تاريح ساباقتارىن ەستە ساقتاۋ كەرەك - نۇرسۇلتان نازاربايەۆ

استانا. قازاقپارات - قازاقستان پرەزيدەنتى نۇرسۇلتان نازاربايەۆ حالىققا تاريح ساباقتارىن ەستە ساقتاۋعا شاقىردى، دەپ حابارلايدى قازاقپارات.

بۇگىن ەلباسى نۇرسۇلتان نازاربايەۆ اقمولا وبلىسى اقمول اۋىلىندا ورنالاسقان «الجير» مۋزەيىندە بولىپ، ساياسي-قۋعىن سۇرگىن قۇرباندارىنا تاعزىم ەتتى.

«ساياسي قايراتكەرلەرمەن بىرگە ولاردىڭ ايەلدەرى مەن بالالارىن دا رەپرەسسيالادى. الجير-دە قولدارىندا كىشكەنتاي سابيلەرى بار ايەلدەر وتىردى. كەيبىر بالالار وسىندا دۇنيە ەسىگىن اشتى. وسىنداي قاتىگەزدىك بولدى. اتالمىش مۋزەي از دا بولسا، سونىڭ ءبىر بولشەگىن كورسەتەدى»، - دەدى نازاربايەۆ.

ەلباسى سول زاماندى ەسكە الۋ قيىن ەكەندىگىن اتاپ ءوتتى. «ءبىز مۇلدەم وزگە مەملەكەت قۇردىق. ءاربىر ادامنىڭ قۇقىقتارى مەن بوستاندىقتارى ساقتالاتىن قۇقىقتىق مەملەكەت جاسادىق. سوندىقتان قازاقستاندا بىردە-ءبىر ساياسي تۇتقىن جوق. سوندىقتان وسىنى باعالاۋىمىز كەرەك»، - دەيدى پرەزيدەنت.

مەملەكەت باسشىسى ساياسي قۋعىن-سۇرگىن توڭكەرىستەن كەيىن بولعانىن دا تىلگە تيەك ەتتى.

«بىردە-ءبىر ريەۆوليۋتسيا ادامعا، مەملەكەتكە جاقسىلىق اكەلمەگەن. سوڭعى جىلدارى ورىن العان ريەۆوليۋتسيالار مەملەكەتتى شايقالتىپ، حالىقتارى 10-15 جىلعا بەرەكە تاپپاي تەنتىرەدى، تەرروريزم، كىسى ءولتىرۋ، بانديتيزم ءورشىدى. سوندىقتان بىزگە ەۆوليۋتسيالىق دامۋ قاجەت. سول كەزدە عانا العا جىلجيمىز. تاريحتىڭ ساباعىن ۇمىتپاۋىمىز كەرەك»، - دەدى ەلباسى.