وڭتۇستىك قازاقستان وبلىسىندا «مەرەيلى وتباسى» بايقاۋىنىڭ جەڭىمپازدارى انىقتالدى - فوتو
وبلىستىق ىشكى ساياسات باسقارماسى ۇيىمداستىرعان شاراعا قالا-اۋدانداردان 30 جانۇيا قاتىستى، دەپ حابارلايدى قازاقپارات ح ا ا ءتىلشىسى.
ءۇش كەزەڭنەن تۇراتىن (اۋداندىق، وبلىستىق، رەسپۋبليكالىق) بايقاۋعا 322 جانۇيا قاتىسۋعا تىلەك بىلدىرگەن.
ال، جەڭىمپاز بولىپ شىمكەنتتىك كانالباي سەيىلبەك ۇلى مەن ورداباسى اۋدانىنان كەلگەن وماش شاپايەۆتىڭ جانۇيالارى تانىلدى.
قوس جانۇياعا استانا قالاسىندا وتەتىن رەسپۋبليكالىق بايقاۋعا جولداما بەرىلدى. ودان بولەك 28 وتباسىعا باعالى سىيلىقتار مەن وبلىس اكىمىنىڭ العىس حاتى تابىستالدى. شاراعا قاتىسقان وبلىس اكىمىنىڭ ورىنباسارى ۇلاسبەك سادىبەكوۆ ءوڭىر باسشىسى جانسەيىت قانسەيىت ۇلىنىڭ قۇتتىقتاۋىن جەتكىزدى.
«وڭىردە 4-رەت ۇيىمداستىرىلىپ وتىرعان بايقاۋدىڭ ماقساتىن وزدەرىڭىز جاقسى ءتۇسىنىپ وتىرسىزدار. ەلباسىنىڭ ءوزى باستاپ، بۇل بايقاۋعا ۇلتتىق دارەجەدەگى اتاق بەرىلۋىنىڭ ءوزى ۇلتتىق وتباسىلىق قۇندىلىقتاردى دارىپتەۋدىڭ ماڭىزىن ايشىقتاي تۇسەدى.
«وتان وتباسىنان باستالادى» دەپ جاتادى. ەگەر وتباسىندا بەرەكە بولسا، وتباسىندا ىنتىماق بولساتىن بولسا، وندا ءبىزدىڭ ورتاق وتانىمىز قازاقستاندا ىنتىماق، قازاقستاندا بەرەكە بولادى» دەدى ۇلاسبەك سادىبەك ۇلى.
ايتا كەتەيىك، بۇل بايقاۋعا دەگەن جۇرتتىڭ قىزىعۋشىلىعى جىلدان جىلعا ارتىپ كەلەدى. بىلتىر وبلىستان 294 وتباسى قاتىسقان بولسا، بيىل قاتىسۋعا تىلەك بىلدىرگەن جانۇيالاردىڭ سانى 300 دەن اسىپ وتىر.
