مينيسترلەر حالىق الدىندا ەسەپ بەرۋدى باستادى

استانا. قازاقپارات - وسى اپتادا ق ر مادەنيەت جانە سپورت ءمينيسترى ارىستانبەك مۇحامەدي ۇلى، ق ر ءبىلىم جانە عىلىم ءمينيسترى ەرلان ساعاديەۆ جانە ق ر ەنەرگەتيكا ءمينيسترى قانات بوزىمبايەۆ حالىق الدىندا ەسەپ بەرەدى، دەپ حابارلايدى قازاقپارات.

بۇل تۋرالى ورتالىق كوممۋنيكاتسيالار قىزمەتىنىڭ رەسمي وكىلى وكسانا لوسكۋتوۆا اپتانىڭ وقيعالار كۇنتىزبەسىن بايانداۋ بارىسىندا ءمالىم ەتتى.

ونىڭ ايتۋىنشا، بۇگىن 29- مامىردا اتقارىلعان جۇمىستار تۋرالى قوعامدىق كەڭەس الدىنداعى ەسەپتى ق ر مادەنيەت جانە سپورت ءمينيسترى ارىستانبەك مۇحامەدي ۇلى باستايدى. 31- مامىردا ق ر ءبىلىم جانە عىلىم ءمينيسترى ەرلان ساعاديەۆتىڭ، ال 1- ماۋسىمدا ق ر ەنەرگەتيكا ءمينيسترى قانات بوزىمبايەۆتىڭ حالىق الدىنداعى ەسەپ بەرۋ كەزدەسۋلەرى وتەدى.

سونىمەن بىرگە، اپتانىڭ العاشقى كۇنى ق ر سەناتىنىڭ اگرارلىق ماسەلەلەر، جەر قويناۋىن پايدالانۋ، جانە اۋىلدىق اۋماقتى دامىتۋ كوميتەتىنىڭ كەڭەيتىلگەن وتىرسىندا ق ر كەيبىر زاڭنامالىق اكتىلەرىنە وسىمدىك جانە جانۋارلار الەمى ماسەلەسى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى تالقىلانادى.

30- مامىردا سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ كەڭەيتىلگەن وتىرىسى ق ر جانە ر ف ۇكىمەتتەرى اراسىندا اۆياتسيالىق ىزدەۋ جانە قۇتقارۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى زاڭ جوباسىن تالقىلاۋعا ارنالادى.

31- مامىردا سەناتتا قازاقستان رەسپۋبليكاسىنداعى تۇرمىستىق قاتتى قالدىقتاردى جويۋ ماسەلەسى ءوڭىر دەپۋتاتتار توبىنىڭ دوڭگەلەك ۇستەلىندە تالقىلانادى.

1- ماۋسىمدا ق ر پارلامەنتىنىڭ كۇن تارتىبىندە ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ كەڭەيتىلگەن وتىرىسى وتەدى. قاتىسۋشىلار ق ر كەيبىر زاڭنامالىق اكتىلەرىنە جەرگىلىكتى ءوزىن-ءوزى باسقارۋ، دامىتۋ بويىنشا وزگەرتۋلەر مەن تولىقتىرۋلارعا قاتىستى زاڭ جوباسىن تالقىلايدى. سونداي-اق، بۇل كۇنى ق ر پارلامەنتى ءماجىلىسىنىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ دوڭگەلەك ۇستەلى وتىرىسىندا «100 ناقتى قادام ۇلت جوسپارى» اياسىنداعى اقپاراتتىڭ قولجەتىمدىلىگى تۋرالى زاڭنىن ورىندالۋى تالقىلانادى.

ورتالىق مەملەكەتتىك ورگانداردا دا بۇل اپتاعا ءبىرقاتار ماڭىزدى شارالار جوسپارلانعان. بۇگىن ق ر قورعانىس مينيسترلىگى ۇجىمدىق قاۋىپسىزدىك تۋرالى شارت ۇيىمىمەن بىرلەسىپ، 31- مامىردا اياقتالاتىن «مىزعىماس باۋىرلاستىق-2017» بىرلەسكەن جاتتىعۋىن باستايدى.

2- ماۋسىم كۇنى شىۇ مۇشە مەملەكەتتەرى، مادەنيەت مينيسترلەرىنىڭ كەڭەسى وتەدى. وسى اپتادا بارلىق وڭىرلەردە ساياسي قۋعىن-سۇرگىن مەن اشارشىلىق قۇرباندارىن ەسكە الۋعا ارنالعان شارالار ۇيىمداستىرىلادى.

29- مامىر كۇنى تارازدا «ەل رامىزدەرى ەلدىگىمىزدىڭ بەرىك نەگىزى» اتتى عىلىمي تاجىريبەلىك كونفەرەنسيا وتەدى. 31- مامىردا پاۆلودار جانە اقتوبە وبلىستارىندا ميتينگتەر ءوتىپ، گۇل شوقتارىن قويۋ ءراسىمى بولادى. 1- ماۋسىمدا قازاقستان حالىقارالىق بالالاردى قورعاۋ كۇنىن اتاپ وتەدى. قوستاناي، باتىس جانە شىعىس قازاقستان وبلىس ورتالىقتارىنىڭ باستى كوشەلەرىندە بالالار مەن جاستاردىڭ مۋزىكالىق انسامبلدەرىنىڭ شەرۋى وتەدى. بۇل اپتادا ورتالىق كوممۋنيكاتسيالىق قىزمەتى الاڭىندا ءبىرقاتار باسپا ءسوز كونفەرەنسيالارى وتەدى.

بۇگىن 70 كانن حالىقارالىق كينوفەستيۆالىنەن كەلگەن قازاقستاندىق دەلەگاتسيانىڭ ەڭ جارقىن ساتتەرى تۋرالى ەۋرازيا كينوفەستيۆالىنىڭ پرەزيدەنتى، قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجايەۆا ايتىپ بەرەدى.

2- ماۋسىمدا باتىس قازاقستان وبلىسىنداعى كيەلى ورىندار بويىنشا گەوگرافيلىق قوعامىنىڭ ەكپەديتسياسى جانە ونىڭ ەرەكشەلىگى تۋرالى نازاربايەۆ ۋنيۆەرسيتەتىنىڭ يننوۆاتسيالار بويىنشا ۆيتسە-پرەزيدەنتى قانات بايعارين اڭگىمەلەيدى.

اۆتور: ايجان سەرىكجان قىزى