ادىلەت مينيسترلىگى قازاقستاندا ادۆوكاتتار قىزمەتىنىڭ قۇنى جوعارى ەكەنىن اتادى
«قازىرگى كەزدە ەلىمىزدىڭ ادۆوكاتۋراسى رەسپۋبليكالىق ادۆوكاتتار القاسىمەن جانە 16 اۋماقتىق القامەن قامتىلىپ وتىر. قورعاۋشىلار كورپۋسىنىڭ جالپى سانى ءتورت مىڭعا جۋىق. دەگەنمەن دە بۇگىندە قازاقستاندا ادۆوكاتتاردىڭ جەتىسپەۋشىلىگى بايقالۋدا، ياعني ولاردىڭ قازىرگى سانى ازاماتتاردىڭ زاڭگەرلىك كومەككە تولىققاندى قولجەتىمدىلىگىنە جەتكىلىكسىز»، - دەپ توقتالدى مينيستر.
ونىڭ سوزىنە قاراعاندا، ەلىمىزدە شامامەن ءبىر قورعاۋشىعا شاققاندا شامامەن 3900 ازاماتتان كەلەدى. ماسەلەن، بۇل كورسەتكىشكە يتاليادا -260، گەرمانيادا - 500، ال انگليادا 900 ادامنان تيەسىلى. بۇگىندە ادۆوكاتتاردىڭ جەتىسپەيتىندىگى تۋرالى ماسەلەنى جوعارعى سوتتا دا كوتەرىلۋدە.
«ەلىمىزدە وسىنداي قىزمەتتەرگە مۇقتاج ازاماتتار ونى ءتيىستى دەڭگەيدە الماۋدا نەمەسە قىزمەتتىڭ قۇنى تىم جوعارى. 2013-تەن 2016 -جىل ارالىعىندا قورعاۋشىلاردىڭ سانى ءبىرشاما ءوستى، ياعني شامامەن 300 ادامعا ارتتى»، - دەيدى بەكەتايەۆ.
بۇگىندە وسى كاسىپكە كىرۋ ءۇشىن قولدانىستاعى راسىمگە جاسالعان تالداۋعا توقتالاتىن بولساق، ادۆوكات بولۋ ءۇشىن جوعارى زاڭگەرلىك ءبىلىمدى مەڭگەرىپ، ادۆوكاتتار القاسىندا التى ايدان ءبىر جىلعا دەيىنگى مەرزىمدە تاعىلىمدامادان ءوتۋى ءتيىس. سونىمەن قاتار ولار اتتەستاتسيانى ەڭسەرىپ، قورعاۋشىلار القاسى مۇشەلىگىنە ەنۋى قاجەت.
«تاعىلىمداما اقىلى جانە ونىڭ قۇنى جىلىنا 140-تان 280 مىڭ تەڭگەگە دەيىن. القانىڭ قۇرامىنا ەنۋ ءۇشىن وڭىرلەرگە بايلانىستى باستاپقى جارنا 700-دەن 800 مىڭ تەڭگەگە دەيىن جەتەدى. زاڭعا سايكەس، جارنانىڭ مولشەرىن انىقتاۋ وبلىستىق ادۆوكاتتار القاسىنىڭ قۇزىرىنا تيەسىلى. وسى ارقىلى ادۆوكات مارتەبەسىن الۋ ءۇشىن بىرنەشە كۇردەلى راسىمنەن ءوتىپ، 1 ميلليون تەڭگەگە جۋىق قارجى تولەۋ قاجەت بولادا»، - دەپ ناقتىلادى ۆەدومستۆو باسشىسى.
وسى ورايدا ادىلەت مينيسترلىگىمەن اتالعان ماماندىققا قولجەتىمدىلىكتى جەڭىلدەتۋ ءۇشىن رەسپۋبليكالىق ادۆوكاتتار القاسىمەن بىرلەسە باستاپقى جارنانى 100 اەك- كە دەيىن (226900 تەڭگە) جانە تاعىلىمدامانى ايىنا 5 ا ە ك- كە دەيىن (11345 تەڭگە) تومەندەتۋ ماسەلەسى قارالۋدا.
اۆتور: رۋسلان عابباسوۆ
