نازاربايەۆ ۋنيۆەرسيتەتىندە«بولاشاق» تۇلەكتەرىنىڭ ءبىلىم الۋ مۇمكىندىگى بار - پرەزيدەنت

استانا. قازاقپارات - ەلباسى نۇرسۇلتان نازارايەۆ «بولاشاق» باعدارلاماسىنىڭ ءبىر بولىگىن نازاربايەۆ ۋنيۆەرسيتەتىنە وقىتۋعا باعىتتاۋدى ۇسىندى، دەپ حابارلايدى قازاقپارات.

«بولاشاق» باعدارلاماسى قارجىسىنىڭ ءبىر بولىگىن اتالعان ۋنيۆەرسيتەتتە ءبىلىم بەرۋگە باعىتتاۋدىڭ ۋاقىتى جەتتى. وسىندا سەرىكتەستىك يننوۆاتسيانىڭ پارمەندى ەكوجۇيەسىن قالىپتاستىرۋ ماڭىزدى. الەمگە وزدەرىنىڭ يدەياسىن ۇسىناتىن جاس عالىمدار كونسۋلتاتسيالار، باستاپقى كاپيتال، زاڭگەرلىك قىزمەت تۇرىندەگى جۇيەلى قولداۋدى الۋى ءتيىس» ، - دەدى مەملەكەت باسشىسى.

 پرەزيدەنتتىڭ پايىمىنشا، ۋنيۆەرسيتەتتە باسقارۋشىلار مەن مۇعالىمدەر ءبىلىم الۋى ءتيىس، سودان كەيىن وسىندا جيناقتالعان ۇزدىك تاجىريبەنى ەلىمىزدەگى بارشا ج و و- لارىنا ەنگىزۋ كەرەك.

«بۇل وقۋ ورنى تاۋەلسىزدىك جىلدارىندا تابىستى جۇزەگە اسىرىلعان جوبالاردىڭ ءبىرى. بىرتىندەپ وسىندا بىلىكتى وتاندىق كادرلارمەن جەكە عىلىمي مەكتەپ قالىپتاسادى. كەشەكتە تۇلەكتەر بۇل وقۋ ورنىندا عالىم اتانادى جانە ولاردىڭ جوبالارى ەلىمىزدە جانە شەتەلدە مويىندالادى دەپ سەنەمىن» ، - دەدى نۇرسۇلتان نازاربايەۆ.

ايتا كەتەيىك، ەلباسى بيىل نازاربايەۆ ۋنيۆەرسيتەتىن ءتامامداعان تۇلەكتەردى قۇتتىقتاپ، دوكتورانتۋرا باعدارلاماسىنىڭ العاشقى توعىز تۇلەگىنە ديپلومدارىن تابىستادى. بيىل وقۋ بىتىرگەن ستۋدەنتتەر سانى 737 ادام، ونىڭ ىشىندە باكالاۆريات باعدارلاماسى بويىنشا 499 تۇلەك، ماگيستراتۋرا باعدارلاماسى بويىنشا 229 ستۋدەنت جانە PhD دارەجەسىنە يە بولعان دوكتورانتۋرا باعدارلاماسىنىڭ ەڭ العاشقى 9 تۇلەگى بار. ەرەكشە ۇلگىدەگى ديپلومعا 75 تۇلەك يە بولدى.

اۆتور: رۋسلان عابباسوۆ