استانادا ەكسپوعا ارنالعان كورمەلەر توپتاماسى اشىلدى
قور كورمەلەرى «مۋزەي جيناقتارى» مۋزەيتانۋ باعدارلاماسىنىڭ اياسىندا ۇيىمداستىرىلعان. ۇسىنىلعان توپتامالاردىڭ قۇندىلىعى قازاقستاننىڭ تۇڭعىش پرەزيدەنتى ن. نازاربايەۆتىڭ ەلىمىزدىڭ زاماناۋي مەملەكەتتىلىك تۇجىرىمداماسىن قالىپتاستىرۋداعى الەمدىك قاۋىمداستىقپەن كونسترۋكتيۆتى ىنتىماقتاستىق قۇرۋى نەگىزىندەگى قىزمەتىنىڭ ناتيجەسىن كورسەتەدى.
«مۋزەي جيناقتارى» مۋزەيتانۋ باعدارلاماسى تاقىرىپتىق باعىتتار، جيناقتار بويىنشا قازاقستان رەسپۋبليكاسىنىڭ تۇڭعىش پرەزيدەنتى - ەلباسى كىتاپحاناسىنىڭ قورىنداعى بىرەگەي ەكسپوناتتاردى زەرتتەۋ جانە ناسيحاتتاۋدى كوزدەيدى. سونداي-اق، جەكە جيناقتار كىتاپحانا جانە مۋزەي عيماراتتارىنىڭ ەكسپوزيتسيالارىندا ۇسىنىلعان.
بۇل كورمە توپتاماسىنىڭ ماتەريالدارى كوپشىلىك نازارىنا العاش رەت ۇسىنىلىپ وتىر. «ەكسپو-2017» كورمەسىنىڭ اشىلۋى قارساڭىندا قانداي جيناقتاردى ۇسىنۋ قاجەتتىگىن زەردەلەۋ بارىسىندا ءبىز الەمدىك تاريحي-مادەني مۇرالار شەڭبەرىندە قازاق مادەنيەتىنىڭ تاماشا ۇلگىلەرىن كورسەتۋ يدەياسىن باسشىلىققا الدىق»، - دەدى ەلباسى كىتاپحاناسى ديرەكتورىنىڭ ورىنباسارى ءامىرحان راقىمجانوۆ كورمەنى اشقان العى سوزىندە.
ەلباسى كىتاپحاناسى ديرەكتورىنىڭ ورىنباسارى كۇلايشا اقتايەۆا 2012-جىلى استانانىڭ «ەكسپو-2017» حالىقارالىق مامانداندىرىلعان كورمەنى وتكىزۋ ورنى رەتىندە تاڭدالۋى قازاقستاننىڭ حالىقارالىق قاۋىمداستىققا ەنۋىنىڭ ماڭىزدى كەزەڭى بولعانىن اتاپ ءوتتى.
«تاقىرىپتىق قور كورمەلەرى توپتاماسىنا «بولاشاقتىڭ ەنەرگياسىن قارسى الامىز!» تاقىرىبىن كەزدەيسوق بەرىپ وتىرعان جوقپىز.
بىرىنشىدەن، ەكسپو ءبىزدىڭ حالىق شارۋاشىلىعى سالالارىنا ۇلكەن مۇمكىندىكتەر بەرەدى. ەكىنشىدەن، ءبىز كورمەنى تاماشالاۋعا كەلگەن قوناقتار زاماناۋي استانانى عانا ەمەس، سونىمەن قاتار ەلباسى كىتاپحاناسىنىڭ مۋزەي قورىنىڭ جيناقتارى ارقىلى تانىلىپ وتىرعان كوپ ۇلتتى حالقىمىزدىڭ تامىرى تەرەڭ تاريحى مەن سان قىرلى مادەنيەتىن، سىرتقى ساياساتىمىزدىڭ كوپ ۆەكتورلى جەتىستىكتەرىن كورگەنىن قالايمىز»، - دەدى ول.
ايتا كەتەرلىگى، «بولاشاقتىڭ ەنەرگياسىن قارسى الامىز!» قور كورمەلەرىنىڭ توپتاماسى 2017-جىلدىڭ 31- تامىزىنا دەيىن جالعاسادى.
اۆتور: مارلان جيەمباي
