ەكسپوعا كەلەتىن شەتەلدىك جۇلدىزدار نەنى تالاپ ەتەدى؟
«ەندى، ۇلكەن جۇلدىزداردىڭ ءبارى ءارتۇرلى تالاپ قويادى. ولار كوپ جەردە بولادى. سوندىقتان سان الۋان تالاپتاردىڭ ورىندالعانىن قالايدى. مەن ءوزىم ەكسپوعا دەيىن وسى بيزنەسپەن ون جىلداي اينالىستىم. ءوز باسىم كوپ جۇلدىزدارمەن جۇمىس ىستەدىم، كونسەرتتەرگە تارتتىم. ولاردىڭ قويعان تالاپتارى تىم جوعارى دەپ ايتا المايمىن. ماسەلەن، ولار قاعاز مايلىقتاردىڭ ناقتى ءبىر ماركاسىن قالايدى. سوسىن ىشەتىن سۋدىڭ دا ناقتى ءبىر ماركاسى بولسىن دەدى. سول سۋدىڭ تەمپەراتۋراسىن ساقتاۋ قاجەت بولدى. اللەرگيانى قوزدىراتىن گۇلدەردىڭ بولماعانىن قالادى جانە تاعىسىن تاعى. بۇنىڭ ءبارىن ەش قيىندىقسىز ورىنداۋعا بولادى»، - دەدى وماروۆ استانادا وتكەن باسپا ءسوز ءماسليحاتىندا.
ايتا كەتەيىك، باسپا ءسوز ءماسليحاتىندا مارات وماروۆ كورمە اياسىندا وتەتىن كونسەرتتەردىڭ ءتىزىمىن جاريالاعان بولاتىن. ونىڭ ايتۋىنشا، كورمە اياسىنداعى شارالارعا الەمگە تانىمال جۇلدىزدار دا كەلەدى.
وسى شارادان كەيىن «استانا ەكسپو-2017» ۇلتتىق كومپانياسى جۋرناليستەرگە الەمگە تانىمال ديۋ سولەي سيركىنىڭ دايىندىعىن دا كورسەتىپ بەردى. بۇقارالىق اقپارات قۇرالدارىنىڭ وكىلدەرى ساحنانىڭ ارعى جاعىندا بولىپ، الداعى ەكسكليۋزيۆتى شوۋدىڭ سەناريىمەن تانىسىپ شىقتى. سيرك ارتىستەرى بولسا، ءبىر ءنومىرىن كورسەتتى. استاناداعى ەكسپو-2017 كورمەسىنە بيلەت العاندا ناقتى ءبىر كونسەرتكە ىڭعايلىپ العان ءجون. سەبەبى ءدال وسى بيلەتپەن سان الۋان مادەني-بۇقارالىق شارالارعا دا تەگىن قاتىسۋعا بولادى.
