ديماش جەكە كونسەرتىنە جاڭا اندەر جازىپ جاتىر

استانا. قازاقپارات - قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجايەۆانىڭ ايتۋىنشا، ديماش قۇدايبەرگەن ءوزىنىڭ رەپەرتۋارىن جاڭارتىپ جاتىر، دەپ حابارلايدى قازاقپارات ءتىلشىسى.

  «قازىرگى كەزدە ول Hunan TV ستۋدياسىندا جاڭا اندەرىن جازۋدا. ءبىراق قانداي اندەر جانە كىمنىڭ جازعانى تۋرالى ازىرشە ايتا المايمىز. نەگىزى جاڭا ءاندى جازۋ وڭاي ەمەس قوي. كونسەرتكە ءبىر اي ۋاقىت قالدى. ديماشتىڭ جۇرەككە جاقىن اندەردى ورىندايتىنىن بىلەمىز. سونىڭ ءبارىن جەكە كونسەرتىندە تىڭداي الاسىزدار. جالپى وعان رەپەرتۋاردى ۇنەمى جاڭارتىپ وتىرۋ قاجەت. ول شىعارماشىلىق ءۇشىن، ءانشى رەتىندە ءوسۋ ءۇشىن كەرەك"، - دەدى ا. مۇساقوجايەۆا جۋرناليستەرگە بەرگەن سۇحباتىندا.

ونىڭ ايتۋىنشا، كونسەرتتە ديماشپەن بىرگە ءان ايتاتىن ەسترادا جۇلدىزدارى ءالى انىقتالعان جوق. دەگەنمەن، اعايىندى مەلادزە، لارا فابيان، سونداي- اق قازاقستاندىق انشىلەرمەن كەلىسسوزدەر ءجۇرىپ جاتىر. "ارينە، "I am Singer" بايقاۋىندا ديماشپەن بىرگە ونەر كورسەتكەن انشىلەردىڭ كەلگەنىن دە قالار ەدىك. سەبەبى ولار بىرگە دە، بولەك تە ءان ايتا الادى. بايقاۋ انشىلەرىنىڭ قازاقستانعا كەلۋ- كەلمەۋىنە قاتىستى ناقتى ەشتەڭە ايتا المايمىن. دەگەنمەن، قىتايلىق جۇلدىزداردىڭ Hunan TV مەن كەلىسىمدەرى بار ەكەنىن ەسكەرسەك، كونسەرتكە ولاردىڭ دا كەلۋى بەك مۇمكىن"، - دەپ اتاپ كورسەتتى ۋنيۆەرسيتەت باسشىسى.

ايتا كەتەيىك، بۇعان دەيىن مينيستر ارىستانبەك مۇxامەدي ۇلى دا ديماشتىڭ كونتسەرتى جايىندا ايتقان بولاتىن. " ءبىز قىتايلىق Hunan TV ارناسىمەن كەلىسىمشارتتى راسىمدەدىك. شوۋ وتە قىزىقتى بولادى. سەبەبى وعان ۇزدىك رەجيسسەرلەر تارتىلۋدا. قازىرگى كەزدە ءبىز ەسترادالىق- سيمفونيالىق وركەستردى جاساقتادىق. ديريجەردى دە انىقتاپ قويدىق. ال ديماشپەن بىرگە ءان ايتاتىن ارتىستەر تۋرالى ازىرگە ەشتەڭە ايتا المايمىن. ويتكەنى كەلىسىمشارت تالاپتارى ناقتىلانۋدا"، - دەدى مۇحامەدي ۇلى بۇگىن جۋرناليستەرگە بەرگەن سۇحاتىندا.

 اۆتور: ارمان اسقاروۆ