رۋحاني جاڭعىرۋ ۇلت رۋحانياتىن جاڭا تۇرعىدان تانۋعا جول اشادى

استانا. قازاقپارات - بيىلعى جىلدىڭ ماڭىزدى ماسەلەسى - «رۋحاني جاڭعىرۋ» باعدارلاماسى ەكەنى ءسوزسىز.

بيىلعى ەمەس- اۋ، ەلباسىنىڭ باستاماسىمەن ايقىندالعان بۇل باعدارلاما الداعى بولاشاعىمىز ءۇشىن جۇمىلاتىن رۋحاني باعدار. وسى باعدارلاماعا وراي ق ر پرەزيدەنتى اكىمشىلىگىنىڭ باسشىسى ادىلبەك جاقسىبەكوۆ باسقاراتىن قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيا قۇرىلىپ، جۇمىس توپتارى ايقىندالعالى بەرى جان- جاقتى جۇمىستار سارالانا باستاعان بولاتىن.

بەس باعىتتاعى جۇمىس توبى ناقتى جوسپارلارىن جاساپ، ىسكە كىرىسكەن ەدى. جۇمىسقا بارلىق ورتالىق جانە جەرگىلىكتى اتقارۋشى ورگاندار مەن ازاماتتىق قوعام ينستيتۋتتارىنىڭ وكىلدەرى تارتىلدى. بۇگىن اقوردادا كوميسسيا جەتەكشىسى، پرەزيدەنت اكىمشىلىگىنىڭ باسشىسى ادىلبەك جاقسىبەكوۆتىڭ توراعالىعىمەن قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ ەكىنشى وتىرىسى ءوتىپ، وندا ارالىق كەزەڭدە اتقارىلعان جۇمىستاردىڭ ەسەبى تىڭدالدى.

بۇدان بولەك، جيىن بارىسىندا «رۋحاني جاڭعىرۋ» باعدارلاماسىن ىسكە اسىرۋ اۋقىمىندا ورتالىق جانە جەرگىلىكتى مەملەكەتتىك ورگاندار اتقارعان جۇمىستاردىڭ ناتيجەلەرىن تالقىلادى. وتىرىستا نەگىزگى باياندامانى ق ر پرەمەر- مينيستر كەڭسەسى باسشىسى نۇرلان الدابەرگەنوۆ پەن الماتى قالاسىنىڭ اكىمى باۋىرجان بايبەك جانە قاراعاندى وبلىسىنىڭ اكىمى ەرلان قوشانوۆ جاساعان بولاتىن.

سونداي-اق، اتقارىلعان جۇمىستىڭ نەگىزگى ناتيجەلەرى، تۇجىرىمدامالىق ۇستانىمدار مەن قىزمەتتى ودان ءارى ۇيىمداستىرۋدىڭ ناقتى شارالارى اياسىندا، لاتىن قارپىنە كوشۋ، «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق»، «تۋعان جەر»، «قازاقستاننىڭ كيەلى جەرلەرىنىڭ گەوگرافياسى»، «جاھانداعى زاماناۋي قازاقستاندىق مادەنيەت»، «قازاقستاننىڭ 100 جاڭا تۇلعاسى» جوبالارى بويىنشا، جۇمىس توپتارىنىڭ جەتەكشىلەرى ەسەپ بەردى. تالقىلاۋ بارىسىندا «رۋحاني جاڭعىرۋ» باعدارلاماسىن، ونىڭ ىشىندە ارنايى جوبالاردى جۇزەگە اسىرۋ جونىندەگى ۇسىنىستار دا قارالدى.

وتىرىس قورىتىندىسى بويىنشا ءبىرقاتار ناقتى شەشىمدەر قابىلدانىپ، مەملەكەتتىك ورگاندار مەن جۇمىس توپتارىنىڭ جەتەكشىلەرىنە تاپسىرمالار بەرىلدى.

ماۋلەن اشىمبايەۆ، ءماجىلىس دەپۋتاتى:

بۇگىنگى وتىرىس مازمۇندى ءوتتى دەۋگە بولادى. جالپى لاتىن الىپبيىنە كوشۋ، تۋعان جەر، كيەلى جەرلەر، ۇلتتىق مادەنيەتىمىزدى شەتەلدەردە تانىتۋ، قازاق تىلىنە 100 تانىمال وقۋلىقتى اۋدارۋ باعىتتارى بويىنشا ازىرلەنگەن جوسپارلار كوميسسيا مۇشەلەرىنىڭ كوڭىلىنەن شىقتى. بۇل جوسپارلار جان- جاقتى ويلاستىرىپ، ەگجەي- تەگجەيلى پىسىقتالىپ، دايىندالعان. ەندى وسى قۇجاتقا سايكەس ۇلتتىق كوميسسيا، مەملەكەتتىك ورگاندار، زيالى قاۋىم وكىلدەرى جۇمىستار جۇرگىزەتىن بولادى. جالپى بۇگىنگى وتىرىستىڭ نەگىزگى قورىتىندىسى - ناقتى جوسپارلار قاراستىرىلىپ، ماقۇلداندى.

ەرلان قوشانوۆ، قاراعاندى وبلىسىنىڭ اكىمى:

ايرىقشا اتاپ وتكىم كەلەتىنى قاراعاندى وبلىسىنىڭ جۇرتشىلىعى مەن قوعام بەلسەندىلەرى، زيالى قاۋىم وكىلدەرى جانە ەل كاسىپكەرلەرى مۇنداي باستامانى وتە قاتتى قولداپ، قۋاتتاۋدا. ايماقتاعى اتقامىنەر ازاماتتار مەن كاسىپكەرلەر «تۋعان جەر» باعدارلاماسىن جۇزەگە اسىرۋ ءۇشىن ءجۇز ميلليون تەڭگەدەن استام قاراجات جيناپ، سالاماتتى ءومىر سالتىن ناسيحاتتاۋعا سەپ بولاتىن ءتۇرلى الەۋمەتتىك نىسانداردى سالۋعا قىزۋ كىرىسىپ كەتكەنى ءسوزىمدى ايعاقتاي تۇسەدى. ونىڭ ۇستىنە سپورتتىق نىساندى سالىپ ەلدى مەكەنگە سىيعا تارتۋمەن شەكتەلمەۋ قاجەتتىگىن جالپى قوعام سەزىنىپ وتىر.

جاپپاي قولعا الىنعان مۇنداي يگىلىكتى شارانىڭ استارىندا ەل مەن جەرگە، وتانعا دەگەن شەكسىز قۇرمەت پەن بايتاق قازاقستانعا دەگەن شەكسىز پاتريوتتىق سەزىم جاتقانى ءسوزسىز. دەمەك، مەملەكەتتىك دەڭگەيدە جۇزەگە اسىرىلىپ جاتقان بۇل جوبا جاستاردىڭ بويىندا وتانسۇيگىشتىك قاسيەت قالىپتاستىراتىنى اقيقات. ارينە، ەلباسى ماقالاسىندا ارنايى اتى اتالعان  ۇلىتاۋ وڭىرىنە قاتىستى جوبالاردى دامىتۋ، جەتىلدىرۋ جۇمىستارى قىزۋ قولعا الىناتىندىعىن دا ايرىقشا اتاپ وتكىم كەلەدى. ويتكەنى،  ۇلىتاۋ وڭىرىندە وسى كۇندەردىڭ وزىندە اۋقىمدى جۇمىستار باستالىپ تا كەتتى.

ارىستانبەك مۇحامەدي ۇلى، مادەنيەت جانە سپورت ءمينيسترى:

قوعامدىق سانانى جاڭعىرتۋ باعدارلاماسىن تابىستى جۇزەگە اسىرار بولساق، ەلباسىمىز ايتقانداي، قازاقستاننىڭ بولاشاعى مۇلدەم باسقاشا بولادى. ويتكەنى، ءار حالىقتى ونىڭ رۋحاني بايلىعى مەن سانا- سەزىمى قالىپتاستىرادى. ال بۇل باعدارلاما ءبىزدىڭ سانا- سەنىمىمىزدىڭ جوعارىلاۋىنا، ءوز قۇندىلىقتارىمىزدى ساقتاۋعا سەپتىگىن تيگىزىپ، دۇنيەجۇزىندە قازاق كىم دەگەندە «مەن» دەپ ماقتانىشپەن ايتاتىنداي جاعدايعا جەتكىزۋى ءتيىس.

سونىمەن قاتار، «قازاقستاننىڭ كيەلى جەرلەرىنىڭ گەوگرافياسى» جوباسى اياسىندا ەلىمىزدىڭ وڭىرلەرىندە جاستار ەلىمىزدىڭ تاريحي ايماقتارىنا ەكسپەديتسيالار ۇيىمداستىرۋ ۇستىندە. ال مادەنيەت جانە سپورت مينيسترلىگى بولسا جاز ايىندا 7 باعىتقا ارنالعان بۇكىل قازاقستاندىق ەكسپەديتسيا دايىنداۋدا.

باۋىرجان بايبەك، الماتى قالاسىنىڭ اكىمى:

بۇگىن مەن جوسپاردا تۇرعان 2 جاڭا باستاما جايىندا ايتتىم. بۇرىن الماتىلىقتار، جالپى قازاقستاندىقتار «ازيا داۋىسى» جوباسى تۋرالى كوپ ايتاتىن.

سوندىقتان ءبىز مەدەۋ، شىمبۇلاقتى كورسەتۋ، جالپى الماتىنىڭ تۋريستىك الەۋەتىن كوتەرۋ ءۇشىن «ازيا جۇلدىزى» دەگەن جوبانى باستاماقپىز. قىركۇيەك ايىندا، وزدەرىڭىز بىلەتىندەي، ءاربىر ءۇشىنشى دەمالىس كۇنى الماتى قالاسى كۇنى تويلانادى. سول كۇنى مەدەۋ مۇز ايدىنىندا وسىنداي فەستيۆالدى وتكىزۋ ارقىلى ءوزىمىزدىڭ مادەنيەتىمىزدى ازياعا پاش ەتەتىن بولامىز. مۇنان بولەك، «قازاق فيلم» كينوستۋدياسى اۋماعىندا بوس جاتقان جەردە ەتنولەند جوباسى قولعا الىنادى. ول جەردە قالا تۇرعىندارى، ايماقتاردان كەلگەن ازاماتتار، شەتەلدىك قوناقتار الماتىنىڭ مىڭ جىلدىق تاريحىمەن تانىس بولادى. بەلگىلى عالىمىمىز كارل بايپاقوۆ الماتى قالاسىندا ءتۇرلى قورعانداردىڭ وتە كوپ ەكەندىگىن ايتقان بولاتىن. ولاردىڭ كوبى جەكە كاسىپكەرلەردىڭ، بانكتەردىڭ يەلىگىندە. ءبىز سول جەرلەردى مەملەكەت مەنشىگىنە قايتارىپ، اشىق اسپان استىنداعى مۋزەيلەر جاسايتىن بولامىز.

التاي كولگىنوۆ، باتىس قازاقستان وبلىسىنىڭ اكىمى:

قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ كەزەكتى وتىرىسىندا باتىس قازاقستان ايماعىنداعى مادەني قۇندىلىقتاردى قايتا جاڭعىرتۋ مەن ونى ەل ىشىندە كەڭىنەن ناسيحاتتاۋ ماقساتىنداعى جوسپار، جوبالارىمىزدى كوميسسيا مۇشەلەرىنىڭ الدىندا تانىستىرىپ، تالقىلادىق. ويتكەنى، ءبىزدىڭ وڭىردە ەل تاريحىن تانىپ، بىلۋگە قۇشتار جاندارعا كورسەتە الاتىنداي باي تاريحىمىز بەن كونە جادىگەرلەرىمىز از ەمەس. سول سياقتى، «تۋعان جەر» باعدارلاماسىنداعى مىندەتتەردى ورىنداۋ ءۇشىن ايماقتاردان مەتسەناتتار مەن دەمەۋشىلەر ىزدەستىرىلۋدە. قوعامدى اۋىزبىرلىك پەن ۇيىمشىلدىققا، تاتۋ- ءتاتتى تىرشىلىك كەشۋگە ۇندەيتىن ءارتۇرلى الەۋمەتتىك ماڭىزى زور جيىن، شارالار وتكىزۋگە بەلسەندى ءارى ۇلتجاندى ازاماتتار تارتىلۋدا. ماسەلەن، بۇل باعىتتاعى يگى ءىسىمىزدىڭ ءبىرى - الاش قوزعالىسىنىڭ 100 -جىلدىعىنا وراي، ايماق ورتالىعىنان ارنايى «الاش» مۋزەيىن اشۋدى جوسپارلاۋ ۇستىندەمىز. مۇنداي ويدى ءوڭىر كاسىپكەرلەرى مەن ازاماتتارى ءبىراۋىزدان قۇپتادى. ءبارى ويداعىداي بولسا، جىل سوڭىنا قاراي «الاش» مۋزەيىن ەل تاماشالايتىن بولادى دەپ جوسپارلاپ وتىرمىز. ول ءۇشىن وڭىردە ءوز زامانىنان بەرى مۇرتى بۇزىلماي ساقتالعان عيمارات تا، ونىڭ ءىشىن تولتىرۋعا كونە جادىگەرلىك بۇيىمدار دا جەتكىلىكتى. اۆتور: قانات مامەتقازى ۇل