىرلارى» دەپ اتالاتىن كىتابىنىڭ تۇساۋكەسەرىندە ازاتتىق ءتىلشىسىنىڭ سۇراعىنا جاۋابىندا ايتتى. ەرلان قاريننىڭ ايتۋىنشا، كىتاپ اۆتورلارىنىڭ ءبىرى - ا ق ش ساراپشىسى دجەيكوب زەنن.

- ەڭ الدىمەن اتا- انالارىنىڭ رۇقساتىن الۋ قيىن. كوبىسى سانالى تۇردە كەتتى، سانالى تۇردە قايتقىلارى كەلمەيدى. بۇل - پروبلەما. ەكىنشىدەن، زاڭدىق تۇرعىدان قيىن. ءبىز مىسالىعا كورشىلەس كەيبىر مەملەكەتتەر سياقتى بارىپ باسىنا قاپشىق كيگىزىپ قويىپ زاڭسىز تۇردە الىپ كەتەتىن ەل ەمەسپىز. زاڭدى تۇردە شەشىلۋى كەرەك. سوندىقتان مۇندا كوپ جاعدايلار سوت شەڭبەرىندە تالقىلانىپ جاتىر، قايتىپ جاتقاندار بار. بۇل ەندى تىكەلەي ءاربىر جاعدايمەن ارنايى اينالىساتىن ماسەلە. بۇل اۋىر تاقىرىپ، - دەدى ەرلان قارين.

وسىعان دەيىن ازاتتىقتا جاريالانعان ماقالالاردا بالاسى سيريادا قازا بولعانىن، سوندا قالعان كەلىنى مەن نەمەرەلەرىن قازاقستانعا قالاي قايتارۋدى بىلمەي جۇرگەنىن ايتىپ بىرنەشە اتا- انا شاعىمدانعان. ۇ ق ك تاراتقان دەرەكتەرگە قاراعاندا، سيرياعا قازاقستاننىڭ راديكالدى ءدىني كوزقاراستاعى 300-دەن استام ازاماتى كەتكەن. ولاردىڭ ءبىرقاتارى ايەلى مەن بىرنەشە بالاسىن بىرگە اكەتسە، قازاقستانداعى اتا- انالارىنىڭ ايتۋىنشا كەيبىرەۋلەرى سيريا مەن يراك اۋماعىنا بارىپ تاعى دا بالالى بولعان.

اسىلحان ماماش ۇلى