ارالدى قۇتقارۋ ءۇشىن بۇدان دا اۋقىمدى جۇمىس اتقارىلۋى ءتيىس - گۇلشارا ءابدىقالىقوۆا
فورۋمعا قىزىلوردا وبلىسىنىڭ اكىمى، پارلامەنت ءماجىلىسىنىڭ دەپۋتاتتارى، ءبىرقاتار ەلدەردىڭ ەلشىلەرى، ورتالىق جانە جەرگىلىكتى مەملەكەتتىك اتقارۋشى ورگانداردىڭ، حالىقارالىق جانە ۇكىمەتتىك ەمەس ۇيىمداردىڭ وكىلدەرى، عالىمدار مەن ساراپشىلار قاتىستى.
گۇلشارا ءابدىقالىقوۆا ارال تەڭىزىنىڭ قاسىرەتى اۋىر ەكولوگيالىق اپاتتىڭ ءبىرى بولىپ وتىرعانىن جانە مۇنىڭ تابيعاتقا نەمقۇرايلى قاراۋدىڭ سالدارى ەكەنىن ايتتى.
مەملەكەتتىك حاتشى ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا پراگماتيزم تۋرالى «بۇل ءوزىڭنىڭ ۇلتتىق جانە جەكە بايلىعىڭدى ناقتى ءبىلۋ، ونى ۇنەمدى پايدالانىپ، سوعان سايكەس بولاشاعىڭدى جوسپارلاي الۋ» ەكەنىنە نازار اۋدارعانىن اتاپ ءوتتى.
حالىقارالىق ارالدى قۇتقارۋ قورى جۇمىس جۇرگىزىپ كەلگەن جىلدار ىشىندە ارال توڭىرەگىن ەكولوگيالىق تۇرعىدان ساۋىقتىرۋ جانە الەۋمەتتىك-ەكونوميكالىق پروبلەمالارىن شەشۋ جونىندەگى باعدارلامالار جۇزەگە اسىرىلدى.
قازاقستان دۇنيەجۇزىلىك بانكتىڭ قولداۋىمەن تەڭىزدىڭ سولتۇستىك بولىگىن قالپىنا كەلتىردى. بۇدان دا اۋقىمدى جۇمىس اتقارىلۋى ءتيىس ەكەندىگى اتاپ ءوتىلدى.
گ. ءابدىقالىقوۆا ارال تەڭىزى الابىنىڭ پروبلەمالارىن شەشۋ ىسىنە حالىقارالىق قوعامداستىق قولداۋ كورسەتىپ، ورتالىق ازيا مەملەكەتتەرى بۇل باعىتتا ودان ءارى كۇش-جىگەرىن جۇمىلدىرا بەرەدى دەپ ۇمىتتەنەتىنىن جەتكىزدى. فورۋم اياسىندا ارال توڭىرەگىن وڭالتۋ جونىندەگى ناقتى جاڭا جوبالار جانە ورنىقتى دامىتۋ باعدارلامالارى باستاۋ الدى.
بيوالۋاندىلىقتى ساقتاۋعا، شولەيتتەندىرۋدى توقتاتۋعا جانە كوگالداندىرۋعا، عىلىمي-زەرتتەۋ جۇمىستارىن ۇيلەستىرۋگە، الەۋمەتتىك ينفراقۇرىلىمدى دامىتۋعا باعىتتالعان مەموراندۋمدار مەن كەلىسىمشارتتارعا قول قويىلدى.
سونىمەن قاتار، مەملەكەتتىك حاتشى قارماقشى اۋدانىندا بولىپ، ونداعى «قورقىت اتا» كەشەنىن ارالادى. «جىراۋلار ءۇيى» مادەنيەت ءۇيىنىڭ قىزمەتىمەن، اۋداندىق مۇراجاي جانە كىتاپحانا جۇمىسىمەن تانىسىپ، زيالى قاۋىم وكىلدەرىمەن كەزدەستى.
