ەكسپو بيلەتىمەن قانداي كونسەرتتەرگە تەگىن كىرۋگە بولادى؟
سەبەبى ءدال وسى بيلەتپەن سان الۋان مادەني-بۇقارالىق شارالارعا دا تەگىن قاتىسۋعا بولادى، دەپ حابارلايدى قازاقپارات ءتىلشىسى.
«كونسەرتتەردىڭ ءبىر بولىگى تەگىن بولادى. ونداي شارالار اشىق الاڭداردا وتەدى. ماسەلەن، ەكسپو كورمەسىنىڭ امفيتەاترىنا ەش كەدەرگىسىز كىرۋگە مۇمكىندىك بار. قولىڭىزدا كورمەگە كىرەتىن بيلەت بولسا بولدى. ال جابىق الاڭداردا وتەتىن كونسەرتتەرگە بولەك بيلەت الۋ قاجەت. الايدا ونداي بيلەتتىڭ باعاسى قىمبات بولمايدى. جابىق كونسەرتتەرگە ءاربىر ادام بارا الاتىنداي باعا قويىلادى»، - دەيدى «استانا ەكسپو-2017» ۇلتتىق كومپانياسى ءىس-شارالاردى ۇيىمداستىرۋ جانە كونتەنت دەپارتامەنتىنىڭ ديرەكتورى مارات وماروۆ.
ونىڭ ايتۋىنشا، كورمە ايماعىندا امفيتەاتر (10 مىڭ ورىندىق)، كامەرالىق زال (مىڭ ورىندىق) جانە كونگرەسس ورتالىعى (2,1 مىڭ ورىندىق) بار. امفيتەاتردا «ۇلى دالا سيمفونياسى»، MTV كونسەرتى سياقتى ۇلكەن شارالار ۇيىمداستىرىلادى.
ايتا كەتەيىك، بۇگىنگى باسپا ءسوز ءماسليحاتىندا مارات وماروۆ كورمە اياسىندا وتەتىن كونسەرتتەردىڭ ءتىزىمىن جاريالاعان بولاتىن. وسى شارادان كەيىن «استانا ەكسپو-2017» ۇلتتىق كومپانياسى جۋرناليستەرگە الەمگە تانىمال ديۋ سولەي سيركىنىڭ دايىندىعىن دا كورسەتىپ بەردى.
بۇقارالىق اقپارات قۇرالدارىنىڭ وكىلدەرى ساحنانىڭ ارعى جاعىندا بولىپ، الداعى ەكسكليۋزيۆتى شوۋدىڭ سەناريىمەن تانىسىپ شىقتى. سيرك ارتىستەرى بولسا، ءبىر ءنومىرىن كورسەتتى.
